YSRCP

07:39 - December 17, 2018

శ్రీకాకుళం: ముఖ్యమంత్రి చంద్రబాబు నాయుడు రాజకీయాలను భ్రష్టుపట్టిస్తున్నారని వైసీపీ అధినేత జగన్ మోహన్ రెడ్డి మండిపడ్డారు. అనైతిక పొత్తులు పెట్టుకోవడంలో, అనైతిక రాజకీయాలు చేయడంలో చంద్రబాబు దిట్ట అని విమర్శించారు. నందమూరి హరికృష్ణ మృతదేహం పక్కనే పెట్టుకుని టీఆర్ఎస్‌తో చంద్రబాబు పొత్తుకు ప్రయత్నించడం దారుణం అన్నారు. టీఆర్ఎస్‌తో టీడీపీ పొత్తును కేటీఆర్ వ్యతిరేకించడంతోనే.. చంద్రబాబు సిగ్గు లేకుండా కాంగ్రెస్‌తో సీట్ల సర్దుబాటు చేసుకున్నారని ధ్వజమెత్తారు. శ్రీకాకుళం జిల్లాలో ప్రజా సంకల్ప యాత్రలో భాగంగా నరసన్నపేట బహిరగం సభలో జగన్ మాట్లాడారు. చంద్రబాబు తీరుపై తీవ్ర ఆగ్రహం వ్యక్తం చేశారు. చంద్రబాబు ఊసరవెల్లి రాజకీయాలు చేస్తున్నారని మండిపడ్డారు.

12:52 - December 16, 2018

విజయవాడ : ఏపీ సీఎం చంద్రబాబు నాయుడిని బీజేపీ దొంగ దెబ్బ తీయాలని చూస్తోందని...ఈ కుట్రలో జగన్...పవన్..కూడా ఉన్నారని ఏపీ మంత్రి యనమల ఆరోపించారు. డిసెంబర్ 16వ తేదీ ఆదివారం ఆయన మీడియాతో మాట్లాడుతూ...కొత్తగా మజ్లిస్ పార్టీ కుట్రలో భాగమైందని పేర్కొన్న యనమల...సిద్ధాంతపరంగా బీజేపీకి ఎంఐఎం వ్యతిరేకమని...అలాంటి బీజేపీతో అంటకాగే జగన్ కు ఎంఐఎం ఎలా మద్దతిస్తుందని ప్రశ్నించారు. 2019లో బీజేపీ కనుమరుగవుతుందని జోస్యం చెప్పారు. ఏపీ రాష్ట్రంపై బీజేపీ పగబట్టిందని..ఏపీకి న్యాయం జరగాలంటే బీజేపీని ఓడించాలని పిలుపునిచ్చారు. రాష్ట్రానికి కేంద్రం నిధులు విడుదల చేయడం లేదని...పోలవరానికి రూ. 3400 కోట్లు కేంద్రం విడుదల చేయలేదన్నారు. వెనుకబడిన జిల్లాల నిధులు వెనక్కి లాక్కొందని యనమల విమర్శించారు.

