BRS: తెలంగాణ దాటి విస్తరిస్తున్న బీఆర్ఎస్.. ఛత్తీస్‌గఢ్‌లో ‘చెయ్యి’ అందిచనున్న కీలక నేత!
ఛత్తీస్‌గఢ్‌లో జాతీయ పార్టీలైన బీజేపీ, కాంగ్రెస్ పార్టీలు బలంగా ఉన్నాయి. ఇప్పటి వరకు ఆ రెండు పార్టీల మధ్యే అధికారం బదిలీ అవుతోంది. అయితే వాటికి గట్టి పోటీనిచ్చే ప్రాంతీయ పార్టీగా అవతరించాలని జేసీసీ(జే) లక్ష్యంగా పెట్టుకుంది. ఇందులో భాగంగా 2018 అసెంబ్లీ ఎన్నికల్లో పోటీకి దిగిన ఆ పార్టీ, 57 స్థానాల్లో పోటీ చేసి ఐదు స్థానాల్లో విజయం సాధించింది
- Published By: 10TV Digital Team ,Published On : February 4, 2023 / 05:44 PM IST
As BRS finds one more friend, now from chattisgarh
BRS: దేశ రాజకీయాల్లో ఎదగాలనుకుంటున్న కేసీఆర్ ఆలోచనలకు ఊతం లభిస్తున్నట్లే కనిపిస్తోంది. కొద్ది రోజుల క్రితమే ఒడిశా మాజీ ముఖ్యమంత్రి గిరిధర్‌ గమాంగ్‌ సహా ఆయన కుటుంబ సభ్యులు కేసీఆర్ నేతృత్వంలోని భారత్ రాష్ట్ర సమితిలో చేరారు. తాజాగా ఛత్తీస్‌గఢ్ నుంచి కూడా భారాసకు మద్దతు లభించినట్లే కనిపిస్తోంది. ఆ రాష్ట్రానికి చెందిన జనతా కాంగ్రెస్ ఛత్తీస్‌గఢ్(జే) అధినేత అమిత్ అజిత్ జోగి తాజాగా ముఖ్యమంత్రి కేసీఆర్ను హైదరాబాద్లో కలుసుకున్నారు. ఆ రాష్ట్రంలో భారాసతో కలిపి ఆయన పొత్తు పెట్టుకోనున్నట్లు రాజకీయ వర్గాల్లో చర్చ సాగుతోంది.
తెలంగాణతో ఒడిశాతో పాటు ఛత్తీస్‌గఢ్ సరిహద్దు రాష్ట్రాలు. పైగా దక్షిణాదిలో లేని రాష్ట్రాలు. దీంతో ఈ రెండు రాష్ట్రాల్లో కనుక భారాస కాస్తంత ప్రభావం చూపినా దేశ రాజకీయాల్లోకి కేసీఆర్ ప్రవేశించినట్లే అంటున్నారు. కాగా, ఈ మీటింగ్ అనంతరం అమిత్ జోగి మీడియాతో మాట్లాడుతూ, ఈ ఏడాది చివర్లో జరిగే ఛత్తీస్‌గఢ్ అసెంబ్లీ ఎన్నికలకు ముందు తనకు లభించే ఎలాంటి ప్రతిపాదననైనా స్వాగతిస్తానని అన్నారు. గతంలో కాంగ్రెస్ పార్టీలో ఉన్న జోగి, ఆ పార్టీ నుంచి విడిపోయి సొంత పార్టీ పెట్టుకున్నారు. ఈయన ఛత్తీస్‌గఢ్ మొదటి ముఖ్యమంత్రి అజిత్ జోగి తనయుడు.
ఛత్తీస్‌గఢ్‌లో జాతీయ పార్టీలైన బీజేపీ, కాంగ్రెస్ పార్టీలు బలంగా ఉన్నాయి. ఇప్పటి వరకు ఆ రెండు పార్టీల మధ్యే అధికారం బదిలీ అవుతోంది. అయితే వాటికి గట్టి పోటీనిచ్చే ప్రాంతీయ పార్టీగా అవతరించాలని జేసీసీ(జే) లక్ష్యంగా పెట్టుకుంది. ఇందులో భాగంగా 2018 అసెంబ్లీ ఎన్నికల్లో పోటీకి దిగిన ఆ పార్టీ, 57 స్థానాల్లో పోటీ చేసి ఐదు స్థానాల్లో విజయం సాధించింది. ఆ ఎన్నికల్లో 7.6% ఓట్లు సాధించింది. అయితే, 2020లో అజిత్ జోగి మరణం అనంతరం ఆ పార్టీ సభ్యుల సంఖ్య 2కి తగ్గింది. ఒకరు బీజేపీలో చేరగా, మరో రెండు స్థానాల్లో ఉప ఎన్నికలు జరిగితే ఆ రెండు స్థానాలకు కాంగ్రెస్ కైవసం చేసుకుంది.
