Tesla: టెస్లా భారత్ వచ్చేనా?

Tesla: ప్రమఖ ఎలక్ట్రిక్ కార్ల తయారీ సంస్థ టెస్లా భారత్ వచ్చే ప్రయత్నాల్ని తాత్కాలికంగా నిలిపివేసింది. భారత ప్రభుత్వం దిగుమతి సుంకాల్ని తగ్గించాలన్న టెస్లా ప్రతిపాదనపై కేంద్రం సానుకూలంగా స్పందించకపోవడంతో టెస్లా ఈ నిర్ణయం తీసుకుంది. దాదాపు ఏడాది క్రితం నుంచి టెస్లాకు, భారత ప్రభుత్వానికి మధ్య దిగుమతి సుంకాల విషయంలో చర్చలు నడుస్తున్నాయి. అమెరికా, చైనాలో తయారైన ఎలక్ట్రిక్ కార్లను భారత్‌తో విక్రయిస్తామని, దీనికి అనుకూలంగా దిగుమతి సుంకాల్ని తగ్గించాలని టెస్లా కోరింది. అయితే, దీనిపై కేంద్రం భిన్నంగా స్పందించింది. దిగుమతి సుంకాల్ని తగ్గించేలోపు, కార్లను భారత్‌లోనే తయారు చేయాలని సూచించింది.

Elon Musk: తాజ్‌మహల్‌ను గుర్తుచేసుకున్న ఎలాన్ మస్క్.. ఇండియా టూర్ ఖరారైందా?

దీనికి టెస్లా సానుకూలంగా స్పందించలేదు. దీంతో భారత నిర్ణయానికి అనుకూలంగా ఇక్కడే కార్లు తయారు చేయలేక, అధిక దిగుమతి సుంకాలతో కార్లను విక్రయించలేక.. ప్రస్తుతానికి టెస్లా కంపెనీ భారత్ వచ్చే ప్రయత్నాల్ని విరమించుకుంది. షోరూమ్‌ల కోసం జరుపుతున్న అన్వేషణ కూడా ఆపేయాలని ఇండియాలోని సిబ్బందికి సూచించింది. నిజానికి ఈ విషయంలో టెస్లా ఫిబ్రవరి 1నే తుది గడువుగా నిర్ణయించుకుంది. ఎందుకంటే ఆరోజు కేంద్ర బడ్జెట్ ప్రవేశపెడతారు కాబట్టి. ఆలోపు తమ లాబీయింగ్ ద్వారా దిగుమతి సుంకాల్ని తగ్గించుకోవచ్చని టెస్లా భావించింది. కానీ, కొత్త బడ్జెట్‌లో దీనికి సంబంధించిన ప్రతిపాదనలేవీ లేకపోవడంతో నిరాశ చెందింది. తాజాగా ఈ నిర్ణయం తీసుకుంది.