22:12 - December 14, 2018

హైదరాబాద్: జగన్ యాత్ర కొనసాగింపుపై పార్టీ సీనియర్లు ఆలోచనలో పడ్డారా...? పరిమితికి మించి కొనసాగుతోందనే భావనలో ఉన్నారా..? ఎన్నికలు సమీపిస్తుండటంతో బ్రేక్‌ ఇస్తే బాగుంటుదని అనుకుంటున్నారా..? పార్టీ సీనియర్ల కోరిక మేరకు జగన్ యాత్రకు బ్రేక్‌ ఇస్తారా...లేదంటే పూర్తి చేస్తారా...?
తెలంగాణలో ఎన్నిక‌ల హ‌డావుడి ముగియ‌డంతో ఇక ఇప్పుడు అంద‌రి దృష్టి ఏపీ ఎన్నిక‌ల‌పై ప‌డింది. రాజ‌కీయ పార్టీల‌న్ని ఎన్నిక‌ల కోసం సిద్ధమ‌వుతున్నాయి. సీఎం చంద్రబాబు అయితే ఓ అడుగు ముందుకేసి ఎన్నిక‌లకు సిద్ధంగా ఉండాలంటూ పార్టీ నేత‌కు ఆదేశిస్తున్నారు. అయితే ప్రతిప‌క్ష పార్టీలో మాత్రం ఆ పరిస్థితి క‌నిపించ‌డం లేదు. అధినేత పాద‌యాత్రలో ఉండ‌డంతో పార్టీలో ఎన్నిక‌ల వాతావ‌ర‌ణం అంత‌గా క‌నిపించ‌డం లేదు. దానికి జ‌గ‌న్ పాద‌యాత్రే కార‌ణం అంటున్నారు పార్టీ సీనియ‌ర్ నేతలు.
గ‌తేడాది న‌వంబ‌ర్‌లో ప్రారంభమైన ప్రజాసంకల్పయాత్ర ఏడాది దాటినా ఇంకా కొన‌సాగుతునే ఉంది. షెడ్యూల్ ప్రకారం మ‌రో నెల రోజుల పాటు పాద‌యాత్ర కొన‌సాగే అవ‌కాశం ఉంది. జ‌గ‌న్ పాద‌యాత్ర వ‌ల్ల పార్టీకి బ‌లం చేకూరినప్పటికి... ప‌రిమితికి మించి పాదయాత్ర కొన‌సాగుతోందనే భావ‌న పార్టీ సీనియ‌ర్లలో వ్యక్తమవుతోంది. ఏడాదిగా పాద‌యాత్రపైనే దృష్టి పెట్టిన జ‌గ‌న్...పార్టీ విష‌యంలోనూ ముఖ్యంగా పార్టీలో చోటు చేసుకుంటున్న విభేదాల విష‌యంలో కాస్త లైట్‌గా ఉన్నార‌ని అభిప్రాయప‌డుతున్నారు.
ఎన్నిక‌లు స‌మీపిస్తున్న నేప‌థ్యంలో పార్టీలో ఉన్న అనేక స‌మ‌స్యల‌ను ప‌రిష్కరించాల్సిన అధినేత పాద‌యాత్రలోనే ఉండిపోవ‌డం వల్ల పార్టీకి తీవ్ర న‌ష్టం వాటిల్లే ప్రమాదముంటుందంటున్నారు పార్టీ సీనియ‌ర్లు. ఆయా నియోజ‌క‌వ‌ర్గాల్లో టికెట్ కోసం ఇద్దరు, ముగ్గురు నేత‌లు పోటీ ప‌డుతున్నారు. దీంతో వారి మ‌ధ్య విభేదాలు తారస్థాయికి చేరుకుంటున్నాయి. వీటితో పాటు జిల్లా స్థాయి నేత‌ల‌కు నియోజ‌క‌వ‌ర్గ ఇంచార్జిల‌కు మ‌ధ్య దూరాలు పార్టీకి ఇబ్బందులు తెచ్చిపెట్టే ప్రమాదం ఉందని అంటున్నారు. ఇక జ‌గ‌న్ పాద‌యాత్రలో ఉండిపోవ‌డంతో పార్టీ కార్యక్రమాల‌ను లైట్‌గా తీసుకుంటున్నారు ఇంచార్జిలు. ఇక జగన్‌ నియోజ‌క‌ర్గ ఇంచార్జిల మార్పుల్లోనూ స‌క్రమంగా వ్యవ‌హ‌రించడం లేదంటూ కొందరు నేత‌లు అసంతృప్తి వ్యక్తం చేస్తున్నారు. నాలుగేళ్లుగా ప‌నిచేసిన ఇంచార్జిలను మార్చే ముందు క‌నీసం అధినేత పిలిచి మాట్లాడి బుజ్జగించే ప్రయ‌త్నం చెయ్యకుండా నేరుగా మార్చడం వంటి నిర్ణయాలు ప‌లు ఇబ్బందుల‌కు దారి తీస్తున్నాయి.
మొత్తంగా ఎన్నిక‌లు స‌మీపిస్తున్న తరుణంలో పార్టీలో చ‌క్కబెట్టాల్సిన అనేక పంచాయితీలు ఉన్నా అధినేత పాద‌యాత్ర అంటూ స‌మ‌యం వృధా చెయ్యడం స‌రికాదంటూ పార్టీలో మెజారిటీ నేత‌లు అభిప్రాయప‌డుతున్నారు. ఇదే  విష‌యాన్ని కొంద‌రు సీనియ‌ర్లు అధినేత‌ దృష్టికి తీసుకువెళ్లిన‌ట్లు స‌మాచారం. అయితే అధినేత మాత్రం జ‌న‌వ‌రి 5న పాద‌యాత్రను ముగించేందుకు నిర్ణయించుకున్నట్లు తెలుస్తోంది. కనీసం అప్పుడైనా ముందుగా పార్టీలో విభేదాల‌కు చెక్ పెట్టాల‌ని పార్టీ నేత‌లు సూచిస్తున్నారు.

