Vijayawada

13:40 - May 20, 2018

విజయవాడ : ఏపీలో జలరవాణా పనులు ముందుకు సాగడం లేదు. సాగరమాల ప్రాజెక్టు కింద కాకినాడ నుంచి పుదుచ్చేరి వరకు అంతర్గత జలరవాణా మార్గం ఏర్పాటుకు కేంద్ర, రాష్ట్ర ప్రభుత్వాలు సంకల్పించాయి. కానీ.. ఆంధ్రప్రదేశ్‌లో ఈ ప్రాజెక్టు పురోగతి ప్రశ్నార్థకంగా మారింది.

నత్తనడకను తలపిస్తున్న జలరవాణా ప్రాజెక్టు..
జలరవాణా అందుబాటులోకి వస్తే.. రవాణా సౌకర్యాలు మెరుగవడంతోపాటు.. రవాణా వ్యయం కూడా తగ్గుతుందంటూ కేంద్ర, రాష్ర్ట ప్రభుత్వాలు ప్రచారం చేశాయి. కానీ జలరవాణా ప్రాజెక్టు పనులు ఒక్క అడుగు కూడా ముందుకు సాగడంలేదు. ఏపీలో జలరవాణా పనుల వేగవంతానికి నాలుగేళ్ల క్రితం విజయవాడలో ఇన్ ల్యాండ్ వాటర్ వేస్ మార్గాన్ని కేంద్ర ప్రభుత్వం ఏర్పాటు చేసింది. కృష్ణానదిలో జలరవాణా కోసం తొలిదశలో నూటా యాభై కోట్ల రూపాయల నిధులను విడుదల చేసింది.. ఈ నిధులతో నావిగేషన్ ఛానెల్, కార్గో, ప్యాసింజర్ టెర్మినల్స్‌ను ఏర్పాటు చేయాల్సి ఉంది. కాగా.. ఈ పనుల్లో పురోగతి మాత్రం నత్తనడకను తలపిస్తోంది..

కేంద్ర నిధులతో 82 కి.మీ. ఛానల్స్ ఏర్పాటు చేయాలి..
కేంద్రం మంజూరు చేసిన నిధులతో కృష్ణానదిలో సుమారు ఎనభై రెండు కిలోమీటర్ల మేర జలరవాణాకు ఛానల్స్ ఏర్పాటు చేయాలి. హరిచంద్రపురం నుంచి ముక్త్యాల వరకు నావిగేషన్ ఛానెల్ ఏర్పాటు చేయాలి. ఈ పనుల్ని కోస్టల్ కన్సాలిడేటెడ్, స్ట్రక్చర్స్ ప్రైవేట్ లిమిటెడ్‌కు, ఇంటర్నేషనల్ మెరైన్ సర్వీసెస్ లిమిటెడ్‌కు అప్పగించారు. కానీ.. ఇప్పటి వరకూ చానెల్స్ నిర్మాణ పనులే పూర్తి కాలేదు. ఇవికాకుండా నలభై మూడు కోట్ల రూపాయలకు పైగా వ్యయంతో ముక్త్యాల, ఇబ్రహీంపట్నం, హరిశ్చంద్రపురంలో కార్గో టెర్మినల్స్ ను, విజయవాడలోని దుర్గాఘాట్, భవానీద్వీపం, వేదాద్రి, గుంటూరు జిల్లా అమరావతిలో పాసింజర్ టెర్మినల్స్‌ను ఏర్పాటు చేయాల్సి ఉంది.

కోటి రూపాయలతో రాష్ర్ట ప్రభుత్వం సర్వే..
రెండో దశలో కాకినాడ నుంచి విజయవాడ వరకూ కాకినాడ, ఏలూరు కాల్వల జలరవాణా పనులు చేపట్టాలని నిర్ణయించారు. దీనికి రాష్ట్ర ప్రభుత్వం కోటి రూపాయలు వెచ్చించి సర్వే కూడా చేయించింది. పదిహేడు వందలా ముప్పై తొమ్మిది ఎకరాల భూమిని సేకరించి... రెండు వేల మూడు వందల పందొమ్మిది కోట్ల రూపాయలు ఖర్చవుతుందని అంచనాలు సిద్ధం చేశారు. ఈ నిధులను విడుదల చేయాలని రాష్ట్ర ప్రభుత్వం కేంద్రాన్ని కోరింది. కాగా ఇప్పటికే విడుదలైన నూటా యాభై కోట్ల రూపాయల నిధులను ఖర్చు చేసిన లెక్కలతోపాటు రెండో దశలో చేపట్టబోయే పనులపై సమగ్ర ప్రణాళికా నివేదికను ఇవ్వాలని కేంద్రం ఆదేశించింది. వీటిలో కేంద్ర ప్రభుత్వ వాటాతోపాటు... రాష్ట్ర ప్రభుత్వ వాటా వివరాలను సమగ్రంగా అందించాలని సూచించింది. జలరవాణా ప్రాజెక్టుకు అయ్యే ఖర్చులో.. రాష్ట్ర ప్రభుత్వం తన వాటా భరించే స్థితిలో లేకపోవడంతో ఈ ప్రాజెక్టు పరిస్థితి అయోమయంగా మారిందన్న వాదన వినిపిస్తోంది.

