కర్నాటక ఉప ఎన్నికల ఫలితాలు..బీజేపీ దూకుడు

కర్నాటక ఉప ఎన్నికల ఫలితాలు వెలువడుతున్నాయి. 2019, డిసెంబర్ 09వ తేదీ సోమవారం ఉదయం ఓట్ల లెక్కింపును అధికారులు చేపట్టారు. ఇక్కడ బీజేపీ హావా కొనసాగిస్తోంది. 15 స్థానాలకు గాను 9 చోట్ల కమలం అభ్యర్థులు ఆధిక్యం కనబరుస్తున్నారు. కాంగ్రెస్ -3, జేడీఎస్ -2, ఇతరులు ఒక స్థానంలో ముందంజలో ఉన్నారు.

ఉప ఎన్నికల ఫలితాల్లో బీజేపీ స్పష్టమైన ఆధిక్యంలో కొనసాగుతుండడంతో నేతలు సంబురాలు జరుపుకుంటున్నారు. ఆ రాష్ట్ర ముఖ్యమంత్రి యడియూరప్ప సంతోషం వ్యక్తం చేశారు. కుమారుడు విజయేంద్రతో సంబరాలు జరుపుకున్నారు. ఒకరినొకరు స్వీట్లు తినిపించుకున్నారు. ఈ సందర్భంగా విజయేంద్ర తండ్రి ఆశీర్వాదాన్ని తీసుకున్నారు. కౌంటింగ్ కేంద్రాల వద్ద భారీ బందోబస్తు ఏర్పాటు చేశారు. 

* ఓటమని అంగీకరిస్తున్నట్లు కాంగ్రెస్ సీనియర్ నేత, రాష్ట్ర మాజీ మంత్రి డీకే శివకుమార్ వెల్లడించారు. ఇందుకు బాధ పడాల్సిన అవసరం లేదనే అభిప్రాయం వ్యక్తం చేశారు. 
* బీజేపీ ఎంపీ తేజస్వీ సూర్య హర్షం వ్యక్తం చేశారు. సీఎం యడియూరప్ప నాయకత్వంలో కర్ణాటకలో బీజేపీ సుస్థిరమైన సమర్థవంతమైన పాలన అందించనుందని తెలిపారు. 
* యడియూరప్ప ప్రభుత్వానికి స్పష్టమైన మెజారిటీ రావాలంటే ఆరు స్థానాల్లో బీజేపీ కచ్చితంగా గెలవాల్సిందే. 
* ఎగ్జిట్‌ పోల్స్‌ అన్నీ బీజేపీకి పట్టం కట్టడంతో సీఎం యడియూరప్ప ధైర్యంగా ఉన్నారు. 

* బీజేపీ, కాంగ్రెస్‌ మొత్తం 15 స్థానాల్లో… జేడీఎస్‌ 12చోట్ల బరిలో ఉన్నాయి.
* డిసెంబర్ 5 వ తేదీన 15 అసెంబ్లీ నియోజకవర్గాలకు ఉప ఎన్నికలు జరిగాయి. 66.25 శాతం పోలింగ్ నమోదైంది. 
* 224 స్థానాలున్న కర్ణాటక అసెంబ్లీలో ఇద్దరు ఎమ్మెల్యేలపై న్యాయస్థానాల్లో వ్యాజ్యాలుండటంతో రెండు నియోజకవర్గాలకు ఎన్నికలు జరగలేదు. 
* దీంతో అసెంబ్లీలో మిగిలిన 222కుగాను మ్యాజిక్ నెంబర్ 112. ప్రస్తుతం బీజేపీకి 105 మంది ఎమ్మెల్యేల బలం ఉంది. స్పీకర్‌తో పాటు మరో ఇండిపెండెంట్ ఎమ్మెల్యే కూడా బీజేపీకి మద్దతిస్తున్నారు
* అనర్హతకు గురైన బీజేపీ తరపున ఎన్నికల బరిలో నిలబడిన రమేశ్ జార్ఖి హోళి గోకాక్ నియోజకవర్గం నుంచి గెలుపొందారు. 

Read More : ఉల్లి దొంగను చితక్కొట్టేశారు : డిమాండ్ అలా ఉంది మరి