21:32 - December 14, 2018

హైదరాబాద్: తెలంగాణలో మహాకూటమి అధికారంలోకి వస్తే.. టీడీపీ భవిష్యత్‌ వెలిగిపోతుందని భావించిన చంద్రబాబుకు షాక్‌లు తగులుతున్నాయి. చంద్రబాబుకు వ్యతిరేకంగా ఏపీలో తాము ప్రచారం చేస్తామని కేసీఆర్‌, అసదుద్దీన్‌లు చెప్పడం సంచలనంగా మారింది. అసద్‌ ప్రకటనతో వైసీపీ నేతలు సంతోషంగా ఉంటే.. అధికార టీడీపీ పార్టీ ఢీలా పడుతోంది.
తెలంగాణ ఎన్నికల ఫలితాలతో ఏపీలో రాజకీయ పరిణామాలు మారిపోతున్నాయి. తెలంగాణలో మహాకూటమి ఓటమితో.. అధికార టీడీపీ పార్టీ డీలాపడితే.. వైసీపీ మాత్రం మంచి సంతోషంగా ఉంది. తాజాగా అసదుద్దీన్‌ జగన్‌ తరపున ప్రచారం చేస్తానని ప్రకటించడంతో వైసీపీ నేతల సంతోషానికి హద్దే లేకుండా పోయింది.
తెలంగాణ ఎన్నికల్లో మహాకూటమి తరపున చంద్రబాబు వచ్చి ప్రచారం చేయడంతో.. రానున్న ఏపీ ఎన్నికల్లో తెలంగాణ నేతలు ప్రచారం చేసేందుకు సిద్ధమవుతున్నారు. అయితే.. వీరంతా టీడీపీ తరపున కాదు.. ప్రతిపక్ష నేత జగన్‌ తరపున ప్రచారం చేస్తామంటున్నారు. ఇప్పుడు ఇదే హాట్‌ టాపిక్‌గా మారింది. తెలంగాణలో చంద్రబాబు ప్రచారం చేసి విఫలమయ్యారు. కానీ.. మేము మాత్రం ఏపీలో ప్రచారం చేసి సక్సెస్‌ అవుతామంటున్నారు అసదుద్దీన్‌ ఓవైసీ.
ఇక జగన్‌కు అసదుద్దీన్‌ మధ్య చాలా కాలంగా స్నేహం ఉంది. వైఎస్‌ హయాం నుండి ఇద్దరి మధ్య మంచి సంబంధాలున్నాయి. వైఎస్‌ సీఎంగా ఉన్నప్పుడు దేశంలో ఎక్కడాలేని విధంగా ముస్లింలకు నాలుగు శాతం రిజర్వేషన్లు ఇచ్చారు. అప్పటినుండి వైఎస్‌ కుటుంబంతో ఓవైసీకి స్నేహబంధం మరింత బలపడింది. అక్బరుద్దీన్‌పై దాడి జరిగిన సమయంలో జగన్‌ పరామర్శించగా... ఇటీవల జగన్‌పై దాడి జరిగిన నేపథ్యంలో అసద్‌ పరామర్శించారు.
అసదుద్దీన్‌ వ్యాఖ్యలతో వైసీపీ నేతలు మంచి హుషారుగా ఉన్నారు. ప్రజాస్వామ్యంలో ఎవరైనా, ఎక్కడికైనా వెళ్లి ప్రచారం చేయొచ్చు అంటున్నారు. ఓవైసీ వైసీపీ తరపున ప్రచారం చేస్తే మంచిదే అంటున్నారు వైసీపీ నేతలు.
మొత్తానికి ఏపీలో ప్రచారం చేస్తానన్న ఓవైసీ వ్యాఖ్యలతో రాజకీయ వాతావరణం హీటెక్కింది. మరి నిజంగానే ఓవైసీ ఏపీలో ప్రచారం చేస్తారా ? ఓవైసీ ప్రచారం చేస్తే వైసీపీకి కలిసి వస్తుందా ? అనేది ఇప్పుడు హాట్‌ టాపిక్‌గా మారింది.

