visakhapatnam

18:03 - April 20, 2017

విశాఖ : సవాళ్లను ఎదుర్కోడానికి ఇండియన్‌ నేవీ సదా సిద్ధంగా ఉంటుందని .. నావికాదళ ప్రధానాధికారి అడ్మిరల్‌ సునీల్‌లాంబా అన్నారు. విశాఖలో తూర్పునావికాదళ పతకాల పంపిణీ కార్యక్రమంలో ఆయన పొల్గొన్నారు. ఉత్తమ ప్రతిభ కనబరచిన వారికి నౌసేనా మెడల్‌తోపాటు విశిష్టసేవా పతకాలను ఆయన ప్రదానం చేశారు. పరిస్థితులను అనుసరించి ఆధునిక టెక్నాలజీని అందిపుచ్చుకుంటున్నామని సునీల్‌ లాంబా అన్నారు. 

08:23 - April 18, 2017

విశాఖ : ఏజెన్సీలో గిరిజనుల ఆరోగ్య దుస్థితిపై టెన్‌ టీవీ కథనంతో ఎట్టకేలకు ప్రభుత్వంలో చలనం వచ్చింది. గిరిపుత్రుల మరణాలపై మంత్రుల బృందం అధికారులతో ప్రత్యేక సమావేశం నిర్వహించి..రోగులకు మెరుగైన వైద్యం అందించాలని నిర్ణయించింది. 10 టీవీ కథనాలు కదం తొక్కుతున్నాయి. విశాఖ ఏజెన్సీలో వైద్యం అందక కొనసాగుతున్న గిరిపుత్రుల మరణాలపై వరుస కథనాలు ప్రసారం చేసింది. ఈ కథనాలతో ప్రభుత్వం నుంచి స్పందన వచ్చింది. 
మంత్రుల బృందం సమావేశం 
ఏజెన్సీలో వైద్యసదుపాయాల కల్పనపై విశాఖ కలెక్టరేట్ లో ఆరోగ్యశాఖ మంత్రి కామినేని శ్రీనివాసరావు ఆధ్వర్యంలో మంత్రుల బృందం సమావేశం నిర్వహించింది. ఏజెన్సీలో మరణాలను ఎలా తగ్గించాలనే అంశంపై సుదీర్ఘంగా చర్చించారు. ముఖ్యంగా ఏజెన్సీ ప్రాంతాలలో 4 కొత్త పీహెచ్‌సీలు.. పాడేరులో జిల్లా ఆస్పత్రులు ఏర్పాటు చేయాలని నిర్ణయించింది. ఏజెన్సీలో పనిచేయడానికి సిద్ధంగా ఉన్న స్పెషలిస్టులకు నెలకు రెండు లక్షలు, ఎంబీబీఎస్‌ పూర్తి చేసిన వైద్యులకు లక్ష రూపాయలు ఇచ్చేందుకు ప్రభుత్వం సిద్ధంగా ఉన్నట్లు మంత్రి కామినేని తెలిపారు. కార్పొరేట్ హాస్పిటల్స్ ఏజన్సీలో తమ శాఖను ప్రారంభిస్తే వారికి ట్యాక్స్ మినహాయింపు కూడా ఇస్తామన్నారు.
రోడ్ల లేమి 
అలాగే రోడ్లు లేమి కూడా ప్రధాన సమస్యగా గుర్తించారు. దీనిలో భాగంగా తొలుత మండల కేంద్రం నుంచి నియోజకవర్గ కేంద్రం వరకు బీటీ రోడ్లు ఏడాదిలో నిర్మించాలని నిర్ణయించారు. మావోయిస్టు ప్రభావిత ప్రాంతాలలో 1200 కోట్ల రూపాయల నిధులతో మరిన్ని రోడ్లు వేయనున్నట్లు రోడ్లు భవనాల శాఖ మంత్రి అయ్యన్నపాత్రుడు తెలిపారు. విశాఖ మన్యంలో వైద్యం అందని దైన్యస్థితిపై వరుస కథనాలు ప్రసారం చేసి.. ప్రభుత్వంలో చలనం తెచ్చేందుకు కృషిచేసిన టెన్‌టీవీకి ఏజెన్సీ ప్రాంత వాసులు కృతజ్ఞతలు తెలిపారు. 

