APSRTC: ఆర్టీసీ ఉద్యోగులకు గుడ్ న్యూస్.. ‘కార్పొరేట్ శాలరీ ప్యాకేజీ’ ప్రకటన!

APSRTC: ఏపీఎస్ ఆర్టీసీ ఉద్యోగుల విషయంలో ఏపీ సర్కార్ మరో కీలక నిర్ణయం తీసుకుంది. ఆర్టీసీ ఉద్యోగులను ఇప్పటికే ప్రభుత్వంలో విలీనం చేసిన జగన్ ప్రభుత్వం తాజాగా మరో తీపి కబురు అందించింది. ఆర్టీసీ ఉద్యోగుల బీమాకు సంబంధించి ‘కార్పొరేట్‌ శాలరీ ప్యాకేజీ’ని ప్రకటించింది. ఇందులో ఉచిత ప్రమాద బీమా, శాశ్వత అంగవైకల్యం, సహజ మరణం సంభవించినప్పుడు ఆర్టీసీ ఉద్యోగులను ఆర్థికంగా ఆదుకునేందుకు భారీ పరిహారంతో ప్యాకేజీని ప్రవేశపెట్టడంతో పాటు మరణించిన ఉద్యోగుల పిల్లల విద్యారుణాలు, ఆడపిల్లల వివాహ రుణాల మాఫీ కూడా కల్పించనున్నారు.

ఇప్పటి వరకు రాష్ట్రంలో పోలీసు శాఖలో ఈ తరహా ‘కార్పొరేట్‌ శాలరీ ప్యాకేజీ’ని అమలు చేస్తుండగా.. ఇప్పుడు ఆర్టీసీ ఉద్యోగులకు కూడా కల్పించింది. ఇందుకోసం ఆర్టీసీ తమ ఉద్యోగులకు జీతాలను చెల్లించే ఖాతాలు కలిగిన స్టేట్ బ్యాంక్‌ ఆఫ్‌ ఇండియా (SBI)తో ఒప్పందం కుదుర్చుకుంది. త్వరలోనే ప్రభుత్వం దీనిపై మరింత విపులంగా విధివిధానాలను రూపకల్పన చేయనుంది. ఈ కార్పొరేట్ శాలరీ ప్యాకేజీతో రాష్ట్రంలో 50 వేల 500 మంది ఆర్టీసీ ఉద్యోగులకు ప్రయోజనం కలగనుంది.

ఇప్పటి వరకు ఆర్టీసీ ఉద్యోగి విధి నిర్వహణలో ప్రమాదవశాత్తు చనిపోతే ఆ కుటుంబానికి రూ.30 లక్షలు పరిహారం ఇచ్చేవారు. కార్పొరేట్ శాలరీ ప్యాకేజీ అమలుతో ఇప్పుడు రూ.10 లక్షలు పెంచి రూ.40 లక్షల పరిహారం చెల్లిస్తారు. ప్రమాదంలో గాయపడి శాశ్వత వైకల్యానికి గురైతే రూ.30 లక్షల పరిహారం చెల్లించనున్నారు. ఉద్యోగుల పిల్లల పేరిట రూ.5 లక్షల విద్యారుణాలు, ఆడపిల్లల వివాహాల కోసం చేసిన రూ.2 లక్షల వరకు రుణాలను మాఫీ చేయనుండగా వీటికి ఎలాంటి ప్రీమియం చెల్లించాల్సిన అవసరం లేదు. ఉద్యోగి సహజ మరణానికి రూ.5 లక్షల బీమా పరిహారం చెల్లించనుండగా ఇందుకు ఉద్యోగి నెలకు రూ.200 బీమా ప్రీమియం చెల్లించాల్సి ఉంటుంది.