Omicron Cases In UK : బ్రిటన్ లో భారీగా ఒమిక్రాన్ కేసులు..సామాజిక వ్యాప్తి మొదలైపోయినట్లే!

: బ్రిటన్ లో కోవిడ్ కొత్త వేరియంట్ "ఒమిక్రాన్"కేసులు భారీగా పెరుగుతున్నాయి. కొత్తగా 101 ఒమిక్రాన్ కేసులు బయటపడగా..మంగళవారం నాటికి దేశవ్యాప్తంగా నమోదైన ఒమిక్రాన్ కేసుల సంఖ్య 437కి

Omicron Cases In UK : బ్రిటన్ లో భారీగా ఒమిక్రాన్ కేసులు..సామాజిక వ్యాప్తి మొదలైపోయినట్లే!

Omicron Cases In UK : బ్రిటన్ లో కోవిడ్ కొత్త వేరియంట్ “ఒమిక్రాన్”కేసులు భారీగా పెరుగుతున్నాయి. కొత్తగా 101 ఒమిక్రాన్ కేసులు బయటపడగా..మంగళవారం నాటికి దేశవ్యాప్తంగా నమోదైన ఒమిక్రాన్ కేసుల సంఖ్య 437కి చేరింది. బ్రిటన్ లో ఒమిక్రాన్ పరిస్థితిపై మంగళవారం కేబినెట్ మీటింగ్ నిర్వహించిన ప్రధాని బోరిస్ జాన్సన్..ఓమిక్రాన్ లక్షణాలపై అప్పుడే తీర్మాణాలు చేయడం చాలా తొందరపాటు అవుతుందని, అయితే ఇది డెల్టా కంటే ఎక్కువగా వ్యాపించే అవకాశం ఉందని ముందస్తు సూచనలు ఉన్నాయని అన్నారు. ప్రజలు తమ కోవిడ్ బూస్టర్ డోస్ ను పొందేందుకు ఇప్పుడు సమయం ఆసన్నమైంది అని బోరిస్ జాన్సన్ చెప్పారు.

ఇక, ఈ నెలలో క్రిస్మస్ పండుగ ఉన్న నేపథ్యంలో ఒమిక్రాన్ దృష్ట్యా ఆంక్షలు విధించే అవకాశముందంటూ ఊహాగానాలు వినిపిస్తున్న సమయంలో బ్రిటన్ న్యాయశాఖ మంత్రి డొమినిక్ రాబ్ దీనిపై మంగళవారం క్లారిటీ ఇచ్చారు. బ్రిటన్‌కు కఠినమైన దేశీయ కోవిడ్ ఆంక్షలు అవసరం లేదని ఆయన తెలిపారు. ఎందుకంటే వ్యాక్సిన్‌లు దేశాన్ని ఒక సంవత్సరం క్రితం కంటే మరింత స్థితిస్థాపకంగా ఉంచాయని డొమినిక్ రాబ్ తెలిపారు.

మరోవైపు, కరోనా కొత్త వేరియంట్ ఒమిక్రాన్ బ్రిటన్ లో సామాజిక వ్యాప్తి స్థాయికి చేరిందని ఆ దేశ ఆరోగ్యశాఖ మంత్రి సాజిద్ జావిద్ వెల్లడించారు. కొత్తగా నమోదైన కేసుల్లో అంతర్జాతీయ ప్రయాణాలకు ఎటువంటి సంబంధం లేనివారు కూడా ఉన్నారని బ్రిటన్ ప్రతినిధుల సభకు అందించిన నివేదికలో జావిద్ పేర్కొన్నారు. దీని ద్వారా సామాజిక వ్యాప్తి ఉందని స్పష్టమవుతోందని అన్నారు. ఒమిక్రాన్​ను అడ్డుకునేందుకు తాము ఏ అవకాశాన్నీ వదిలిపెట్టడం లేదని జావిద్ స్పష్టం చేశారు. ఈ వేరియంట్ ప్రమాదకరమా? కాదా? అనే విషయాన్ని ఇప్పుడే చెప్పలేమని అన్నారు. టీకాలపై ఏ మేరకు ప్రభావం చూపుతుందనేదీ స్పష్టంగా తెలీదని చెప్పారు. శాస్త్రవేత్తలు దీనిపై నిర్ధరణకు వచ్చేంత వరకు.. తగిన జాగ్రత్తలు తీసుకోవాల్సిందేనని అన్నారు.

ఈ పరిస్థితుల్లో తాజాగా నైజిరియా ను రెడ్ లిస్ట్ లో చేర్చడం సహా విదేశాల నుంచి వచ్చే ప్రయాణికులపై పలు ఆంక్షలు విధించినట్లు చెప్పారు. ప్రధానంగా ఇంగ్లాండ్ కు వచ్చేవారు కనీసం 48 గంటల ముందు కొవిడ్ పరీక్ష చేయించుకున్నట్లు ధ్రువీకరణ పత్రం ఉండాలని తెలిపారు. ఇక,రానున్న నెలరోజుల్లో బ్రిటన్ లో ఒమిక్రాన్ వేరియంట్ కేసులు తీవ్రస్థాయిలో పెరిగే అవకాశం ఉందని నిపుణులు అంచనా వేశారు.

ALSO READ Beijing Winter Olympics : బీజింగ్ ఒలింపిక్స్ దౌత్యబహిష్కరణపై అమెరికాకు చైనా వార్నింగ్