13:33 - May 20, 2018

విజయవాడ : కనకదుర్గమ్మ భక్తులపై అధికారులు భారాలు మోపుతూనే ఉన్నారు. భక్తులకు సౌకర్యాలు, వసతులు కల్పించే విషయంలో లేని శ్రద్ద... దుర్గమ్మ పూజా, ఇతర కైంకర్యాల విషయాల్లో మాత్రం ధరలను భారీగా పెంచారు. సామాన్య భక్తునికి అమ్మవారి సేవను దూరం చేస్తున్నారనే విమర్శలు వినిపిస్తున్నాయి.

దర్శనం, ఇతర కైంకర్య సేవల టిక్కెట్ల ధరల పెంపు
విజయవాడ కనకదుర్గమ్మను దర్శించుకునేందుకు సుదూర ప్రాంతాల నుంచి భక్తులు ఎన్నో వ్యయ ప్రయాసాలకోర్చి తరలివస్తుంటారు. అయితే వచ్చిన భక్తులకు అమ్మవారి సేవలను దూరం చేస్తోంది పాలకవర్గం. కాసులుంటేనే అమ్మదర్శనం అన్న రీతిన టిక్కెట్టు ధరలను పెంచేస్తున్నారు. దీంతో గతంలో ఎన్నడూ లేని విధంగా భక్తుల సంఖ్య తగ్గిపోయింది. ఓ వైపు దుర్గగుడి వద్ద ప్లై ఓవర్‌ పనులతో కొంతమేర భక్తుల రాకపోకల సంఖ్య తగ్గగా.. ఇంకోవైపు ధరల భారాన్ని తట్టుకోలేని భక్తులు అమ్మ సన్నిధికి రావాలంటేనే బెదిరిపోతున్నారు.

ఇంద్రకీలాద్రిలో పాలకమండలిని నియమించిన రాష్ట్ర ప్రభుత్వం
గతంలో ఇంద్రకీలాద్రిపై రాష్ట్ర ప్రభుత్వం పాలకమండలిని నియమించింది. అటునుంచి ఐఏఎస్‌ అధికారిణిలను ఈవోలుగా నియమిస్తూ వచ్చింది. అయితే భక్తులకు ధరల భారం లేకుండా చూడటం, ఆలయ వైభవాన్ని మరింత ఇనుమడింప చేయటం, భక్తుల సంఖ్యను పెంచడం వంటి వాటిపై దృష్టిసారించకుండా ఇష్టానుసారంగా నిర్ణయాలు తీసుకోవడంతో... దుర్గ గుడికి భక్తులను దూరం చేసే పరిస్థితులు ఏర్పడ్డాయి. తాజాగా శాంతి కళ్యాణ టికెట్‌ ధరను పెంచారు పాలక మండలి సభ్యులు. 2018 మే 16న మాడపాటి గెస్ట్‌ హౌస్‌లో ఆలయ చైర్మన్‌ యలమంచిలి గౌరంగబాబు, ఈవో పద్మల సమక్షంలో పాలకమండలి సమావేశాన్ని నిర్వహించి శాంతి కళ్యాణం టికెట్‌ ధరను రూ. 500 నుంచి రూ. 1000 కి పెంచామని వెల్లడించారు. గతంలో శాంతి కళ్యాణం చేయించుకున్న భక్తులకు రూ. 100 టికెట్‌ లైన్‌లో దుర్గమ్మ దర్శనానికి అనుమతించారు. ఇప్పుడు అంతరాలయం దర్శనానికి రూ. 300 టికెట్‌తో అనుమతిస్తున్నామని చెబుతున్నారు. ఈవో ఈ నిర్ణయం తీసుకోవడంతో భక్తులకు ఇబ్బందికరంగా మారింది.

