Covid Vaccine For Kids : పిల్లలకు వ్యాక్సిన్ అందుబాటులోకి వస్తే స్కూల్స్ తెరవచ్చు

కొవిడ్ మహమ్మారి కారణంగా ఏడాదిన్నరగా పిల్లలకు తమ చదువుల్లో తీరని నష్టం ఏర్పడిందని ఎయిమ్స్​ చీఫ్​ డాక్టర్ రణదీప్​ గులేరియా తెలిపారు.

Covid Vaccine For Kids కొవిడ్ మహమ్మారి కారణంగా ఏడాదిన్నరగా పిల్లలకు తమ చదువుల్లో తీరని నష్టం ఏర్పడిందని ఎయిమ్స్​ చీఫ్​ డాక్టర్ రణదీప్​ గులేరియా తెలిపారు. చిన్నారుల కోసం కొవిడ్​ టీకా వస్తే పాఠశాలలు పునఃప్రారంభించేందుకు మార్గం సుగమం అవుతుందని ఆయన తెలిపారు. పిల్లల కోసం కొవిడ్ వ్యాక్సిన్ అందుబాటులోకి వస్తే అది కీలకమైన విజయమని.. తద్వారా పాఠశాలలను పునఃప్రారంభించటం సహా చిన్నారులు స్వేచ్ఛగా బహిరంగ కార్యాకలాపాల్లో పాల్గొనేందుకు అవకాశం లభిస్తుందని ఎయిమ్స్​ చీఫ్ తెలిపారు.

2-18 ఏళ్ల లోపు వయస్సు వారి కోసం భారత్​ బయోటెక్​ సంస్థ అభివృద్ధి చేస్తున్న కొవాగ్జిన్​ వ్యాక్సిన్.. రెండు, మూడో దశ క్లినికల్​ ట్రయల్స్ డేటా​​ సెప్టెంబర్​ నాటికి వస్తుందని భావిస్తున్నట్లు చెప్పారు. దీనికంటే ముందే ఫైజర్​ వ్యాక్సిన్​.. చిన్నారులు కోసం అందుబాటులోకి వస్తే అది కూడా చిన్నారులకు ఒక ఆఫ్షన్ గా ఉంటుందని శనివారం ఓ ఇంటర్వ్యూలో గులేరియా తెలిపారు. జైడస్​ వ్యాక్సిన్​కు అనుమతి లభించినా అది కూడా మరో అవకాశంగా ఉంటుందని తెలిపారు. పిల్లలకు కరోనా లక్షణాలు స్వల్పంగా ఉన్నా, అసలు లక్షణాలే లేకపోయినా కూడా వారి ద్వారా ఇతరులకు వైరస్​ వ్యాపించే ప్రమాదం ఉందని గులేరియా హెచ్చరించారు. మహమ్మారి కోరల నుంచి బయటపడాలంటే వ్యాక్సినేషన్ ను వేగవంతం చేయాల్సిన అవసరం ఉందన్నారు.

మరోవైపు, ఫార్మా దిగ్గజం జైడస్​ క్యాడిలా సంస్థ తమ జైకోవ్​-డి వ్యాక్సిన్ అత్యవసర వినియోగం కోసం డ్రగ్​ కంట్రోలర్​ జనరల్ ఆఫ్​ ఇండియా(డీసీజీఐ)కి త్వరలోనే దరఖాస్తు చేసుకునే అవకాశం ఉందని ఓ సీనియర్​ అధికారి తెలిపారు. ఈ వ్యాక్సిన్ ను పెద్దలతో పాటు చిన్నారులకూ ఇవ్వొచ్చునని ఆ సంస్థ తెలిపింది.