20:39 - December 14, 2018

హైదరాబాద్: ఎన్నికలకు 6 నెలల ముందే ఏపీ రాజకీయాలు వేడెక్కాయి. తెలంగాణ ఎన్నికల ఫలితాలు, ముఖ్యమంత్రి కేసీఆర్ వ్యాఖ్యలు ఏపీ రాజకీయాలపై ప్రభావం చూపాయి. ఏపీ రాజకీయాల్లోనూ వేలు పెడతామని కేసీఆర్ చేసిన వ్యాఖ్యలు దుమారం రేపుతున్నాయి. కేసీఆర్ వ్యాఖ్యల ఆధారంగా ప్రతిపక్షం వైఎస్ఆర్ కాంగ్రెస్ పార్టీని తెలుగుదేశం పార్టీ టార్గెట్ చేసింది. కేసీఆర్, జగన్ ఒకటే అని ఆరోపణలు గుప్పించింది. టీఆర్ఎస్ విజయంపై వైసీపీ సంబరాలు అందుకే అని విమర్శలు చేసింది. ఏపీకి ప్రత్యేక హోదా రాకుండా అడ్డుపడుతున్న కేసీఆర్‌తో ఎలా జతకడతారు? అని ప్రశ్నిస్తూ సెంటిమెంట్‌ను రగిల్చే ప్రయత్నం చేసింది.
ఏపీ సీఎం, మంత్రుల మాటల దాడులతో ఉక్కిరిబిక్కిరవుతున్న వైసీపీ.. ఎట్టకేలకు స్పందించింది. తెలుగుదేశం పార్టీ ఆరోపణలపై వైసీపీ నాయకులు ఎదురుదాడికి దిగారు. టీఆర్‌ఎస్‌ను, కేసీఆర్‌ను నెత్తిన పెట్టుకోవాలని చూసింది మీరేనంటూ టీడీపీ నేతలపై బొత్స సత్యనారాయణ ఫైర్ అయ్యారు. కేసీఆర్‌-బాబు లాలూచీ పడకుండా ఉంటే వేరుగా ఉండేదని అన్నారు. ఇవేమీ తెలియకుండా టీడీపీ మంత్రులు అనవసరంగా మాట్లాడుతున్నారని మండిపడ్డారు. తమకు రాష్ట్ర ప్రయోజనాలే ముఖ్యమని, తామెవరితోనూ పొత్తుపెట్టుకునే ప్రసక్తే లేదని బొత్స స్పష్టం చేశారు.