భక్తులకు భారంగా మారిన అమ్మవారి దర్శనం
అధికారుల అనాలోచిత నిర్ణయాలు దుర్గమ్మ ఆలయానికి భక్తుల సంఖ్యను తగ్గిస్తున్నాయి. ఆలయంపై వచ్చే ఆదాయంపైన ఎక్కువగా దృష్టి సారించిన అధికారులు.. భక్తుల సంఖ్య పెంచడం పై ఎందుకు దృష్టి నిలపడం లేదని ప్రశ్నిస్తున్నారు.

గొల్లపూడిలో జీ+4 కాటేజీలను రూ. 13.70 కోట్లు
మరోవైపు గొల్లపూడిలో దేవస్థానంకు చెందిన స్థలంలో జీ+4 కాటేజీలను 13.70 కోట్ల రూపాయలతో నిర్మించాలని నిర్ణయించారు. ఈ నిధులను కూడా దాతల నుంచి సేకరించాలని చూస్తున్నారు. పది లక్షల రూపాయలు చెల్లించిన దాత పేరున ఒక గదికి, పదిహేను లక్షలు ఇచ్చిన దాత పేరున ఒక సూట్‌కు కేటాయించాలని నిర్ణయాలు తీసుకున్నారు. దాతలకు ఏడాదికి 30 రోజుల పాటు రూమ్‌ లేదా కాటేజ్‌ను ఉచితంగా వాడుకోవచ్చని, మిగిలిన రోజుల్లో భక్తులకు అద్దెలకు ఇవ్వాలని నిర్ణయించారు. అలాగే ఆలయంలో పాశుపతాస్త్రాలయం పునఃనిర్మించేందుకు ఓ కన్సల్టెంట్‌ను నియమించేందుకు పాలక మండలి ఆమోదం తెలిపింది. అంతేకాకుండా దుర్గమ్మకు భక్తులు కానుకల రూపంలో సమర్పించే బంగారు అభరణాలను భద్రపరిచి తిరిగి అమ్మవారికి, ఉపాలయాల్లోని దేవతామూర్తులకు వెండి, బంగారు ఆభరణాలు తయారు చేయించాలని నిర్ణయించారు. ఈ క్రమంలో వెండిని విక్రయించగా వచ్చిన నగదును బంగారం బాండ్లుగా మార్చనున్నామని ఆలయ అధికారులు చెబుతున్నారు.

ధరలను పెంచటంతో మండిపడుతున్న భక్తులు..
ఇవన్నీ ఇలా ఉంటే ఆలయ అభివృద్ధి.. భక్తులపై ధరల భారాన్ని తగ్గించేందుకు ఎటువంటి నిర్ణయాలను తీసుకుంటున్నారో మాత్రం పాలకమండలి వెల్లడించలేదు. భక్తుల నుంచి ధరల రూపంలో వచ్చే ఆదాయంపైన, దుర్గమ్మకు భక్తులు సమర్పించే కానుకలు, నగదును గురించి దృష్టిసారించారనే విమర్శలు వ్యక్తమవుతున్నాయి. శాంతి కళ్యాణం టికెట్‌ ధరను 500 రూపాయల నుంచి 1000 రూపాయలకు పెంచడాన్ని భక్తులు వ్యతిరేకిస్తున్నారు. ధరలను తగ్గించి సౌకర్యంగా మార్చాలని భక్తులు కోరుతున్నారు. భక్తులు రాకుండా చేసి ఆలయ ప్రతిష్టతను దిగజార్చొద్దని కోరుతున్నారు

18:31 - May 17, 2018
16:31 - May 17, 2018

విజయవాడ : నగర పాలక సంస్థ సర్వసభ్య సమావేశం రసాభాసగా మారింది. ఏపీకి ప్రత్యేక హోదా ఇవ్వాలని టిడిపి ప్రవేశ పెట్టిన తీర్మానంపై రగడ చెలరేగింది. నాలుగేళ్ల తరువాత హోదా కోరుతూ తీర్మానం ఇవ్వడం...ఏంటనీ ప్రతిపక్ష వైసీపీ, బీజేపీ సభ్యులు ప్రశ్నించాయి. చంద్రబాబు డౌన్..డౌన్ అంటూ నినాదాలు చేసిన వైసీపీ కార్పొరేటర్లు జీబాబ్, జమల పూర్ణమ్మలను మేయర్ సస్పెండ్ చేయడం వివాదానికి తెరలేచింది. పూర్తి సమాచారం కోసం వీడియో క్లిక్ చేయండి. 