06:57 - April 10, 2017

విశాఖ. అంతర్జాతీయంగా పేరు, ప్రఖ్యాతులు సంపాదించుకున్న నగరం. ఇక్కడి పరిశ్రమలు ఒక ఎత్తయితే.. ప్రకృతి రమణీయత మరో ఎత్తు. దీంతో రాష్ట్ర విభజన అనంతరం విశాఖ అత్యంత పెద్ద నగరంగా రూపాంతరం చెందింది. దీని ప్రాముఖ్యతను గుర్తించిన కేంద్ర ప్రభుత్వం కూడా స్మార్ట్‌ సిటీ జాబితాలో విశాఖను చేర్చారు. వేలాది కోట్లతో నగరాన్ని అద్భుతంగా తీర్చిదిద్దుతామని పాలకులు ప్రకటించారు.

పాలకులు ఊదరగొట్టిన అభివృద్ధి ఏదీ నగరంలో ...

అయితే.. పాలకులు ఊదరగొట్టిన అభివృద్ధి ఏదీ నగరంలో కనిపించడం లేదు. స్లమ్స్‌ లేకుండా చేస్తామని చెప్పిన ప్రభుత్వం ఆ దిశగా అడుగులు వేస్తున్న దాఖలాలు కనిపించడం లేదు. 632 వందల చదరపు కిలోమీటర్లు ఉన్న విశాఖ నగరంలో కేవలం 0.6 చదరపు కిలోమీటర్ల విస్తీర్ణాన్ని మాత్రమే స్మార్ట్‌ సిటీగా ప్రకటించడం జరిగిందని నగరవాసులంటున్నారు. ఇది కూడా ధనవంతులు ఉండే ప్రాంతమే అంటున్నారు.

నగరంలో స్లమ్స్‌ పెరిగి మురికివాడల నగరంగా...

రోజురోజుకు జనాభా పెరుగుతుండడంతో నగరంలో స్లమ్స్‌ పెరిగి మురికివాడల నగరంగా తయారైందని ప్రజలంటున్నారు. మురికివాడల సంఖ్యను తగ్గించేందుకు వందల కోట్లు ఖర్చు చేశామని ప్రభుత్వం చెప్పుతున్నప్పటికీ.. పట్టణ పేదరిక నిర్మూలన సంస్థ తాజాగా చేపట్టిన సర్వేలో 2013లో నగరంలో 741 ఉన్న స్లమ్స్‌ ఉండగా.. అవి 790కి పెరిగాయని ప్రకటించింది. అదేవిధంగా మురికివాడల్లో ఉండే జనాభా సంఖ్య 352 శాతం పెరిగింది. ఇది ఇలాగే కొనసాగితే విశాఖ నగరం ముంబయి తరహాలో మురికివాడల నగరంగా మారే ప్రమాదం ఉందని పలువురు హెచ్చరిస్తున్నారు.

జీవీఎంసీ బడ్జెట్‌లో 40 శాతం నిధులు కేటాయించాలని నిబంధన ఉన్నప్పటికీ ...

