Anger : కోపంతో ఊగిపోతున్నారా! అయితే జాగ్రత్త పడాల్సిందే

Anger : మనిషి అన్నవాడు ఎప్పుడో ఒకప్పుడు కోపం అనే భావోద్వేగానికి గురికావాల్సి వస్తుంది. మనకు చాలా ఇష్టమైన వాళ్ళు బాధపెట్టిన సందర్భంలోనో , మాటల ద్వారానో, పనుల ద్వారానో కోపాన్ని కలిగిస్తారు. కోపం వల్ల జీవితంలో అనేక పరిణామాలను ఎదుర్కోవాల్సి రావటంతోపాటుగా, ఆరోగ్యంపైన తీవ్ర ప్రభావం పడుతుంది. కోపం అధికంగా ఉండే వారిలో వ్యాధినిరోధకశక్తి తగ్గిపోతుంది. దానివల్ల తరచూ ఇన్ఫెక్షన్స్ వస్తూ ఉంటాయి. తరచూ కోపం రావడం వల్ల గొడవకి సిద్ధపడే విధంగా హార్మోన్స్ విడుదలవుతాయి. మన ఆలోచన శక్తి, జీర్ణశక్తిపై ఆప్రభావం పడుతుంది.

కోపం కారణంగా కొన్ని సందర్భాల్లో మంచి స్నేహ సంబంధాలు సైతం దెబ్బతింటాయి. రోజు వారిగా మనం చేసే పనులపై ఏకాగ్రతతోపాటు, సామర్ధ్యాన్ని తగ్గిస్తుంది. కోపాన్ని అదుపు చేసుకోలేక కొన్ని సందర్భాల్లో తీవ్రమైన దుష్ఫరిణామాలకు దారితీసేందుకు కారణభూతమౌతుంది. పూర్తిస్ధాయి ఆరోగ్యం దెబ్బతినేందుకు కోపం కారణంగా మారే అవకాశం ఉంటుంది. గుండె సంబంధిత సమస్యలతోపాటు, జీర్ణ సమస్యలు తలెత్తుతాయి. హార్మోన్ల సమతుల్యత దెబ్బతింటుంది. మానసిక ప్రశాంతతను కోల్పోవటంతోపాటు, నిద్రలేమి సమస్యలు తలెత్తుతాయి. తలపోటు, అధిక రక్తపోటు, పునరుత్పత్తి శక్తి తగ్గిపోవటం వంటి ఇబ్బందులు ఎదుర్కోవాల్సి వస్తుంది. తరుచూ కోపం రావటం అది మీ శరీరానికి ఏమాత్రం మంచిది కాదు. ఇది పూర్తి స్ధాయి ఆరోగ్యం పై ప్రభావాన్ని చూపిస్తుంది.

కోపం రాకుండా చూసుకోవటంతోపాటు మానిసికంగా ధృఢంగా మారేందుకు ప్రయత్నించాలి. ఇందుకోసం ప్రతిరోజు ధ్యానం చేయటం అలవాటుగా చేసుకోవాలి. దీని వల్ల కోపాన్ని తగ్గించుకోవచ్చు. శరీరాన్ని, మైండ్ ను చురుకుగా ఉంచుకోవటంతోపాటు కోపం రాకుండా చూసుకునేందుకు యోగా కూడా చక్కగా ఉపయోగపడుతుంది. శరీరానికి అవసరమైన పోషకాలు ఆహారం రూపంలో అందేలా చూసుకోవాలి. పోషకాల లోపం కారణంగా కూడా శక్తి తగ్గి కోపం వచ్చే ప్రమాదం ఉంటుంది. క్రమశిక్షణతో కూడిన జీవనశైలిని అలవరుచు కోవాలి. దీని వల్ల భావోద్వేగాల నుండి బయటపడవచ్చు. వాకింగ్, స్విమ్మింగ్, జాగింగ్, వంటి వాటిని రోజువారిగా అలవాటుగా మార్చుకోవాలి. ఇలా చేస్తే శులభంగా కోపాన్ని కంట్రోల్ లో ఉంచుకోవచ్చు.