వినాయక చవితి పూజ.. 21 రకాల ఆకులు ఏంటీ ? వీటి విశేషాలు

Ganesh Chaturthi 2020 Puja Samagri : వినాయక చవితి పండుగ వచ్చేసింది. విఘ్నేశ్వరుడిని పూజించేందుకు భక్తులు రెడీ అయిపోతున్నారు. ప్రస్తుతం కరోనా నేపథ్యంలో..ఈసారి మంటపాలు ఏర్పాటు చేయడం లేదు. ఇంట్లోనే పూజలు నిర్వహించాలని అధికారులు సూచించారు. మార్కెట్ లకు బయలుదేరుతున్నారు.

వినాయక విగ్రహంతో పాటు పూజకు కావాల్సిన సామాగ్రీని కొనుగోలు చేస్తున్నారు. పూజలో 21 రకాల ఆకులను ఉపయోగిస్తుంటారు. ఈ పత్రాలు ప్రధానమైనవి. వాటి విశేషాలు..

1. మాచీ పత్రం : మాచీ పత్రి అనేది తెలుగు పేరు. చేమంతి జాతికి చెందిన దీని ఆకులు సువాసనా భరితంగా ఉంటాయి. చేమంతి ఆకుల మాదిరే ఉంటాయి.
2. దూర్వా పత్రం : దూర్వా పత్రం అంటే గరిక. తెల్ల గరిక, నల్ల గరిక అని రెండు రకాలుంటాయి. గడ్డి జాతి మొక్కలు విఘ్నేశ్వరునికి అత్యంత ప్రీతికరమైనవి.
3. అపామార్గ పత్రం : తెలుగులో దీనిని ఉత్తరేణి అంటారు. దీని ఆకులు గుండ్రంగా ఉంటాయి. గింజలు, ముళ్ళు కలిగి వుండి కాళ్ళకు గుచ్చుకుంటాయి.
4. బృహతీ పత్రం : దీనిని ములక అంటారు. దీనిలో చిన్న ములక, పెద్ద ములక అని రెండు రకాలున్నాయి. పత్రాలు వంగ ఆకులు మాదిరి. తెల్లని చారలుండే గుండ్రని పండ్లతో ఉంటాయి.
5. దుత్తూర పత్రం : దుత్తూర పత్రం అంటే ఉమ్మెత్త. ఇది వంకాయ జాతికి చెందింది. ముళ్ళతో కాయలు వంకాయ రంగు పూలుంటాయి.

6. తులసీ పత్రం : హిందువులకు తులసి గురించి ప్రత్యేకంగా చెప్పాల్సిన పనిలేదు. తులసీ ఆకులను దేవతార్చనలో వాడతారు.
7. బిల్వ పత్రం : మారేడు ఆకు. మూడు ఆకులుగా, ఒక ఆకుగా ఉంటాయి. ఇవి శివునికి చాలా ఇష్టం. శ్రీ మహాలక్ష్మీదేవికి కూడ ఇష్టమైందిగా చెపుతారు.
8. బదరీ పత్రం : బదరీ పత్రం అంటే రేగు. దీనిలో రేగు, జిట్రేగు, గంగరేగు అని మూడు రకాలు ఉంటాయి.
9. చూత పత్రం : మామిడి ఆకు. ఈ ఆకుకు శుభకార్యాల్లో విశిష్ట స్థానం ఉంది. మామిడి తోరణం లేని హైందవ గృహం పండుగ రోజులలో కనిపించదు.
10. కరవీర పత్రం : దీనినే గన్నేరు అంటారు. తెలుపు, పసుపు, ఎరుపు రంగుల పూలుంటాయి. పూజలో ఈ పూలకు విశిష్ట స్థానం ఉంది.

11. మరువక పత్రం : దీన్ని వాడుక భాషలో ధవనం, మరువం అంటారు. ఆకులు ఎండినా మంచి సువాసన వెదజల్లుతుండటం ఈ పత్రం ప్రత్యేకత.
12. శమీ పత్రం : జమ్మిచెట్టు ఆకులనే శమీ పత్రం అంటారు. దసరా రోజుల్లో ఈ చెట్టుకు ప్రత్యేక పూజలు నిర్వహిస్తారు.
13. విష్ణుక్రాంత పత్రం : ఇది నీలం, తెలుపు పువ్వులుండే చిన్న మొక్క. నీలి పువ్వులుండే రకాన్ని విష్ణుక్రాంత అంటారు.
14. సింధువార పత్రం : సింధువార పత్రాన్నే వాడుకలో వావిలి అని కూడ పిలుస్తుంటారు.
15. అశ్వత్థ పత్రం : రావి ఆకులనే అశ్వత్థ పత్రం అని అంటారు. రావి చెట్టుకు పూజలు చేయటం సంప్రదాయం.

16. దాడిమీ పత్రం : అంటె దానిమ్మ ఆకు. శక్తి స్వరూపిణి అంబకు దాడిమీ ఫల నైవేద్యం ఎంతో ఇష్టం.
17. జాజి పత్రం : ఇది సన్నజాజి అనే మల్లిజాతి మొక్క. వీటి పువ్వుల నుంచి సుగంధ తైలం తీస్తారు.
18. అర్జున పత్రం : మద్దిచెట్టు ఆకులనే అర్జున పత్రమంటారు. ఇవి మర్రి ఆకుల్ని పోలి ఉంటాయి. అడవులలో పెరిగే పెద్ద వృక్షం ఇది.

19. దేవదారు పత్రం : దేవతలకు అత్యంత ఇష్టమైన ఆకు దేవదారు. ఇది చాలా ఎత్తుగా పెరుగుతుంది. ఈ మానుతో చెక్కిన విగ్రహాలకు సహజత్వం ఉంటుంది.
20. గండలీ పత్రం : దీనినే లతాదూర్వా అని కూడా అంటారు. భూమిపైన తీగమాదిరి పాకి గడ్డి మాదిరి పెరుగుతుంది.
21. అర్క పత్రం : జిల్లేడు ఆకులను అర్క పత్రమంటారు. తెల్లజిల్లేడు పేరుతో తయారుచేసిన వినాయక ప్రతిమను పూజించడం వల్ల విశేష ఫలం ఉంటుందంటారు.

ఈ 21 పత్రాలతో వినాయక చవితి రోజున పూజించే వారికి సకల సంపదలు, అష్టైశ్వర్యాలు, కార్యసిద్ధి చేకూరుతుందని పండితులు అంటున్నారు.