Parliament : రైతు చట్టాల రద్దు బిల్లుకు పార్లమెంట్ ఆమోదం – Live Updates

పార్లమెంట్ వింటర్ సెషన్- తొలిరోజు రచ్చరచ్చే..! - Live Updates

10TV Telugu News

Parliament Winter Session : ఉదయం 11 గంటలకు పార్లమెంటు శీతాకాల సమావేశాలు ప్రారంభం అయ్యాయి. డిసెంబర్ 23 వరకు సమావేశాలు కొనసాగుతాయి. కోవిడ్ నిబంధనల ప్రకారం అన్ని జాగ్రత్తలు తీసుకున్నామని పార్లమెంట్ వర్గాలు తెలిపాయి. మీడియా ప్రవేశం పైనా పలు ఆంక్షలు విధించారు. కీలకమైన వ్యవసాయ చట్టాలను రద్దు సహా మొత్తం 26 కీలక బిల్లులను శీతాకాల సమావేశాల్లో ప్రవేశపెట్టేందుకు ప్రభుత్వం సిద్ధమైంది.

లోక్ సభలో వ్యవసాయ చట్టాల రద్దు బిల్లును ప్రవేశపెట్టారు వ్యవసాయ శాఖ మంత్రి నరేంద్ర సింగ్ తోమర్. బిల్లును లోక్ సభ చర్చ లేకుండానే మూజువాణి ఓటుతో ఆమోదించింది. వెంటనే రాజ్యసభలోనూ ప్రవేశపెట్టారు. ఈ మధ్యాహ్నం 2 గంటలకు ప్రారంభమైన రాజ్యసభ బిల్లును ఆమోదించింది. దీంతో… రైతు చట్టాల రద్దు బిల్లు పార్లమెంట్ గడప దాటింది. రద్దు వ్యవహారంలో రెండు కీలక ఘట్టాలు పూర్తయ్యాయి. ఇక రాష్ట్రపతి ఆమోదమే తరువాయి. వ్యవసాయ చట్టాల రద్దు బిల్లుపై చర్చ సందర్భంగా వ్యవసాయం, రైతుల కోసం కొత్తగా కమిటీ ఏర్పాటును ప్రకటించనున్నారు ప్రధాని మోడీ.

 

  • రైతు చట్టాల రద్దు బిల్లుకు రాజ్యసభ ఆమోదం

    రాజ్యసభలో వ్యవసాయ చట్టాల రద్దు బిల్లు ఆమోదం పొందింది.  కాంగ్రెస్ సహా విపక్షాలు చర్చకు పట్టుబట్టినా … ఉపసంహరణ బిల్లుపై చర్చ ఎందుకని అధికారపక్షం ప్రశ్నించింది. దీంతో… చర్చ లేకుండానే ఉపసంహరణ బిల్లును పాస్ చేసింది రాజ్యసభ. మూజువాణి ఓటుతో బిల్లును పాస్ అయింది. ఆ తర్వాత.. 30 నిమిషాల పాటు రాజ్యసభ వాయిదా పడింది.

  • రైతు చట్టాల రద్దు బిల్లుకు లోక్ సభ ఆమోదం

    3 రైతు చట్టాల రద్దు బిల్లుకు లోక్ సభ ఆమోదం తెలిపింది. వ్యవసాయ శాఖ మంత్రి తోమర్ ఈ బిల్లును లోక్ సభలో ప్రవేశపెట్టారు. 3 వ్యవసాయ చట్టాల ఉపసంహరణ బిల్లుకు టీఆర్ఎస్ సహా విపక్షాల ఆందోళన నడుమ లోక్ సభ ఆమోదం తెలిపింది. చర్చ లేకుండానే మూజువాణి ఓటుతో బిల్లును ఆమోదించింది లోక్‌సభ.

  • వాయిదా తీర్మానాలు తిరస్కరణ

    వివిధ పార్టీలకు చెందిన పార్లమెంట్ సభ్యులు ఇచ్చిన వాయిదా తీర్మానాలు తిరస్కరించారు లోక్ సభ స్పీకర్ ఓం బిర్లా. తెలంగాణ లో ధాన్యం కొనుగోళ్ల పై నామా నాగేశ్వరరావు, రేవంత్ రెడ్డి ఇచ్చిన వాయిదా తీర్మానాలు తిరస్కరించారు.