19:13 - May 16, 2018

విజయవాడ : ఏపీ ఈ-సెట్ ఫలితాలను మంత్రి గంటా శ్రీనివాసరావు విజయవాడలో విడుదల చేశారు. ఈ ఫలితాలలో పలు జిల్లాలకు చెందిన విద్యార్థులు వివిధ కోర్సుల్లో ఫస్ట్ ర్యాంకులు సాధించారు. ఈస్ట్ గోదావరికి చెందిన ఉమామహేశ్వరరావు బయోటెక్నాలజీలో ఫస్ట్ సాధించాడు. నెల్లూరు జిల్లాకు చెందిన లోకేష్‌ సెరమిక్‌ టెక్నాలజీలో ఫస్ట్ ర్యాంక్‌ పొందాడు. కెమికల్ ఇంజనీరింగ్‌లో సాయినాథ్, సివిల్ ఇంజనీర్‌లో వరంగల్‌కు చెందిన రాకేష్‌, కంపూటర్‌ సైన్స్‌ ఇంజనీరింగ్‌లో రంగారెడ్డి జిల్లాకి చెందిన అనిల్‌ కుమార్‌, ఇసిఇలో మహబూబ్‌ నగర్‌ జిల్లాకి చెందిన స్వాతి, వరంగల్‌ కు చెందిన యశ్వంత్‌లు ఫస్ట్ ర్యాంక్‌ సాధించారు. ఈ పరీక్షకు మొత్తం 35 వేల 24 మంది దరఖాస్తు చేసుకోగా, 33 వేల 637 మంది పరీక్షకు హాజరయ్యారు. వీరిలో 98.37 శాతం మంది విద్యార్థులు ఉత్తీర్ణత సాధించారు. 

21:48 - May 15, 2018

తూర్పుగోదావరి : దేవిపట్నం మండలం మంటూరు వద్ద ఘోర ప్రమాదం చోటుచేసుకుంది. గోదావరిలో విహారానికి వెళ్లిన లాంచీ మునిగిపోయింది. ఈత కొడుతూ ఐదుగురు ఒడ్డుకు చేరుకున్నట్లు స్థానికులు చెబుతున్నారు. కొండమొదలు నుంచి రాజమహేంద్రవరం వెళ్తుండగా మంటూరు వద్ద ఈ ప్రమాదం జరిగింది. లాంచీలో సుమారు 40 మంది పర్యాటకులు ఉన్నట్టు సమాచారం. ఈ ఘటన సాయంత్రం 5గంటల సమయంలో జరిగినట్లు తెలుస్తోంది. లాంచీ నిర్వాహకుడు ఖాజా దేవీపట్నం పోలీసుల ఎదుట లొంగిపోయాడు. మంటూరుకు చెందిన పలువురు గిరిజనులు నాటుపడవలతో ఘటనా స్థలానికి వెళ్లారు. ఈ లాంచీలో పెళ్లి బృందం ఉన్నట్టుగా తెలుస్తోంది. ఘటనా స్థలంలో సహాయక చర్యలు చేపట్టేందుకు ఎన్డీఆర్‌ఎఫ్‌ బృందాలు బయల్దేరి వెళ్లాయి. నాలుగు రోజుల క్రితమే గోదావరిలో లాంచీలో భారీ అగ్నిప్రమాదం జరిగిన ఘటన ఇంకా మరవకముందే అదే ప్రాంతంలో ఈ ఘటన చోటుచేసుకోవడం తీవ్ర ఆందోళనకు గురిచేస్తోంది. 

08:26 - May 15, 2018

కృష్ణా : విజయవాడ నగరపాలక సంస్థకు చెందిన విలువైన స్థలాలను ప్రయివేటుకు ధారాదత్తం చేసేందుకు అధికారులు పావులు కదుపుతున్నారు. ఆర్థిక వనరుల సమీకరణ, అభివృద్ధి ముసుగులో బడాబాబులకు స్థలాలను కారుచౌకగా కట్టబెట్టేందుకు స్కెచ్‌ గీస్తున్నారు.  కౌన్సిల్‌ అజెండాలో చేర్చి.. తీర్మానాన్ని ఆమోదింపచేసుకోవడానికి అధికారులు ప్రయత్నాలు ప్రారంభించారు. 