14:45 - December 4, 2018

విశాఖ: ఏపీ ముఖ్యమంత్రి చంద్రబాబు నాయుడుపై వైఎస్ఆర్ కాంగ్రెస్ పార్టీ ఎంపీ విజయసాయి రెడ్డి తీవ్ర ఆరోపనలు చేశారు. ముఖ్యమంత్రి చంద్రబాబు తెలంగాణ ఎన్నికలకు ఫండింగ్ చేస్తున్నారని విజయసాయి రెడ్డి ఆరోపించారు. కర్నాటక ఎన్నికల మాదిరిగా ఒక్కో నియోజకవర్గానికి రూ.10కోట్ల చొప్పున.. మొత్తం 1200 కోట్ల రూపాయలను చంద్రబాబు ఫండింగ్ చేస్తున్నారని, టీడీపీ ఎంపీలకు చెందిన బస్సుల్లో ఆ డబ్బు తరలించారని విజయసాయి రెడ్డి చెప్పారు. తెలుగుదేశం, కాంగ్రెస్ పార్టీల మధ్య ఉన్న సంబంధాల దృష్ట్యా రాబోయే సార్వత్రిక ఎన్నికల్లో ఖర్చు కోసం తన జాతీయ వాటా కింద రాహుల్‌గాంధీకి చంద్రబాబు రూ.5వేల కోట్లు ఇవ్వనున్నారని పేర్కొన్నారు. ఇక ముందస్తు ప్రణాళిక ప్రకారమే రేవంత్‌రెడ్డిని చంద్రబాబు కాంగ్రెస్‌లోకి పంపించారని ఆరోపణలు చేశారు.

18:59 - November 25, 2018

శ్రీకాకుళం: ప్రజా సమస్యలు తెలుసుకునేందుకు, నేనున్నానే భరోసా ఇచ్చేందుకు వైఎస్ఆర్ కాంగ్రెస్ పార్టీ అధినేత జగన్‌మోహన్‌రెడ్డి చేపట్టిన పాదయాత్ర చివరి అంకానికి చేరుకుంది. 12 జిల్లాలను పూర్తి చేసుకుని... చివరి జిల్లా అయిన శ్రీకాకుళం జిల్లాలోకి జగన్ ప్రజాసంకల్ప యాత్ర ప్రవేశించింది. విజయనగరం జిల్లాలో పాదయాత్ర పూర్తి చేసుకున్న జగన్ సిక్కోలు జిల్లాలోకి ప్రవేశించారు. ఆదివారం(నవంబర్ 25) మధ్యాహ్నం పాలకొండ నియోజకవర్గంలోని వీరఘట్టం మండలం కెల్ల గ్రామం వద్ద అశేష జనసందోహం మధ్య జగన్ శ్రీకాకుళం జిల్లాలోకి అడుగుపెట్టారు. ఈ సందర్భంగా జగన్‌కు పార్టీ నేతలు, కార్యకర్తలు ఘన స్వాగతం పలికారు. జిల్లాలోని 10 నియోజకవర్గాల్లో జగన్ పాదయాత్ర కొనసాగనుంది.
జగన్ చేపట్టిన ప్రజా సంకల్ప యాత్ర ఆదివారంతో(నవంబర్ 25) 305 రోజుకు చేరుకుంది. ఇప్పటివరకు ఆయన 3300 కిలోమీటర్లకు పైగా నడిచారు. రాయలసీమ నుంచి ప్రారంభమైన పాదయాత్ర 12 జిల్లాల మీదుగా శ్రీకాకుళం జిల్లాకు చేరుకుంది. గత నెలలో విశాఖ విమానాశ్రయంలో జగన్‌పై జరిగిన దాడి కలకలం రేపిన సంగతి తెలిసిందే. దాడి కారణంగా జగన్ కొద్దిరోజులు విశ్రాంతి తీసుకున్నారు.