  • వాయిదా తర్వాత ప్రారంభమైన లోక్ సభ

    వాయిదా తర్వాత ప్రారంభమైన లోక్ సభ లో సభ్యులు నినాదాలు చేస్తూ.. సీన్ రిపీట్ చేస్తున్నారు.

  • సంతాప సూచకంగా రాజ్యసభ గంట పాటు వాయిదా

    సిట్టింగ్ ఎంపీ ఆస్కార్ ఫెర్నాండెజ్  మృతికి నివాళిగా రాజ్యసభ గంట పాటు వాయిదా పడింది.

  • లోక్ సభలో నినాదాలు… మధ్యాహ్నానికి వాయిదా

    లోక్ సభ ప్రారంభమైన కొద్ది నిమిషాలకే ప్రతిపక్షాలు స్లోగన్స్ మొదలుపెట్టారు. కొత్త సభ్యుల ప్రమాణం, మృతి చెందిన సభ్యులకు సంతాప తీర్మానం తర్వాత ప్రతిపక్షాలు నినాదాలు ఇచ్చాయి. దీంతో…  మధ్యాహ్నానికి వాయిదా వేశారు స్పీకర్ ఓం బిర్లా.

  • సోనియా, రాహుల్ సభకు వచ్చారిలా..!

  • సర్కారు వ్యూహాలపై ప్రధాని ఆధ్వర్యంలో కేంద్రమంత్రుల సమావేశం

    పార్లమెంట్ వింటర్ సెషన్ నిర్వహణ, సవాళ్లు ఎదుర్కోవడంపై కేంద్ర ప్రభుత్వం సీరియస్ గా దృష్టిపెట్టింది. సెషన్ ప్రారంభానికి ముందు ప్రధాన మంత్రి నరేంద్రమోదీ ఆధ్వర్యంలో కీలక సమావేశం జరిగింది.  రక్షణ శాఖ మంత్రి రాజ్ నాథ్ సింగ్, హోంమంత్రి అమిత్ షా, వ్యవసాయ శాఖ మంత్రి నరేంద్ర సింగ్ తోమర్, వాణిజ్య శాఖ మంత్రి పియూష్ గోయల్, పార్లమెంటరీ వ్యవహారాల శాఖ మంత్రి ప్రహ్లాద్ జోషి ఈ సమావేశంలో పాల్గొన్నారు. సభ నియమాలను ఉల్లంఘించే పార్టీ సభ్యుల బహిష్కరించేందుకైనా వెనుకాడకూడదని ఈ సమావేశంలో ప్రభుత్వం నిర్ణయించినట్టు సమాచారం.

  • ప్రారంభమైన పార్లమెంట్.. కొత్త ఎంపీల ప్రమాణం

    11 గంటలకు పార్లమెంట్ రెండు సభలు ప్రారంభమయ్యాయి. కొత్తగా సభలకు ఎన్నికైన సభ్యులతో లోక్ సభ స్పీకర్ ఓం బిర్లా, రాజ్యసభ చైర్మన్ వెంకయ్య నాయుడు ప్రమాణ స్వీకారం చేయించారు.

  • పార్లమెంట్ ఆవరణలో సోనియా ఆధ్వర్యంలో నిరసన

    3 సాగు చట్టాలు రద్దు చేయాలంటూ పార్లమెంట్ గాంధీ విగ్రహం దగ్గర ప్రతిపక్షాలు ధర్నా చేశాయి. కాంగ్రెస్ తాత్కాలిక అధినేత్రి సోనియాగాంధీ ఆధ్వర్యంలో ఈ ప్రొటెస్ట్ నిర్వహించారు. రాహుల్ గాంధీ సహా విపక్ష నేతలు పాల్గొన్నారు.

    పార్లమెంటు ఆవరణలో గాంధీ విగ్రహం ఎదుట కాంగ్రెస్ ఎంపీల ఆందోళన

    సోనియాగాంధీ నేతృత్వంలో వ్యవసాయ చట్టాలు రద్దు,పంటల మద్దతు ధరకు చట్టబద్దత,రైతు సమస్యలు పరిష్కరించాలని నిరసన

    సోనియాగాంధీ, రాహుల్ గాంధీతో గాంధీ విగ్రహం ఎదుట నిరసనలో పాల్గొన్న తెలంగాణ కాంగ్రెస్ ఎంపీలు రేవంత్ రెడ్డి,ఉత్తమ్ కుమార్ రెడ్డి

