అధికారుల ఆదేశాలతో..5నెలల చిన్నారితో విధుల్లోకి మహిళా కండక్టర్

అధికారుల ఆదేశాలతో..5నెలల చిన్నారితో విధుల్లోకి మహిళా కండక్టర్

up ఉత్తర్​ప్రదేశ్​లో ఓ మహిళా బస్​ కండక్టర్​ తన ఐదు నెలల పసికందును చంకనెత్తుకుని విధులు నిర్వర్తిస్తున్నారు. గోరఖ్​పుర్​ నుంచి పద్రౌనా మధ్యలో నడిచే బస్సులో పసికందును చంకనెత్తుకుని టికెట్లు ఇస్తోంది. మహిళా బస్​ కండక్టర్​ పాట్లు అందరినీ ఆలోచింపజేస్తున్నాయి.

యూపీకి చెందిన శిప్రా దీక్షిత్​ డిసీస్​​డ్​ డిపెండెంట్​ కోటాలో ఉద్యోగం పొంది 2016 నుంచి టికెట్ కండక్టర్​గా పనిచేస్తోంది. అయితే 2020 జులై 25 నుంచి ఆరు నెలలపాటు ఆమె ప్రసూతి సెలవుల్లో ఉన్నారు. 2020, ఆగస్టు 21న ఓ పాపకు శిప్రా దీక్షిత్ జన్మనిచ్చింది. ఆరు నెలల సెలవులు ముగియడంతో శిప్రా దీక్షిత్ జనవరి-19,2021న తిరిగి విధుల్లో చేరింది. పసిపాప ఆలనా పాలనా చూసుకోనే వీలు ఉండేందుకు కండక్టర్​గా కాకుండా కార్యాలయానికి బదిలీ చేయాలని ఉన్నతాధికారులకు విజ్ఞప్తి చేసినా అధికారులు తిరస్కరించారు. విధులకు హాజరు కావాల్సిందేనని ఆదేశించారు. దీంతో ఉద్యోగం పోతుందనే భయంతో ఐదు నెలల పసికందుతోనే శిప్రా దీక్షిత్ విధులు నిర్వర్తిస్తోంది.

ఎమ్మెస్సీ కెమిస్ట్రీ టాపర్​గా నిలిచిన తనపట్ల అధికారులు వివక్షను చూపిస్తున్నారని శిప్రా దీక్షిత్ చెబుతోంది. అన్ని అర్హతలున్నా పదోన్నతి రాలేదని వాపోతుంది. తనకన్నా తక్కువ అనుభవం ఉన్నవారికి కార్యాలయ పనులు అప్పగించారని శిప్రా తెలిపింది.

ఇక, ఈ విషయమై స్పందించిన అసిస్టెంట్​ రీజనల్​ మేనేజర్​ కేకే తివారీ.. కండక్టర్ ఉద్యోగ స్వభావమే అలాంటిదన్నారు. శిప్రాకు ప్రసూతి సెలవులు ఇచ్చామని, పిల్లల సంరక్షణ సెలవులు రవాణా శాఖలో లేనందున ఎలాంటి సహాయం చేయలేమని అన్నారు. ఆమెకు కార్యాలయ పనులు అప్పగించాలంటే ఉన్నతాధికారుల అనుమతి అవసరమని తెలిపారు. అయితే, మిషన్​ శక్తి వంటి పథకాలతో మహిళా సాధికారత కోసం కృషి చేస్తున్నామని ప్రభుత్వం గొప్పలు చెబుతున్నా..ఆ రాష్ట్ర రోడ్డు రవాణా శాఖలో ఇప్పటికీ పిల్లల సంరక్షణ సెలవులు లేకపోవడం గమనార్హం.