Dalit Lick Spit : ప్రేమించి పెళ్లి చేసుకున్న దళిత యువకుడు..నేలపై ఉమ్మి వేసి నాకించి..మూత్రం తాగించిన గ్రామ పెద్దలు

Dalit Man Forced To Lick Spit and Drink Urine by Panchayat  : టెక్నాలజీలో దూసుకుపోతున్నాం అని చెప్పుకునే ఈకాలంలో కూడా ఇంకా కులాలు…మతాలు,అంటరానివారంటూ వివక్షలు కొనసాగుతునే ఉన్నాయి. ఎవరి పుట్టుకలు ఎవరి చేతుల్లోను ఉండవు. అటువంటిది దళితులుగా పుట్టారని వారిపై వివక్షలు చూపించటం అనే అనే అనాగరిక జాడ్యాన్ని మాత్రం వదిలించుకోవటంలేదు ఈ నాగరిక ప్రపంచంలో జీవించే మనుషులు. ఈ క్రమంలో ప్రేమించి పెళ్లి చేసుకున్నాడని ఓ దళిత యువడిని అగ్ర కులం అని చెప్పుకునే గ్రామ పెద్దలు ఆ యుడకుడిని దారుణాతి దారుణంగా అవమానించారు.

డాక్టర్ బీ.ఆర్. అంబేద్కర్ జయంతి రోజునే బీహార్ లో జరిగిన ఈ ఘటన సభ్య సమాజాన్ని సిగ్గుతో తలవంచుకునేలా చేసింది. అగ్ర వర్ణకుల పెద్దలు నేలపై ఉమ్మి వేసి..ఆ ఉమ్మిని బలవంతంగా దళిత యువకుడితో నాలుకతో నాకించిన ఘోర ఘటన బీహార్ లోని గయాలోని వజీర్‌గంజ్ ప్రాంతంలో చోటుచేసుకుంది. అంతేకాదు ఓ పాత్రలో గ్రామ పెద్దలు మూత్రం పోసి అతనితో బలవంతంగా తాగించారు..యువకుడితో ఉమ్మి నాకించిన ఫోటోలు సోషల్ మీడియాలో వైరల్ అయ్యాయి.

గయాలోని వజీర్‌గంజ్ ప్రాంతంలోని ఓ గ్రామంలో ఓ దళిత యువకుడు అదే గ్రామానికి చెందిన యువతిని ప్రేమించి పెళ్లి చేసుకున్నాడు. ఈ విషయం తెలిసిన గ్రామ పంచాయితీ పెద్దలు ఆగ్రహం వ్యక్తంచేశారు. వెంటనే పంచాయితీ పెట్టించారు. పంచాయితీకి సదరు యువకుడిని పిలించారు. అశ్లీల పదాలతో పరుషంగా దూషించారు. దారుణంగా అవమానించారు. నేలపై ఉమ్మి వేసి ఆ ఉమ్మిని అతడితో బలవంతంగా నాకించారు. ఓ పాత్రలో మూత్రం పోసి ఆ మూత్రం తాగాలని బలవంత పెట్టి అత్యంత అమానుషంగా ప్రవర్తించారు. ప్రేమించినందుకు ‘‘శిక్షగా’’ పంచాయితీలో ఉన్న పలువురు వ్యక్తులు నేలపై ఉమ్మి వేసి ఆ ఉమ్మిని ఆ యువకుడు మోకాళ్లపై కూర్చుని ఉమ్మి నాకుతున్నట్టు వీడియోలో కనిపిస్తోంది. అనంతరం మూత్రం తాగాలంటూ పంచాయితీ పెద్దలు అతడిని బలవంతం చేశారు.

17 ఏళ్ల దళిత యువకుడు ఇటీవల తాను ప్రేమించిన యువతితో కలిసి పారిపోయి వివాహం చేసుకున్నాడు. దీంతో యువతి తల్లిదండ్రులు ఆ జంటను వెతికి వెతికి పట్టుకుని పంచాయితీ పెట్టించారు. అతడికి శిక్ష విధించాల్సిందేనని పట్టుపట్టారు. దీంతో పెద్దలు ఇటువంటి మరొకరు చేయకుండా ఉండాలంటే మా ఉమ్మి నాకాలి..మా మూత్రం తాగాలంటూ తీర్పునిచ్చారు. పంచాయితీ సభ్యులు, సర్పించి ముందే ఆ దళిత యువకుడిని అమానుషంగా కొట్టి హింసించారు. ఆ తరువాత పెద్దలందరూ నేలపై ఉమ్మి వేసి అతనితో నాకించారు. ఈ ఘటనపై వీడియో వైరల్ కావడంతో గయా పోలీసులు దీనిపై కేసు నమోదు చేసి విచారణ చేపట్టారు. ఇప్పటికే ఆరుగురు వ్యక్తులను అరెస్ట్ చేశామనీ… ఈ వ్యవహారంలో ప్రమేయం ఉన్నవారందరిపై కఠిన చర్యలు తీసుకుంటామని గయా ఎస్‌ఎస్పీ ఆదిత్య కుమార్ తెలిపారు.