సరిహద్దు, తీర ప్రాంత భద్రతకు లక్ష మంది NCC కేడెట్లు : మోడీ

సరిహద్దు, తీర ప్రాంత భద్రతకు లక్ష మంది NCC కేడెట్లు : మోడీ

NCC cadets వరదలు లేదా ప్రకృతి వైపరీత్యాలు ఏం వచ్చినా ఎన్​సీసీ కేడెట్లు దేశానికి ఎంతగానో సేవ చేశారని ప్రధాని మోడీ ప్రశంసించారు. గురువారం ఢిల్లీలోని కరియప్ప మైదానంలో జరిగిన నేషనల్​ కేడెట్ కార్ప్స్ (ఎన్​సీసీ) పరేడ్​కు ప్రధాని హాజరయ్యారు. ఎన్​సీసీ కేడెట్ల గౌరవ వందనం స్వీకరించారు. ఈ సందర్భంగా ప్రసంగించిన ప్రధాని.. ఎన్​సీసీ చేస్తోన్న సేవలను కొనియాడారు. దేశానికి సేవ చేయడంలో ఎన్​సీసీ ఎప్పడూ ముందుందని కితాబిచ్చారు.

కరోనా సమయంలో లక్షలాది మంది కేడెట్లు అధికార యంత్రాంగానికి, సమాజానికి ఎంతో సహాయపడ్డారని మోడీ అన్నారు.సమాజంలో ఎన్​సీసీ పాత్రను ప్రభుత్వం ఇంకా విస్తరించాలనుకుంటోందన్నారు. సరిహద్దు, తీర ప్రాంతాల్లో భద్రతను బలోపేతం చేసేందుకు ఎన్​సీసీని మరింత శక్తిమంతం చేస్తామన్నారు.

దేశంలోని సరిహద్దు, తీర ప్రాంతాల్లోని 175 జిల్లాల్లో ఎన్​సీసీకి కొత్త బాధ్యతలు అప్పగిస్తామని గత ఏడాది పంద్రాగస్టున ప్రకటించినట్లు మోడీ పేర్కొన్నారు. ఇందుకోసం లక్ష మంది కేడెట్లకు సైన్యం, వాయుసేన, నేవీ శిక్షణ ఇస్తున్నట్లు తెలిపారు. ఇందులో మూడింట ఒకవంతు మంది బాలికలు ఉన్నట్లు చెప్పారు.