చెన్నైపై ముంబై విజయం.. ప్లే ఆఫ్‌కు ఇక అవకాశాల్లేవ్

Share on facebook
Share on twitter
Share on telegram
Share on whatsapp

ఐపీఎల్ 2020లో చెన్నై సూపర్ కింగ్స్ జట్టు ఫ్లాప్ షో కొనసాగుతుంది. ముంబైతో మ్యాచ్‌లో చెన్నై సూపర్ కింగ్స్ 10వికెట్ల తేడాతో ఓటమి పాలైంది. ఈ విజయంతో ముంబై పాయింట్ల పట్టికలో మొదటి స్థానానికి చేరుకోగా.. టాస్ ఓడి మొదట బ్యాటింగ్‌కు దిగిన చెన్నై 20 ఓవర్లలో 9 వికెట్లు నష్టపోయి 114 పరుగులు చేసింది. అనంతరం బ్యాటింగ్‌కు దిగిన ముంబై 12.2 ఓవర్లలో లక్ష్యాన్ని ఒక వికెట్ కూడా కోల్పోకుండా సాధించింది. ఆరు ఫోర్లు, ఐదు సిక్సర్లు సాయంతో ఇషాన్ కిషన్ 37 బంతుల్లో అజేయంగా 68 పరుగులు చేయగా.. క్వింటన్ డికాక్ 37 బంతుల్లో అజేయంగా 46 పరుగులు చేశాడు.


అంతకుముందు టాస్ ఓడి బ్యాటింగ్‌కు దిగిన చెన్నై సూపర్ కింగ్స్.. తొలి ఓవర్‌లోనే ఓపెనర్ రితురాజ్ గైక్వాడ్ వికెట్ కోల్పోగా.. తరువాత, అంబటి రాయుడు కూడా మూడు పరుగుల స్కోరు చేసి అవుట్ అయ్యాడు. వెంటనే క్రీజులోకి వచ్చిన జగదీశన్ కూడా ఖాతా తెరవకుండా పెవిలియన్‌కు చేరాడు. జస్ప్రీత్ బుమ్రా వరుసగా రెండు బంతుల్లో వారిద్దరినీ అవుట్ చేశాడు.


మూడు పరుగులకు మూడు వికెట్లు పడటంతో చెన్నై ఇన్నింగ్స్ కష్టాల్లో పడింది. తరువాతి ఓవర్‌లో ఫాఫ్ డు ప్లెసిస్ కూడా అవుటయ్యాడు. దీని తరువాత రవీంద్ర జడేజా కూడా 21 పరుగుల స్కోరు దగ్గర పెవిలియన్‌కు చేరుకున్నాడు. జడేజా ఆరు బంతుల్లో ఏడు పరుగులు చేశాడు. సగం జట్టు 21 పరుగులకే అవుటయ్యాక ఎంఎస్ ధోని జాగ్రత్తగా ఆడటానికి ప్రయత్నించాడు. అయితే రాహుల్ చాహర్ లెగ్ స్పిన్‌కి ధోనీ క్యాచ్ ఇచ్చి అవుట్ అయ్యాడు. రెండు ఫోర్లు, ఒక సిక్సర్ సాయంతో ధోనీ 16 బంతుల్లో 16 పరుగులు చేశాడు.



ధోనీ అవుట్ అయ్యాక దీపక్ చాహర్ కూడా తదుపరి బంతికి పెవిలియన్‌కు తిరిగి వచ్చాడు. ఒక వైపు నుండి క్రమ వ్యవధిలో వికెట్లు పడిపోయినప్పటికీ, సామ్ కుర్రాన్ మాత్రం జాగ్రత్తగా చివరివరకు ఆడాడు. ముంబై బౌలర్లు అద్భుత ప్రదర్శనతో చెన్నై బ్యాట్స్‌మెన్‌లు క్రీజులో ఏ మాత్రం నిలబడకుండా చేసినా.. చెన్నై జట్టు కెప్టెన్ మహేంద్ర సింగ్ ధోనీ మళ్లీ అభిమానులను నిరాశపరచినా.. ఆల్‌రౌండర్ శామ్ కర్రన్ మాత్రమే మైదానంలో నిలబడి చెన్నై జట్టు పరువు కాపాడాడు. కనీసం వంద పరుగుల మార్క్ కూడా క్రాస్ కాలేదేమో అని భావించిన తరుణంలో 47బంతుల్లో 52పరుగులు చేసి చెన్నై జట్టు స్కోరును 114పరుగులకు తీసుకుని వెళ్లాడు. జట్టు భారం మొత్తాన్నీ తన భుజాలపై వేసుకుని ముందుకు నడిపించాడు. కర్రన్‌కు తోడుగా తాహీర్ కాసేపు క్రీజులో స్ట్రైక్ రొటేట్ చేశాడు. 43పరుగుల పార్ట్‌నర్ షిప్ అందించాడు. 71పరుగులకే 8వికెట్లు పడిపోగా.. తర్వాత శామ్ కర్రన్ తాహీర్ క్రీజులో నిలబడ్డారు.



అదే సమయంలో, ముంబై ఇండియన్స్ కోసం ట్రెంట్ బౌల్ట్ అత్యంత అద్భుతమైన బౌలింగ్ చేశాడు. బౌల్ట్ తన కోటాలోని నాలుగు ఓవర్లలో కేవలం 18 పరుగులు మాత్రమే ఇచ్చి నాలుగు వికెట్లు తీశాడు. ఇవి కాకుండా జస్ప్రీత్ బుమ్రా, రాహుల్ చాహర్ చెరో రెండు వికెట్లు పడగొట్టారు. Nathan Coulter-Nile ఒక వికెట్ తీసుకున్నాడు.



అనంతరం బ్యాటింగ్‌కు దిగిన ముంబై బ్యాట్స్‌మెన్ ఇషాన్ కిషన్, క్వింటన్ డికాక్ చెన్నై నుంచి స్వీకరించిన 115 పరుగుల లక్ష్యాన్ని 12.2ఓవర్లలో ఛేదించారు. కిషన్ 37 బంతుల్లో అజేయంగా 68 పరుగులు చేయగా.. క్వింటన్ డికాక్ 37 బంతుల్లో అజేయంగా 46 పరుగులు చేశాడు. ఈ విజయంతో ముంబై పాయింట్ల పట్టికలో అగ్రస్థానానికి చేరుకుంది. ఇక చెన్నై ప్లే ఆఫ్ అవకాశాలను పూర్తిగా కోల్పోయింది. ఈ ఓటమితో ఈ సిరీస్‌లో చెన్నై ప్లేఆఫ్‌‌‌కు వెళ్లకుండా ఆగిపోయింది.

Related Tags :

Related Posts :