Telangana Weather: రాగల మూడు రోజులు మోస్తరు వర్షాలు!

గత వారం రోజులుగా తెలంగాణ రాష్ట్రవ్యాప్తంగా పలు ప్రాంతాలలో మోస్తరు జల్లులు కురుస్తున్న సంగతి తెలిసిందే. కాగా మరో మూడు రోజుల పాటు తేలిక పాటి నుంచి మోస్తరు వర్షాలు కురిసే అవకాశం ఉందని హైదరాబాద్‌ వాతావరణ కేంద్రం ప్రకటించింది.

Telangana Weather: గత వారం రోజులుగా తెలంగాణ రాష్ట్రవ్యాప్తంగా పలు ప్రాంతాలలో మోస్తరు జల్లులు కురుస్తున్న సంగతి తెలిసిందే. కాగా మరో మూడు రోజుల పాటు తేలిక పాటి నుంచి మోస్తరు వర్షాలు కురిసే అవకాశం ఉందని హైదరాబాద్‌ వాతావరణ కేంద్రం ప్రకటించింది. పలుచోట్ల ఉరుములు, మెరుపులతో కూడిన వాన పడే అవకాశం ఉందని తెలిపింది. గంటకు 30 నుంచి 40 కిలోమీటర్ల వేగంతో గాలులు వీస్తాయని వెల్లడించింది.

నైరుతి రుతుపవనాలు చురుగ్గా మారటంతో రాష్ట్రంలో రాగల మూడు రోజుల పాటు తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్‌ వాతావరణ కేంద్రం ప్రకటించింది. రాష్ట్రంలోకి నైరుతి, పశ్చిమ దిశల నుంచి బలమైన గాలులు వీస్తున్నాయని తెలిపింది. ఈరోజు పశ్చిమ, నైరుతి తెలంగాణ జిల్లాలైన వికారాబాద్‌, సంగారెడ్డి, మెదక్‌, కామారెడ్డిల్లో ఉరుములు, మెరుపులతో కూడిన వర్షం కురిసే అవకాశం ఉందని తెలిపింది.

రేపు, ఎల్లుండి ఒకటి, రెండుచోట్ల భారీ వర్షం కురిసే అవకాశం ఉందని పేర్కొంది. గంటకు 30 నుంచి 40 కిలోమీటర్ల వేగంతో గాలులు వీస్తాయని వాతావరణ శాఖ వెల్లడించింది. గత రెండు రోజుల నుండి పలుజిల్లాలలో వర్షాలు కురుస్తుండగా మహారాష్ట్రతోపాటు దాదాపు దక్షిణాది రాష్ట్రాల్లో వర్షాలు కురుస్తున్నాయి. మరో తెలుగు రాష్ట్రం ఏపీలో కూడా పలు జిల్లాలలో ఉరుములతో కూడిన వర్షాలు కురిశాయి.