విజయవాడ మున్సిపాల్‌ కార్పొరేషన్‌కు చెందిన స్థలాలు, కార్యాలయాలు, ఆస్తులను బడాబాబులకు అప్పగించే చర్యలకు ప్రభుత్వం  శ్రీకారం చుట్టింది. కౌన్సిల్‌ అజెండాలో ఈ ప్రక్రియను చేర్చి ఆమోదించుకోవాలని ప్రభుత్వం చూస్తోంది. గతంలో నిర్వహించిన మూడు కౌన్సిల్‌ సమావేశాల్లో ఈ అంశం వాయిదా పడుతూ వచ్చింది. మరోసారి కౌన్సిల్‌ సమావేశంలో ఆస్తులను అమ్మే అంశాన్ని చేర్చి ఆమోదించుకోవాలని ఉవ్విళ్లూరుతోంది. 

ప్రభుత్వం ప్రయివేటు భాగస్వామ్యం పద్ధతిలో లేదంటే బిల్డ్‌ ఆపరేట్‌ ట్రాన్స్‌ఫర్‌ పద్ధతిలో ప్రయివేటు వ్యక్తులకు ఆస్తులను అప్పగించేలా అధికారులు ప్లాన్స్ గీస్తున్నారు. సుమారు 50 కోట్ల ఆస్తులను ప్రయివేటు వ్యక్తులకు ఇవ్వాలని అధికారులు యోచిస్తున్నారు. ఇందులో 22.45 కోట్ల విలుగల 3,712 చదరపు అడుగుల విస్తీర్ణంలోని అతిథి గృహాన్ని, 9.79 కోట్ల విలుగల 4,453 చదరపు అడుగుల స్థలాన్ని, 8.27కోట్ల విలుగల మున్సిపల్‌ క్వార్టర్లను, 8.85 కోట్ల విలుగల జంధ్యాల దక్షిణామూర్తి పాఠశాల ఆవరణను అన్యాక్రాంతం చేయాలని అధికారులు భావిస్తున్నారు. అయితే అధికారుల అంచనాల కంటే మార్కెట్‌ ధర ప్రకారం ఈ ఆస్తులన్నీ వందల కోట్ల రూపాయలు ఉంటాయని విపక్ష సభ్యులు ఆరోపిస్తున్నారు.  

మున్సిపల్‌ ఆస్తులను ప్రయివేటు వ్యక్తులకు కట్టబెట్టే అంశాన్ని కౌన్సిల్‌లో ఆమోదించేందుకు మూడు సార్లు ప్రవేశపెట్టారు.  అయితే కౌన్సిల్‌ మాత్రం ఈ అంశాన్ని మూకుమ్ముడి వాయిదా వేస్తు వచ్చింది. కార్పొరేషన్ ఆస్తులను రక్షించుకోవాలని, వీఎంసీ ఆధ్వర్యంలో కాంప్లెక్స్‌లు, ఇతర నిర్మాణాలు చేపట్టాలని, ప్రయివేటు వ్యక్తులకు ఇవ్వవద్దని అన్ని పార్టీల కార్పొరేటర్లు, ప్రజాప్రతినిధులు స్పష్టం చేశారు. 

మరోసారి ఈ అంశం తెరమీదకు రావడంతో మున్సిపల్‌ కౌన్సిల్‌తో పాటు ప్రజా ప్రతినిధుల్లోనూ చర్చనీయంగా మారింది. ఇన్నాళ్లు వాయిదా వేస్తూ వస్తున్నా.. మళ్లీ ఈ అంశాన్ని తీర్మానాల్లో పెట్టాలనే వెనుక దాగి ఉన్న ఆంతర్యం ఏమిటని, విపక్షాలు, అధికారపక్షంలోని పలువురు సభ్యులు తీవ్ర స్థాయిలో మండిపడుతున్నారు.

