వైరల్ వీడియో: జూనియర్ ఎన్టీఆర్ పాటకు జపాన్ జంట స్టెప్పులు..

టాలీవుడ్‌లో జూనియర్ ఎన్టీఆర్ స్టెప్పులకు ప్రత్యేకమైన క్రేజ్ ఉంది. అంతేకాదు ఎన్టీఆర్ అభిమానులు జపాన్‌లో కూడా ఉన్నారు. అక్కడ ఎన్టీఆర్ సినిమాలకు అభిమానుల సందడి బాగా ఉంటుంది కూడా. అయితే లేటెస్ట్‌గా ఓ జపనీస్ జంట ఎన్టీఆర్ నటించిన అశోక్ సినిమాలోని పాటకు స్టెప్పులేసి అలరించారు.

ఎన్టీఆర్, సమీరారెడ్డి నటించిన ‘అశోక్’ సినిమాలోని ‘గోల గోల’ పాట అప్పట్లో మంచి క్రేజ్ తెచ్చుకుంది. ఈ పాట కోసం సినిమాను మళ్లీ మళ్లీ చూసినవాళ్లు కూడా ఉన్నారు. ఈ పాటకే ఓ జపాన్ జంట డ్యాన్స్ ఇరగదీసింది. మణిశర్మ సంగీత దర్శకత్వం వహించిన ఈ పాటకు ఎన్టీఆర్, సమీరారెడ్డి చేసిన డ్యాన్స్ అప్పట్లో ప్రేక్షకులను ఆకట్టుకోగా.. ఇప్పుడు వీరు వేసిన స్టెప్పులు కూడా ఆకట్టుకున్నాయి.

ఈ సినిమాలోని ‘గోల’ పాటకు జపాన్ జంట చేసిన డ్యాన్స్ సోషల్ మీడియాలో తెగ వైరల్ అవుతోంది. ఎన్టీఆర్, సమీరల డ్యాన్స్ స్టెప్పులను అచ్చుగుద్దినట్టు దింపేశారు. క్యాస్ట్యూమ్స్‌ను కూడా దాదాపు అనుకరించారు. ఈ జంట డ్యాన్స్ చూసిన ఎన్టీఆర్ ఫ్యాన్స్ ముగ్ధులైపోయి ప్రశంసల వర్షం కురిపిస్తున్నారు. విపరీతంగా షేర్ చేస్తున్నారు.