  • పార్లమెంట్ సెషన్ కు సహకరించండి – ప్రధాని మోడీ

    పార్లమెంట్ సమావేశాలకు హాజరవుతూ ప్రధాని మోడీ మీడియాతో మాట్లాడారు. శీతాకాల సమావేశాలు సజావుగా సాగేందుకు సహకరించాలని ప్రతిపక్షాలను కోరారు. “ఇది చాలా ముఖ్యమైన సెషన్. సమస్యలపై చర్చించి పరిష్కరించేలా సభ జరగాలని దేశ ప్రజలు కోరుకుంటున్నారు. తమ ఆకాంక్షల మేరకు భవిష్యత్ ఉండాలని దేశ ప్రజలు కోరుకుంటున్నారు. ప్రతిపక్షాలు ఏ సవాల్ విసిరినా సమాధానం చెప్పేందుకు మేం సిద్ధంగా ఉన్నాం. పార్లమెంట్ కు మనం అంశాలపై చర్చిద్దాం. సభ మర్యాదను కాపాడదాం. కరోనా కొత్త వేరియంట్ దృష్టిలో పెట్టుకుని అందరం జాగ్రత్తగా ఉందాం’ అని మోడీ చెప్పారు.

  • విపక్షాల భేటీకి టీఎంసీ దూరం

    పార్లమెంట్ లో విపక్ష నేతలు సమావేశం అయ్యారు. ప్రతిపక్ష నేత మల్లిఖార్జున ఖర్గే నేతృత్వంలో ఈ సమావేశం జరిగింది. పార్లమెంట్ లో విపక్షాల ఐక్యత, ప్రజా సమస్యలపై ప్రభుత్వాన్ని ఐక్యంగా ప్రశ్నించడం, ఫ్లోర్ కోర్డినేషన్ అంశాలపై చర్చించారు విపక్ష నేతలు. కాంగ్రెస్ ఏర్పాటు చేసిన విపక్షాల భేటీకి టీఎంసీ దూరంగా ఉంది.

  • విపక్షాల్లో కొరవడిన ఐక్యత

    కాంగ్రెస్ టీఎంసీ మధ్య మారిన రాజకీయ పరిణామాల నేపథ్యంలో విపక్షాల ఐక్యతపై గందరగోళం నెలకొంది.

    సమావేశాల్లో సమన్వయం కోసం కాంగ్రెస్ ఏర్పాటు చేసిన ఫ్లోర్ లీడర్ల సమావేశానికి హాజరు కాకూడదని నిర్ణయించుకుంది తృణమూల్ కాంగ్రెస్.

    ఆంధ్రప్రదేశ్ ,తెలంగాణ రాష్ట్రాలకు సంబంధించిన పలు అంశాలను లేవనెత్తేందుకు వైసీపీ, టీఆర్ఎస్, టీడీపీ సిద్ధమయ్యాయి.

  • ప్రతిపక్షాల అజెండా ఇదే..!

    పంటలకు కనీస మద్దతు ధరకు చట్టబద్ధత, చనిపోయిన రైతులకు శ్రద్ధాంజలి, నష్టపరిహారం, కేసుల ఎత్తివేత అంశాలతో పాటు.. విద్యుత్ సవరణ చట్టం బిల్లు ఉపసంహరణను కాంగ్రెస్ సహా ప్రతిపక్షాలు సభలో లేవనెత్తాలని ప్రయత్నిస్తున్నాయి.

    పంటలకు కనీస మద్దతు ధర అంశంతో పాటు పెరుగుతున్న చమురు ధరలు, నిత్యావసర వస్తువుల ధరల పెరుగుదల, ద్రవ్యోల్బణం ,కేంద్ర దర్యాప్తు సంస్థ దుర్వినియోగం, కోవిడ్ బాధిత కుటుంబాలకు నష్టపరిహారం, నిరుద్యోగం, చట్టసభల్లో మహిళలకు రిజర్వేషన్లు, సరిహద్దు రాష్ట్రాల్లో బిఎస్ఎఫ్ పరిధి పెంపు అంశాలపై కూడా చర్చ జరగాలంటున్నాయి విపక్షాలు.

  • వరి కొనుగోలుపై లోక్ సభలో టీఆర్ఎస్ వాయిదా తీర్మానం

    రైతుల నుంచి ఆహారధాన్యాల సేకరణపై జాతీయ విధానం రూపొందించాల్సిన అవసరం ఉందని దీనిపైన సభలో చర్చించాలని లోక్ సభలో వాయిదా తీర్మానం ఇచ్చారు టీఆర్ఎస్ పక్ష నేత నామా నాగేశ్వరరావు.

×