Kalyanam Song : ‘పది అంకెల్లో సంసారమిలా, పదిలంగా సాగేటి అల’.. ఆకట్టుకుంటున్న ‘కళ్యాణం’ సాంగ్..
చరణంలో పెళ్లిని అంకెలతో పోల్చూతూ అద్భుతంగా రాశారు గీత రచయిత కాసర్ల శ్యాం..
Kalyanam Song: ఆనంద్ దేవరకొండ హీరోగా నటిస్తున్న కొత్త సినిమా ‘పుష్పక విమానం’. గీత్ సైని హీరోయిన్. నూతన దర్శకుడు దామోదర ఈ చిత్రాన్ని రూపొందిస్తున్నారు. హీరో విజయ్ దేవరకొండ సమర్పిస్తున్నారు. కింగ్ అఫ్ ది హిల్ ప్రొడక్షన్ మరియు టాంగా ప్రొడక్షన్స్ సంయుక్తంగా నిర్మిస్తున్నాయి. ఈ మూవీకి గోవర్ధన్ రావు దేవరకొండ, విజయ్ మట్టపల్లి, ప్రదీప్ ఎర్రబెల్లి నిర్మాతలు.
అన్ని కార్యక్రమాలు పూర్తి చేసుకుని విడుదలకు సిద్ధమవుతున్న ‘పుష్పక విమానం’ చిత్రంలోని ఒక్కో పాట శ్రోతల ముందుకొస్తూ ఈ సినిమా మ్యూజికల్ హిట్ అని తేల్చేస్తున్నాయి. ఇప్పటికే ‘సిలకా..’ అనే పాట రిలీజ్ అయి మంచి హిట్ కాగా.. తాజాగా ‘కళ్యాణం..’ లిరికల్ సాంగ్ స్టార్ హీరోయిన్ సమంత విడుదల చేశారు.
‘కళ్యాణం..’ లిరికల్ సాంగ్ తనకు బాగా నచ్చిందని చెప్పిన సమంత.. హీరో ఆనంద్ దేవరకొండ, నిర్మాత విజయ్ దేవరకొండతో సహా ‘పుష్పక విమానం’ ఎంటైర్ టీమ్కు ఆల్ ది బెస్ట్ చెప్పారు.
Happy to launch this beautiful wedding song #Kalyanam from #PushpakaVimanam. ??https://t.co/57f1LOZmct
My best wishes to the entire team.?@TheDeverakonda @ananddeverkonda @itsdamodara @GeethSaini @Ram_Miriyala @sidsriram @LyricsShyam @iamMangli @vishwa_raghu @adityamusic— Samantha Akkineni (@Samanthaprabhu2) June 18, 2021
సినిమాలో ‘కళ్యాణం’ పాట హీరో హీరోయిన్ల పెళ్లి సందర్భంలో వస్తుంది. సుందర్, మీనాక్షి పెళ్లి వేడుక చూసేందుకు అతిథులంతా ఆనందంగా ఎదురుచూస్తుంటారు. వాళ్ల పెళ్లి కార్యక్రమాలు మంగళ స్నానాలతో మొదలవుతాయి. పెళ్లి కొడుకు, పెళ్లి కూతురు అందంగా ముస్తాబయి మండపంలోకి వస్తారు. ఇద్దరి మొహాల్లో తెలియని బిడియం, సిగ్గు ఉట్టిపడుతుండగా.. ‘‘అమ్మలాలో పైడి కొమ్మలాలో… ముద్దుల గుమ్మలాలో.. సందళ్లు నింపారే పందిళ్లలో.. బంగారు బొమ్మలాలో.. మోగేటి సన్నాయి మోతల్లలో.. సాగేటి సంబరాలో’’.. అంటూ ‘కళ్యాణం’ పాట ప్రారంభమవుతుంది. ‘‘కళ్యాణం.. కమనీయం, ఒకటయ్యే వేళనా.. వైభోగం.. కళ్యాణం.. కమనీయం, ఈ రెండు మనసులే.. రమణీయం’’.. అంటూ పాట సాగుతుంది.
చరణంలో పెళ్లిని అంకెలతో పోల్చూతూ అద్భుతంగా రాశారు గీత రచయిత కాసర్ల శ్యాం. ‘‘ఏడడుగులేయగా ఈ అగ్ని మీకు సాక్షిగా.. ఏడు జన్మలా బంధంగా.. ఎనిమిది గడపదాటి ఆనందాలు చూడగా.. మీ అనుబంధమే బలపడగా.. ఇక తొమ్మిది నిండితే నెల.. నెమ్మ నెమ్మదిగా తీరే కల.. పది అంకెల్లో సంసారమిలా, పదిలంగా సాగేటి అల’’.. అని సాగే చరణంలో ఆదర్శ వైవాహిక జీవితాన్ని చూపించారు. ఇక ఈ పాటను మంగ్లీ, సిధ్ శ్రీరామ్ మళ్లీ మళ్లీ వినేలా పాడారు. తన మ్యూజిక్ టాలెంట్తో ‘కళ్యాణం’ పాటను మరో హిట్ నెంబర్ చేశారు సంగీత దర్శకుడు రామ్ మిరియాల. ఈ పాటకు అకేషన్కు తగినట్లు సింపుల్ అండ్ బ్యూటిఫుల్ కొరియోగ్రఫీ చేశారు రఘు మాస్టర్. అలాగే నీల్ సెబాస్టియన్ వేసిన పెళ్లి మండపం సెట్ ఎంతో అందంగా ఉండి ఆకట్టుకుంటోంది.
‘పుష్పక విమానం’ సినిమాలో ఇలాంటి అందమైన పాటలతో పాటు ఆసక్తికర సన్నివేశాలు త్వరలో వెండితెరపై చూపించబోతున్నారు. ఆనంద్ దేవరకొండ, గీత్ సైని, శాన్వి మేఘన, సునీల్, నరేష్, హర్షవర్థన్, గిరిధర్, కిరీటి, భద్రం, వైవా హర్ష, అభిజిత్, అజయ్, సుదర్శన్, శరణ్య, మీనా వాసు, షేకింగ్ శేషు తదితరులు నటిస్తున్న ఈ చిత్రానికి సమర్పణ : విజయ్ దేవరకొండ, సినిమాటోగ్రఫీ : హెస్టిన్ జోస్ జోసెఫ్, ఆర్ట్ డైరెక్టర్ : నీల్ సెబాస్టియన్, ఎడిటర్ : రవితేజ గిరిజాల, మ్యూజిక్ : రామ్ మిరియాల, సిద్దార్థ్ సదాశివుని, అమిత్ దాసాని, నేపథ్య సంగీతం : మార్క్ కె.రాబిన్, కాస్టూమ్స్ : భరత్ గాంధీ, నిర్మాతలు : గోవర్ధన్ రావు దేవరకొండ, విజయ్ మట్టపల్లి, ప్రదీప్ ఎర్రబెల్లి, రచన-దర్శకత్వం : దామోదర.