12:48 - May 14, 2018
09:17 - May 12, 2018

శ్రీకాకుళం : రంగు, రుచితో నోరూరించే మధుర ఫలాల్లో... నేడు రంగు మాత్రమే మిగిలి.. మాధుర్యం మాయమైంది.. కృత్రిమ పద్ధతిలో మగ్గిస్తుండడంతో... మామిడి పళ్ళలో రుచికంటే.. అనారోగ్య కారకాలే ఎక్కువగా ఉన్నాయి. శ్రీకాకుళం జిల్లాలో నాణ్యత లేక వినియోగదారులు, దిగుబడి లేక రైతులు ఆందోళన చెందుతున్నారు
రసాయనాలతో రుచిలేని మామిడి పళ్ళు
రంగు, రుచిగల.. శ్రీకాకుళం మామిడి పళ్ళకు ఒకప్పుడు మాంచి క్రేజ్ ఉండేది. బంగినపల్లి, చెరుకురసాలు, సువర్ణరేఖ రకాలకు శ్రీకాకుళం జిల్లా మామిడి తోటలు పెట్టింది పేరు. కానీ.. రసాయనాల వాడకంతో రుచిని కోల్పోయిన మామిడిలో రంగు మాత్రమే మిగిలింది. గతంలో వందలాది వాహనాలతో కళకళలాడిన శ్రీకాకుళం మామిడి మార్కెట్‌.. నేడు ఇతర జిల్లాల నుంచి దిగుమతి చేసుకునే దుస్థితికి చేరుకుంది. ఎంతో పేరున్న శ్రీకాకుళం మామిడి.. రానురాను  ప్రాభవం కోల్పోతోందని స్థానికులు ఆందోళన వ్యక్తం చేస్తున్నారు. 
ఈ ఏడాది 7 వేల హెక్టార్లకే పరిమితమైన మామిడి సాగు
శ్రీకాకుళం జిల్లా ఉద్దాన ప్రాంతం, గార, హిరమండలం, సీతంపేట, నరసన్నపేట ప్రాంతాల మామిడికి గతంలో చాలా డిమాండ్‌ ఉండేది.  రసాయనా లతో కాయలను మగ్గపెట్టడం, ఎక్కువ దిగుబడి కోసం క్రిమి సంహారక మందులను వినియోగించడం వల్ల  సిక్కోలు మ్యాంగో మార్కెట్ వైభవం  కోల్పోయి వెలవెలబోతోంది. గత ఏడాది శ్రీకాకుళం జిల్లా వ్యాప్తంగా 9వేల హెక్టార్లలో ఉన్న మామిడి తోటలు.. ఈ సారి 7 వేల హెక్టార్లకు పరిమితమైంది. దీంతో  ఇతర ప్రాంతాల నుంచి దిగుమతి చేసుకోవాల్సిన దుస్థితి ఉందంటున్నారు వ్యాపారులు.
దళారుల వల్ల కష్టాలు 
శ్రీకాకుళం, నరసన్నపేట, టెక్కలి, పలాస, సోంపేట, ఆముదాలవలస, పాలకొండ పట్టణాలకు రైతులు మామిడిపళ్ళను ఎక్కువగా తెస్తుంటారు. కానీ.. దళారుల వల్ల కష్టాలు తప్పడం లేదు. కాల్షియం కార్భైట్‌తో రాత్రికిరాత్రే కాయ మగ్గినట్లు కనిపిస్తోంది. ఇలాంటి హానికరమైన మామిడి పళ్ళను  అమ్ముతూ వ్యాపారులు కేష్ చేసుకుంటున్నారు. వ్యాపారుల స్వార్థానికి తాము  బలికావాల్సి వస్తుందని ప్రజలు ఆందోళన చెందుతున్నారు. శ్రీకాకుళం జిల్లా  మామిడికి పూర్వవైభవం తెచ్చే దిశగా అధికారులు చర్యలు తీసుకోవాల్సిన అవసరం ఎంతైనా ఉంది.హోల్  సేల్ వ్యాపారుల పై దాడులు చేసి కార్భైట్ విని యోగాన్ని పూర్తిగా నిర్మూలించాలని ప్రజలు కోరుతున్నారు. 