10:31 - November 21, 2018

విజయనగరం: సొంతిల్లు అనేది కల.. జీవితాంతం కష్టపడితే కానీ ఓ ఇంటి వారు కాలేరు. దీనికి కూడా లక్షలకు లక్షలు అప్పు తీసుకోవాలి.. ప్రతినెలా వేలకు వేలు వడ్డీలు కట్టాలి. ఇది కామన్. ఈ సిస్టమ్ మారుస్తానంటూ హామీ ఇస్తున్నారు వైఎస్ఆర్ కాంగ్రెస్ అధినేత జగన్. విజయనగరం జిల్లా కురుపాం ప్రజా సంకల్ప యాత్రలో వైఎస్ జగన్ మాట్లాడారు. ఊహించని హామీ ఇచ్చారు. పేదలు అందరికీ ఉచితంగా ఇల్లు కట్టించి ఇస్తామని ప్రకటించారు. ఫ్రీగా ఇచ్చే ఆ ఇంటిని ఇంట్లోని తల్లి లేదా భార్య పేరుతో రిజిస్ట్రర్ చేయించి ఇస్తామని వెల్లడించారు. 
ఉచిత ఇల్లుపై బ్యాంక్ అప్పు కూడా :
 అధికారంలోకి వస్తే ఉచితంగా కట్టించి ఇచ్చే ఇల్లుపై బ్యాంక్ అప్పు కూడా వచ్చే విధంగా చూస్తామన్నారు. అత్యవసరంగా డబ్బు అవసరం అయితే బ్యాంకులో తాకట్టు పెట్టి డబ్బు తీసుకోవచ్చన్నారు. అలా తీసుకునే అప్పుపై కేవలం 25పైసలు (పావలా) మాత్రమే వడ్డీ వసూలు చేసే విధంగా ప్రభుత్వం సాయం చేస్తుందని హామీ ఇచ్చారు జగన్. ఇల్లు కట్టించి ఇవ్వటమే కాకుండా ఆ ఇంటిపై అప్పు తీసుకోవటం, దానికి కేవలం పావలా వడ్డీ స్కీమ్ తీసుకురావటం జరుగుతుందన్నారు. దీనిపై అత్యవసర సమయంలో వ్యాపారుల నుంచి అధిక వడ్డీలకు అప్పు తీసుకుని.. కట్టలేని దుర్భర స్థితి ఉండదన్నారు. 2019లో దేవుడు దయతలచి మనందరి ప్రభుత్వం అధికారంలోకి వస్తే అమలు చేస్తానని ప్రకటించారు. ఏపీ రాష్ట్ర వ్యాప్తంగా 25 లక్షల ఇళ్లను ఈ విధంగా నిర్మించి ఇవ్వటం జరుగుతుందన్నారు.