ఇక మురికివాడల నిర్మూలనకు జీవీఎంసీ బడ్జెట్‌లో 40 శాతం నిధులు కేటాయించాలని నిబంధన ఉన్నప్పటికీ పాలకులు అవేమీ పట్టించుకోవడం లేదు. దీంతో క్రమక్రమంగా స్లమ్స్‌ పెరిగిపోతున్నాయి. అయితే.. నగరంలో మురికివాడలను నిర్మూలించకుండా స్మార్ట్‌సిటీ ఎలా చేస్తారని స్వచ్చందసంఘాల నేతలు ప్రశ్నిస్తున్నారు. స్మార్ట్‌ సిటీ పేరుతో పేదలను స్లమ్స్‌ నుంచి ఖాళీ చేయించి విలువైన భూములు కొట్టేయ్యడానికి ప్రయత్నిస్తుందని విమర్శిస్తున్నారు. ఇదిలావుంటే.. అధికారుల వాదన మరోలా ఉంది. 2022లోగా మురికివాడలన్నీ నిర్మూలించి పేదలకు ఇళ్లు కట్టిస్తామంటున్నారు. నగరాన్ని స్మార్ట్‌ సిటీగా చేస్తామంటూ గొప్పలు చెబుతున్న పాలకులు.. మురికి వాడల్లో మౌలిక వసతులు కల్పించాలని ప్రజలు కోరుతున్నారు.

 

06:27 - April 9, 2017

విజయవాడ : ఆర్ధిక నేరగాడు చట్టాలు, రాజ్యాంగం గురించి మాట్లాడుతున్నారంటూ జగన్‌పై ఏపీ సీఎం చంద్రబాబు తీవ్ర స్థాయిలో మండిపడ్డారు. ఏమాత్రం విలువలు పాటించని జగన్‌... చట్టాలు, రాజ్యాంగం గురించి మాట్లాడటం విడ్డూరంగా ఉందన్నారు. పార్టీ ఫిరాయింపులకు వ్యతిరేకంగా జగన్‌ ఢిల్లీలో రాజకీయపక్షాల మద్దతు కూడగట్టడాన్ని ఆయన వ్యతిరేకించారు. డొల్ల కంపెనీల్లో పెట్టుబడులు పెట్టినట్టు ఈడీ చేసిన ట్వీట్‌కు జగన్‌ సమాధానం చెప్పాలని చంద్రబాబు డిమాండ్‌ చేశారు. విశాఖ పర్యటనలో ఏపీ సీఎం చంద్రబాబు బిజీబిజీగా గడిపారు. ప్రత్యేక విమానంలో విశాఖలోని ఐఎన్‌ఎస్‌ డేగాకు చేరుకున్నారు. భారత నౌకాదళ సేవల ఉంచి ఉపసంహరించిన యుద్ధ విమానం టీయూ 142 ఎంకు చంద్రబాబు ఘనంగా స్వాగతం పలికారు. విమాన సిబ్బందికి పుష్పగుచ్చాలు అందించి అభినందనలు తెలిపారు. ఏఎన్‌-32 విమాన ప్రమాద బాధిత కుటుంబాలకు 5 లక్షల చొప్పున చెక్కులు పంపిణీ చేశారు.

సింహాచలం..
అక్కడి నుంచి చంద్రబాబు నేరుగా సింహాచలంలోని అప్పన్న స్వామి ఆలయానికి వెళ్లారు. అక్కడి గోశాలలో సోలార్‌ విద్యుత్‌ కేంద్రాన్ని చంద్రబాబు ప్రారంభించారు. కల్యాణ మండపం, సత్రాలు, డార్మిటరీల నిర్మాణానికి ఆయన శంకుస్థాపన చేశారు. ఈ సందర్భంగా మాట్లాడిన చంద్రబాబు.... వైసీపీ అధ్యక్షుడు జగన్‌మోహన్‌రెడ్డిపై తీవ్ర స్థాయిలో మండిపడ్డారు. మొదటి సారి పార్టీ ఫిరాయింపులపై చంద్రబాబు పెదవి విప్పారు. ఇతర పార్టీ వాళ్లను జగన్‌ ఎప్పుడూ చేర్చుకోలేదా అంటూ ఆగ్రహం వ్యక్తం చేశారు. వైఎస్‌ సీఎంగా ఉన్నప్పుడు తమ పార్టీని వారిని కాంగ్రెస్‌లో చేర్చుకున్నారని.. జగన్‌ అప్పుడు ఎందుకు మాట్లాడలేదని ప్రశ్నించారు. ఒక ఆర్ధిక నేరస్తుడు చట్టాలు, రాజ్యాంగం గురించి మాట్లాడటం హాస్యాస్పదంగా ఉందని ఎద్దేవా చేశారు. నాడు మాపార్టీ నేతలను చేర్చుకుని జగన్‌ ఆనందపడిపోయారు.. ఇప్పుడు టీడీపీలో వైసీపీ నేతలు చేరితే మాత్రం గగ్గోలు పెడుతున్నారని విమర్శించారు. విలువలు అనేవి స్వతహాగా పాటించి ఇతరులకు చెబితే బాగుంటాయని చంద్రబాబు హితవు పలికారు.

