BJP MLA: యూపీలో అఖిలేష్ పార్టీలోకి మరో బీజేపీ ఎమ్మెల్యే!

ఉత్తరప్రదేశ్‌లో భారతీయ జనతా పార్టీకి మరో షాక్ తగిలింది. ఫతేహాబాద్‌ నియోజకవర్గంలోని బీజేపీ ఎమ్మెల్యే ఆ పార్టీకి గుడ్‌బై చెప్పారు.

BJP MLA: ఉత్తరప్రదేశ్‌లో భారతీయ జనతా పార్టీకి మరో షాక్ తగిలింది. ఫతేహాబాద్‌ నియోజకవర్గంలోని బీజేపీ ఎమ్మెల్యే ఆ పార్టీకి గుడ్‌బై చెప్పారు. బీజేపీకి రాజీనామా చేసి అఖిలేష్ యాదవ్ పార్టీ సమాజ్‌వాదీ గూటికి చేరారు జితేంద్రవర్మ. తాను బీజేపీ కోసం ఎంతో పనిచేశానని, అయినప్పటికీ పార్టీలో సరైన గుర్తింపు దక్కలేదని ఆవేదన వ్యక్తం చేశారు వర్మ.

యువతను ప్రోత్సహిస్తామని చెప్పిన బీజేపీ, 75ఏళ్ల వృద్ధులకు టికెట్లు ఇస్తోందని ఆరోపించారు. బీజేపీలో ఏ ఒక్క కార్యకర్త ఎమ్మెల్యేగా పోటీ చేయడం లేదన్నారాయన. రాష్ట్రంలో కష్టాల్లో కూరుకుపోయిన రైతుకు ఎరువు కూడా అందకపోతే ఎమ్మెల్యేలు దేనికి అని ఆయన ప్రశ్నించారు. తానే కాదు, తనలాంటి ఎమ్మెల్యేలు చాలా మంది త్వరలోనే బీజేపీని వీడనున్నారని పేర్కొన్నారు జితేంద్రవర్మ.

వచ్చే ఎన్నికల్లో యూపీలో సమాజ్‌వాదీ పార్టీ గెలుస్తుందని, ప్రభుత్వాన్ని ఏర్పాటు చేసిన తర్వాత అందరి సంక్షేమం కోసం ఎస్పీ కృషి చేస్తుందని అన్నారు. జితేంద్ర వర్మ గతంలో సమాజ్‌వాదీ పార్టీలో ఉన్నారు. ఆయన ఆగ్రా జిల్లా అధ్యక్షుడిగా కూడా కొనసాగారు. 2017లో ఎస్పీని వీడి బీజేపీలో చేరారు. గత ఎన్నికల్లో బీజేపీ తరుఫున గెలిచిన ఆయన.. తిరిగి సొంత గూటికి చేరుకున్నారు.