09:35 - November 21, 2018

నెల్లూరు: టీడీపీ ధర్మ పోరాట దీక్షలో ముఖ్యమంత్రి చంద్రబాబు నాయుడు ప్రతిపక్షాలపై ఫైర్ అయ్యారు. వైసీపీ, జనసేనలపై విరుచుకుపడ్డారు. తెలంగాణలో జరగనున్న అసెంబ్లీ ఎన్నికల్లో ఆ రెండు పార్టీలు పోటీ చేయకపోవడం వెనక చాలా కథ ఉందని చంద్రబాబు అన్నారు. టీఆర్ఎస్‌తో ఒప్పందం కారణంగానే వారు బరిలోకి దిగలేదని, లాలూచీ రాజకీయాలకు ఇంతకంటే వేరే నిదర్శనం అవసరం లేదని చంద్రబాబు వ్యాఖ్యానించారు.
ప్రధాని మోడీపైనా చంద్రబాబు నిప్పులు చెరిగారు. బీజేపీ అవినీతిని పెంచి పోషిస్తోందన్నారు. సీబీఐని గుజరాత్‌కు చెందిన ఆస్తానా భ్రష్టుపట్టించారని, దోవల్ కూడా ఈ వ్యవహారంలో ఉన్నారంటే నమ్మబుద్ధి కావడం లేదన్నారు. పెద్ద నోట్ల రద్దుతో దేశంలో పరిస్థితి దారుణంగా తయారైందని, రూపాయి విలువ పడిపోయిందని వాపోయారు. మోడీ వల్ల దేశానికి ఎటువంటి ఉపయోగం లేకుండా పోయిందని చంద్రబాబు విమర్శించారు.
దేశం కోసమే తాను 40 ఏళ్ల రాజకీయ విభేదాలను సైతం పక్కనపెట్టి కాంగ్రెస్‌కు దగ్గరైనట్టు చంద్రబాబు చెప్పుకొచ్చారు. 40ఏళ్లుగా తనను ఆదరిస్తున్న తెలుగు ప్రజల కోసం, రాష్ట్రాభివృద్ధి కోసం నిరంతరం శ్రమిస్తున్నట్టు చంద్రబాబు పేర్కొన్నారు. ప్రజలకు అన్యాయం జరగకుండా చూడాలని ఎంత ప్రయత్నం చేసినా ప్రధాని మోడీ నమ్మించి నట్టేట ముంచారని… అందుకే కేంద్రం నుంచి బయటకొచ్చేశామని చంద్రబాబు వివరించారు. కేంద్రంపై యుద్ధం ప్రకటించామని, ఆ దిశగానే నేరుగా పోరాటం చేస్తున్నానని వెల్లడించారు.
అయితే రాష్ట్రంలోని ప్రతిపక్ష పార్టీలైన వైసీపీ, జనసేనలు లాలూచీ రాజకీయాలు చేస్తూ తెలుగుదేశం పార్టీని ఇబ్బంది పెట్టాలని చూస్తున్నాయని చంద్రబాబు ఆరోపించారు. అందుకు ఢిల్లి వేదికగా మోడీ దత్త పుత్రులు జగన్‌, పవన్‌లు రాష్ట్రంలో రాజకీయ డ్రామాలు ఆడుతున్నారని ధ్వజమెత్తారు. అసలు నిజంగా రాష్ట్ర ప్రయోజనాలు ఆశిస్తుంటే మోడీ చేసిన అన్యాయంపై జగన్, పవన్ ఎందుకు మాట్లాడడం లేదని చంద్రబాబు ప్రశ్నించారు. తెలంగాణలో కూడా తెలుగు ప్రజలే ఉన్నారని, వారి శ్రేయస్సు కోసం, ఆ ప్రాంత అభివృద్ధి కోసం తెలంగాణ పార్టీ వ్యతిరేక కూటమిని ఏర్పాటుచేసి కేసీఆర్‌ను గద్దె దించేందుకు తాను అడుగులు వేస్తున్నానని చంద్రబాబు పేర్కొన్నారు. అయితే జగన్‌, పవన్‌లు అసలు తెలంగాణలో పోటీ చేయకపోవడం లాలూచీ రాజకీయాలకు నిదర్శనం అన్నారు.