కఠినంగా వ్యవహరిస్తా..
మంత్రివర్గ విస్తరణపైనా చంద్రబాబు స్పందించారు. రాష్ట్ర విస్తృత ప్రయోజనాల దృష్ట్యా మంత్రివర్గ విస్తరణ చేశానని చెప్పారు. పార్టీ క్రమశిక్షణ తప్పితే కఠిన చర్యలు తప్పవని అసంతృప్త నేతలను ఆయన హెచ్చరించారు. తాను ఎంత సున్నితంగా ఉంటానో... తేడా వస్తే అంతే కఠినంగా వ్యవహరిస్తారని హెచ్చరించారు. రాజకీయాలను పక్కనబెట్టి తాను పూర్తిగా రాష్ట్రాభివృద్ధిపైనే దృష్టి సారించినట్టు చెప్పుకొచ్చారు చంద్రబాబు.

21:22 - April 8, 2017

విశాఖ : పార్టీ ఫిరాయింపులపై ముఖ్యమంత్రి చంద్రబాబునాయుడు తొలిసారిగా నోరుమెదిపారు. జగన్ తీరు భరించలేని నేతలు టీడీపీలోకి వచ్చారన్నారు. ఆయన విశాఖ లో మాట్లాడుతూ... గతంలో ఫిరాయింపులపై తాను ఫిర్యాదుచేసిన మాట వాస్తవమే కాని అప్పటి పరిస్థితులు.. ఇప్పటి పరిస్థితులకు చాలా తేడా ఉందన్నారు. వైఎస్ హయాంలో ఫిరాయింపులను ప్రోత్సహించలేదా.. ప్రతి సంవత్సరం తన కుటుంబం యొక్క ఆస్తులను వెల్లడిస్తున్నామని.. జగన్‌కు తన ఆస్తులను వెల్లడించే దమ్ముందా అని ప్రశ్నించారు. రాష్ట్రాభివృద్ధికి జగన్ అడ్డుపడుతున్నారని విమర్శించారు.

 

18:36 - April 8, 2017

విశాఖ :29 సంవత్సరాల పాటు దేశానికి సేవలు అందించిన భారత నౌకదళ విమానం టీయూ-142 ఎం సేవలు నిలిచిపోనున్నాయి. ఈ విమానాన్ని విశాఖలో మ్యూజియంగా ఏర్పాటుచేయనున్నారు. ఈ సందర్భంగా వైజాగ్ లోని నేవీ స్తావరానికి వచ్చిన టీయూ-142 ఎం విమానంకు సీఎం చంద్రబాబు ఘనస్వాగతం పలికారు. ఈ కార్యక్రమంలో ఏఎన్‌-32 విమానప్రమాద బాధిత కుటుంబాలకు 5లక్షల చెక్కులను చంద్రబాబు అందజేశారు.