 

06:35 - May 11, 2018

విజయవాడ : నగర కాంగ్రెస్‌ కష్టాల కొలిమిలో కొట్టుమిట్టాడుతోంది. ముగ్గురు నాయకులు... ఆరు గ్రూపులు.. అన్న చందంగా వ్యవహరిస్తున్నారు. నగర కాంగ్రెస్‌లోని సీనియర్లు పార్టీని వీడటంతో పార్టీ పెద్ద దిక్కు కరువైంది. నగరనాయకుల్లో కొందరికి ఏపీసీసీలో స్థానం కల్పించినా.. పార్టీ పటిష్టతపై ఎవరూ దృష్టి పెట్టకపోవడం నాయకత్వానికి తలనొప్పిగా మారింది. కాంగ్రెస్‌పై ప్రజల్లో ఇంకా కోపం తగ్గలేదు. విభజన సమస్యలన్నింటికీ కాంగ్రెస్సే కారణమయ్య ఆగ్రహంతో ఊగిపోతున్నారు. ప్రత్యేక హోదా, విభజన హామీల అమలు కోసం జరుగుతున్న ఉద్యమంలో...కాంగ్రెస్‌ పేరు ఎత్తితేనే ప్రజలు కస్సుబస్సు లాడుతున్నారు. దీంతో ప్రజలకు సమాధానం చెప్పలేనిస్థితిలో కాంగ్రెస్‌ నాయకులు ఉన్నారు. గత ఎన్నికల్లో డిపాజిట్లు కూడా దక్కకుండా చావుదెబ్బతిన్న కాంగ్రెస్‌ను వచ్చే ఎన్నికల్లో అయినా కరుణిస్తారా... అంటే పార్టీ నేతలే అనుమానం వ్యక్తం చేస్తున్నారు. దీంతో పార్టీ కార్యక్రమాల పట్ల విముఖత చూపుతున్నారు.

ఎన్నికలకు మరో ఏడాది మాత్రమే గడువు ఉంది. అన్ని పార్టీలు జనంలోకి వెళ్తున్నా... కాంగ్రెస్‌ నాయకులు మాత్రం ఇంకా ఇళ్లకే పరిమితమయ్యారు. నాయకులంతా ప్రజల్లోకి వెళ్లి.. బీజేపీ, టీడీపీ పాలనలో రాష్ట్రానికి జరిగిన అన్యాయాన్ని ప్రచారం చేయాలని ఏపీసీసీ చీఫ్‌ రఘురారెడ్డి ఆదేశాలను నగర కాంగ్రెస్‌ నాయకులు పెడచెవిన పెడుతున్నారు. దీంతో పీసీసీ అధ్యక్షుడు నగర కాంగ్రెస్‌ నాయకులకు క్లాస్‌ తీసుకున్నారు. ఏపీకి ప్రత్యేక హోదా కోసం మొదటి నుంచి పోరాడుతున్న కాంగ్రెస్‌ పట్ల ప్రజాల్లో సానుకూలత రాకపోవడానికి నేతల వైఖరే కారణమన్నది పీసీసీ నాయకత్వం వాదన. పార్టీ కమిటీల్లో పదవులు పొందేందుకు పెడుతున్న శ్రద్ధాసక్తులు.. పార్టీ బలోపేతంపై ఎందుకు పెట్టడంలేదని రఘువీరారెడ్డి ప్రశ్నిస్తున్నారు. దీనికి సమాధానం చెప్పుకోలేని సందిగ్ధ పరిస్థితుల్లో నగర కాంగ్రెస్‌ నాయకులు ఉన్నారు. ఇకనైనా ప్రజల్లోకి వెళ్లకపోతే 2019 ఎన్నికల్లో మరోసారి భంగపాటు తప్పదని పీసీసీ నాయకత్వం హెచ్చరిస్తున్నా.. నాయకుల్లో చలనం కనిపించడంలేదు. నిరంతరం ప్రజల్లో ఉండాలంటున్న ఆదేశాలను పెడచెవిన పెట్టడంపై రఘువీరారెడ్డి ఆగ్రహం వ్యక్తం చేసినా.. నగర కాంగ్రెస్‌ నాయకుల్లో మార్పులేదు. పీసీసీ ఆదేశాలపై నగర కాంగ్రెస్‌ ధోరణి మరోలా ఉంది. అటు ప్రజలు నమ్మరు.. ఇటు పీసీసీ నాయకత్వం ఊరుకోదు.. దీంతో తమ పరిస్థితి అడకత్తెరలో పోకచక్క చందంగా, పాము నోట్లో కప్ప మాదిరిగా తయారైందని ఆవేదన వ్యక్తం చేయడం మినహా, ఏమీ చేయలేని అశక్తులుగా మారామని అంతర్మథనం చెందుతున్నారు. ఈ పరిస్థితి ఎప్పటికి మారుతుందో చూడాలి. 

Pages

Don't Miss

Subscribe to RSS - Vijayawada