08:31 - November 19, 2018

అమరావతి: తెలుగుదేశం పార్టీని, చంద్రబాబు ప్రభుత్వాన్ని టార్గెట్ చేస్తున్న జనసేన అధినేత పవన్ కల్యాణ్‌పై టీడీపీ నేతలు ఎదురుదాడికి దిగారు. ఏపీ మంత్రి కళా వెంకట్రావు పవన్‌పై సంచలన ఆరోపణలు చేశారు. విశాఖపట్నంలో యలమంచిలి రవి ఇంట్లో జగన్‌తో రహస్యంగా సమావేశం కావడం, 2014 ఎన్నికల్లో పోటీ చేసేందుకు జగన్‌ని 40 సీట్లు డిమాండ్ చేయడం నిజం కాదా అని పవన్‌ను ప్రశ్నించారు మంత్రి కళా వెంకట్రావు. 2009 ఎన్నికల్లో తన సోదరుడు, మెగాస్టార్ చిరంజీవిని గెలిపించుకోలేని పవన్, గత అసెంబ్లీ ఎన్నికల్లో టీడీపీని గెలిపించానని ప్రచారం చేసుకోవడం విడ్డూరంగా ఉందన్నారాయన. 
ఏపీ ప్రజలను నమ్మించి నట్టేట ముంచిన ప్రధాని నరేంద్ర మోడీ, బీజేపీ జాతీయ అధ్యక్షుడు అమిత్ షాల నిరంకుశ పాలనకు పవన్ వంత పాడుతున్నారని  మంత్రి కళా వెంకట్రావు మండిపడ్డారు. ఎన్నికల నేపథ్యంలో పవన్ చేసిన వ్యవహారాలపై సైతం ఆయన ధ్వజమెత్తారు. ఈ మేరకు పవన్‌కు మంత్రి కళా వెంకట్రావు 19 ప్రశ్నలతో బహిరంగ లేఖను సంధించారు. 
ఆంధ్రప్రదేశ్ ప్రజల కోసం పవన్ ఏనాడూ నిజాయతీ, నిబద్ధతతో పనిచేయలేదని కళా వెంకట్రావు విమర్శించారు. బీజేపీ హిందుత్వ పార్టీ కాదని పవన్ కల్యాణ్ చెప్పడాన్ని లేఖలో మంత్రి తప్పుపట్టారు. ఏపీకి రూ.75వేల కోట్లు రావాలన్న నిజనిర్ధారణ కమిటీ నివేదికపై పవన్ ఎందుకు మౌనం వహిస్తున్నారని ప్రశ్నించారు.  కల్యాణ్ రహస్యంగా సమావేశం అయ్యారని ఆరోపించారు. జనసేన పోరాటయాత్ర పేరుతో ఏసీ బోగీల్లో కూర్చున్న పవన్ సామాన్యులను ఎలా కలవగలిగారో చెప్పాలన్నారు.
బాక్సైట్ సహా ఇతర గనులకు మాజీ సీఎం దివంగత వైఎస్ రాజశేఖరరెడ్డి హయాంలోనే అనుమతులు వచ్చాయని తెలిసినా పవన్ మౌనం వహించారని విమర్శించారు. ప్రసంగాల్లో పరుష పదజాలం వాడుతూ యువతకు ఏం సందేశం ఇవ్వదలచుకున్నారని ప్రశ్నించారు. రాఫెల్ యుద్ధ విమానాల కొనుగోలు ఒప్పందం, జీఎస్టీ, పెద్దనోట్ల రద్దు, సీబీఐతో వేధింపులు, ఐటీ దాడులపై పవన్ స్పందించాలని ఆయన డిమాండ్ చేశారు. ఎలా కలిశారో చెప్పాలన్నారు. సుప్రీంకోర్టు వ్యవహారంలో, గవర్నర్‌ వ్యవస్థలపై కేంద్ర ప్రభుత్వం అధికార దుర్వినియోగాన్ని ప్రశ్నిస్తే బాగుంటుందని బహిరంగ లేఖలో పవన్‌కు మంత్రి కళా వెంకట్రావు సూచించారు. రాష్ట్రంలోని యువత, బడుగుబలహీన వర్గాల సంక్షేమం కోసం పాటుపడుతున్న సీఎం చంద్రబాబుపై పవన్ విమర్శలు చేయడం దారుణమని కళా వెంకట్రావు అన్నారు.

Pages

Don't Miss

Subscribe to RSS - YSRCP