07:09 - April 6, 2017

విశాఖపట్టణం : ఎగిసిపడే కెరటాలను చూస్తే ఆనందం... లయగా వచ్చే అలల ఘోషను వింటే ఆహ్లాదం. అలతో పాటు ఎగిరిగంతేయాలనే తాపత్రయం. కాని ఆ ఆనందం వెనుక.. ఆ ఆహ్లాదం వెనుక మృత్యుగీతం వినిపిస్తోంది. మధురానుభూతులకు బదులు చేదు జ్ఞాపకాలను మిగులుస్తోంది. సువిశాల సాగర తీరం విశాఖ సిగలో మణిమకుటం. ఎగసిపడే పాల నురగల్లాంటి అలలు..తీరానికి దూసుకొచ్చే కెరటాలు.. ఇలా సముద్ర సొబగులు పర్యాటకులను కట్టిపడేస్తాయి. ఈ ఆనందమంతా నాణానికి ఒక వైపు మాత్రమే. రెండో వైపు అంతా విషాదం. తల్లుల కడుపుకోత..కన్నహృదయాల తీరని వేదన. ఆహ్లాదకర అలల ఘోష వినిపించిన చోటే మృత్యు ఘోష వినిపిస్తోంది. విశాఖ బీచ్‌ ప్రమాదాలకు నెలవుగా మారింది. నిత్యం ఎవరో ఒకరిని సాగర తీరం బలి తీసుకుంటోంది. ఏడాదికేడాది బీచ్‌లో మరణాల సంఖ్య పెరుగుతోంది. గడచిన ఆరేళ్లలో బీచ్‌లో 180 ప్రమాదాలు జరిగితే 215 మంది ప్రాణాలు కోల్పోయారు.

2011లో 36 ప్రమాదాలు 39 మంది మృత్యువాత
2012లో 30 ప్రమాదాలు 37 మంది మృత్యువాత
2013లో 33 ప్రమాదాలు 39 మంది మృత్యువాత
2014లో 43 ప్రమాదాలు 45 మంది మృత్యువాత
2015లో 28 ప్రమాదాలు 35 మంది మృత్యువాత
2016లో 10 ప్రమాదాలు 20 మంది మృతి

30 కిలో.మీటర్లు..
విశాఖ సాగర తీరం 30 కిలోమీటర్ల మేర విస్తరించి ఉంది. ఎవరు ఎక్కడ బీచ్‌లో ఆడుకోవడానికి దిగుతున్నారో తెలియని పరిస్థితి. ముఖ్యంగా యువత ఎవరూ లేని ప్రదేశాన్ని ఎంచుకుంటోంది. దీంతో అక్కడ ఏ ప్రమాదం జరిగినా ఇతరులకు తెలియని పరిస్థితి. తాజాగా జరిగిన ప్రమాదంలో కూడా ఇదే జరిగింది. విశాలాక్షి నగర్‌ తీరంలో సరదాగా గడిపేందుకు వచ్చిన ఇంటర్‌ విద్యార్థులు పోటోలు దిగుతుండగా అలల ధాటికి ఇద్దరు సముద్రంలోకి కొట్టుకుపోయారు. గల్లంతైన అమృత, కల్యాణ్‌ల కోసం గాలింపు చర్యలు ముమ్మరం చేయగా.. కొన్ని గంటల తర్వాత అమృత మృతదేహం తీరానికి కొట్టుకొచ్చింది. కల్యాణ్‌ ఆచూకీ ఇప్పటికీ లభ్యం కాలేదు.

