గతేడాది కంటే తగ్గనున్న తెలంగాణ బడ్జెట్.. కారణం ఇదే!

తెలంగాణ బడ్జట్‌ సమావేశాలు మార్చి మూడో వారంలో మొదలు కాబోతున్నాయి. మార్చి 18వ తేదీన బడ్జెట్‌ ప్రవేశపెట్టే అవకాశం ఉంది. కేసీఆర్‌ శాఖలవారీగా నేటి(07 మార్చి 2021) నుంచి సమీక్షలు నిర్వహించనున్నారు. ఈసారి బడ్జెట్‌ ఆశాజనకంగా ఉంటుందని ఇప్పటికే సమీక్షలో స్పష్టం చేశారు కేసీఆర్‌. మార్చి 15 తర్వాత అసెంబ్లీ సమావేశాలు పెట్టేందుకు సర్కారు ఇప్పటికే సిద్ధం అయ్యింది.

2021-22 సంవత్సరానికి తెలంగాణ ప్రభుత్వం ప్రవేశపెట్టబోయే బడ్జెట్‌ను ఆర్థిక శాఖ అధికారులు రూపొందించారు. ఈ బడ్జెట్ ప్రతిపాదనలను ముఖ్యమంత్రి కేసీఆర్‌కు అందించగా.. ప్రగతిభవన్‌లో సీఎం కేసీఆర్‌తో ఆర్థిక మంత్రి హరీష్ రావు, ప్రభుత్వ ప్రధాన కార్యదర్శి సోమేశ్ కుమార్, ఆర్థిక శాఖ అధికారులు భేటీ అయ్యారు. తెలంగాణ ప్రభుత్వం గతేడాది 2020-21 ఆర్థిక సంవత్సరానికి గాను 1 లక్షా 82 కోట్ల రూపాయల బడ్జెట్‌ను ప్రవేశపెట్టింది.

కరోనా, ఆర్థిక మాంద్యం నేపథ్యంలో ఆశించిన స్థాయిలో ప్రభుత్వానికి ఆదాయం రాకపోవడంతో.. బడ్జెట్‌ను సుమారుగా 20 శాతం వరకు కుదించాలని భావిస్తోంది సర్కార్. అందుకు తగ్గట్టే బడ్జెట్ ప్రతిపాదనలని సీఎంకు అందించారు అధికారులు. సీఎం పరిశీలన తర్వాత బడ్జెట్ పద్దుల ప్రతిపాదనలపై తుది కసరత్తు జరగనుంది. అనంతరం శాఖల వారీగా పూర్తి స్థాయిలో నిధుల కేటాయింపు జరుగుతుంది.