డ్రగ్స్ కేసు : IPL పంజాబ్ టీం ఓనర్ నెస్ వాడియాకు రెండేళ్ల జైలు
- Published By: veegamteam ,Published On : April 30, 2019 / 06:33 AM IST
ప్రముఖ వ్యాపారవేత్త, కింగ్స్ ఎలెవన్ పంజాబ్ జట్టు కో ఓనర్ నెస్ వాడియాకు జపాన్ కోర్టు రెండేళ్ల జైలు శిక్ష విధించింది. నెస్ వాడియా జపాన్ లోని చితోస్ ఎయిర్ పోర్టులో డ్రగ్స్ తో పట్టుబడ్డాడు. 2019 మార్చిలో ఈ ఘటన జరిగింది. నెస్ వాడియాపై పోలీసులు కేసు నమోదు చేశారు. సపోరో డిస్ట్రిక్ట్ కోర్టు ఈ కేసుని విచారించింది. మంగళవారం (ఏప్రిల్ 30,2019) తీర్పు ఇచ్చింది. వాడియాకు రెండేళ్ల జైలు శిక్ష విధించింది.
నెస్ వాడియా గతంలోనూ పలు కేసుల్లో చిక్కుకున్నాడు. నెస్ వాడియా బాలీవుడ్ నటి ప్రీతి జింటా మాజీ ప్రియుడు. 2014లో వాంఖడే స్టేడియంలో ఓ ఐపీఎల్ మ్యాచ్ సందర్భంగా తనతో నెస్ వాడియా అసభ్యంగా ప్రవర్తించాడని, లైంగిక వేధింపులకు పాల్పడ్డాడని ప్రీతి జింటా కేసు పెట్టింది.
ఆ తర్వాత నెస్ వాడియా తండ్రి నుస్లి వాడియా కోరిక మేరకు ఆమె కేసు ఉపసంహరించుకుంది. నుస్లి వాడియా ప్రముఖ వ్యాపారవేత్త. నుస్లి వాడియా పెద్ద కొడుకే నెస్ వాడియా.