రిప్ కరెంటు..
విశాఖ బీచ్‌లో తరచూ రిప్‌ కరెంటు ప్రవాహం కనిపిస్తోందని అధ్యాయనాలు చెబుతున్నాయి. రిప్ కరెంటనేది కెరటాలతో సంబంధం లేనిది. ఇది రెండు పక్కల నుంచి వచ్చి మధ్యలో నుంచి లోపలికి తిరిగి వెళ్లే ఓ ప్రవాహం. ఈ సమయంలో ఆ మధ్యలో ఉన్న వారంతా ఎంత తీరానికి సమీపానున్నా సరే కొట్టుకుపోతారు. గజ ఈతగాళ్లు సైతం దాని నుంచి బయటపడటానికి గిజగిజలాడుతారు. అమెరికా వంటి దేశాల్లో ఎన్ని జాగ్రత్తలు తీసుకున్నా ఏటా వందలమంది ఈ రిప్‌ కరెంటులో చిక్కుకొని ప్రాణాలు కోల్పోతున్నారు. విదేశీ బీచ్‌లలో ఈ రిప్‌ కరెంటు గురించి అధ్యయనాలు, ఎప్పటికప్పడు బీచ్‌లో పబ్లిక్ అడ్రస్‌సిస్టంలో హెచ్చరికలు వంటివి ఉంటాయి. లైఫ్‌ బోట్లు, లైఫ్‌ జాకెట్లు ధరించిన లైఫ్‌ గార్డులు సిద్ధంగా ఉండి బైనాక్యులర్స్‌తో పరిశీలిస్తూ ఎవరన్నా మునిగిపోతుంటే తక్షణమే పరుగెత్తుకెళ్లి రక్షిస్తారు. ఈ ఏర్పాట్లేవి విశాఖ బీచ్‌లో లేవు. కళ్ల ముందే బీచ్‌లో స్నానానికని వెళ్లి మృత్యుఒడిలోకి చేరుతున్న వారి సంఖ్య నానాటికీ పెరుగుతుండడం ఆందోళన కలిగిస్తోంది.

10:37 - April 3, 2017

హైదరాబాద్ : మాజీ మంత్రి బండారు సత్యనారాయణ ఇంకా అజ్ఞాతంలోనే ఉన్నారు. ఆదివారం గన్ మెన్, పీఏలను సత్యనారాయణ వెనక్కి పంపి, వెళ్లిపోయారు. మంత్రివర్గ విస్తరణ జరిగినప్పటి నుంచీ బండారు కనిపించకుండా వెళ్లిపోయారు. కుటుంబ సభ్యులకు కూడా ఆయన ఆచూకీ తెలియదు. బండారు ఆచూకీ తెలపాలంటూ కార్యకర్తలు ఆందోళన కొనసాగిస్తున్నారు. మరిన్ని వివరాలను వీడియోలో చూద్దాం...

07:40 - April 3, 2017

విశాఖ : జిల్లా కేంద్రంలో అల్లూరి సీతారామరాజు విజ్ఞాన కేంద్రానికి సీపీఎం పోలిట్ బ్యూరో సభ్యులు బీవీ రాఘవులు శంకుస్థాపన చేశారు. ప్రగతివాద శక్తులు, బలహీన వర్గాలకు విజ్ఞానాన్ని అందించడాకి ఈ కేంద్రం ఉపయోగపడాలని ఆయన అకాంక్షించారు. ఈ కార్యక్రమంలో సీపీఎం రాష్ర్ట కార్యదర్శి మధుతో పాటు జిల్లాకు చెందిన మేధావులు పాల్గొన్నారు.  హైదరాబాద్‌లోని సుందరయ్య విజ్ణాన కేంద్రం ఎన్నో గొంతుకులకు వేదిక అవుతుందని.. అలాగే ఈ సీతారామరాజు విజ్ఞాన కేంద్రం కూడా వేదిక అవ్వాలని మధు అభిప్రాయపడ్డారు. 

 

21:41 - April 2, 2017

విశాఖ : పార్టీ ఫిరాయింపులను ఏపీ సీఎం చంద్రబాబు ప్రోత్సహిస్తున్నారని సీపీఎం పొలిట్ బ్యూరో సభ్యులు రాఘవులు విమర్శించారు. ఫిరాయింపుదారులకు మంత్రి పదవులు ఇవ్వడం అప్రజాస్వామికమన్నారు. రాజ్యాంగం పట్ల చంద్రబాబుకు చిత్తశుద్ధి ఉంటే ఫిరాయింపుదారుల చేత రాజీనామా చేయించిన తర్వాత మంత్రి పదవులు ఇచ్చి ఉంటే బాగుండేదని పేర్కొన్నారు. 

 

Pages

Don't Miss

Subscribe to RSS - visakhapatnam