Categories
Latest National Weather

తీరం తాకిన నిసర్గ తుఫాన్, ముంబైని ముంచెత్తిన వర్షాలు

రెండు రాష్ట్రాలను(మహారాష్ట్ర, గుజరాత్) భయపెట్టిన నిసర్గ తుఫాన్(Nisarga Cyclone) తీరాన్ని తాకింది. బుధవారం (జూన్ 3,2020) మధ్యాహ్నం 1 గంటకు ముంబై సమీపంలోని అలీబాగ్ ప్రాంతంలో తుఫాన్ తీరాన్ని తాకింది. తుఫాన్ ధాటికి అరేబియా సముద్రం అల్లకల్లోలంగా మారింది. వందల కిమీ వేగంతో గాలులు వీస్తున్నాయి. ముంబై తీరంలో అలలు ఎగిసిపడుతున్నాయి. మరికొన్ని గంటల్లో తుఫాన్ పూర్తిగా తీరం దాటే అవకాశం ఉందని వాతావరణ అధికారులు తెలిపారు. తుఫాన్ తీరం దాటిన తర్వాత 6 గంటల పాటు వర్షాలు కురుస్తాయని చెప్పారు. ఉత్తర మహారాష్ట్ర, దక్షిణ గుజరాత్ లో భారీ వర్షాలు పడుతున్నాయి. తుఫాన్ ప్రభావంతో కర్నాటక, గోవా, మధ్యప్రదేశ్ లోనూ వర్షాలు కురుస్తున్నాయి. రాయ్ గఢ్, ముంబైలో ఇప్పటికే భారీ వానలు పడుతున్నాయి.

ముంబైలో సహాయక చర్యలకు 30 ఎన్డీఆర్‌‌ఎఫ్ బృందాలు సిద్ధంగా ఉన్నాయని అధికారులు చెప్పారు. తుఫాన్ ప్రభావం గుజరాత్‌పై కూడా ఎక్కువగా ఉందని అన్నారు. ఈ మేరకు అక్కడ కూడా చర్యలు అనేక చర్యలు చేపట్టారు. సముద్ర తీరంలో ఉన్న ప్రజలను సురక్షిత ప్రాంతాలకు తరలించారు. మహారాష్ట్ర, గుజరాత్‌ సీఎంలతో ప్రధాని మోడీ ఫోన్‌లో మాట్లాడి పరిస్థితి గురించి ఆరా తీశారు. ఇప్పటికే కరోనాతో అతలాకుతలమవుతున్న ముంబై సిటీని ‘నిసర్గ’ తుఫాను వణికిస్తోంది. వారం పది రోజుల వ్యవధిలో దేశం ఎదుర్కొంటున్న రెండో తుఫాను ఇది. వందేళ్ల తర్వాత ముంబైకి తుఫాను ముప్పు రావడం ఇదే.

Read: 100 ఏళ్ల తరువాత ముంబైపై అరేబియా ఆగ్రహం..దూసుకొస్తున్న ‘నిసర్గ’ తుపాను 

Categories
National Political

భారత్ నేవీ ముందడుగు : ఐఎన్‌ఎస్‌ విక్రమాదిత్యపై తేజస్‌ లాండింగ్‌ సక్సెస్

భారత నావికా దళం శనివారం, జనవరి11న,  మరో  సాహస ప్రక్రియను పూర్తి చేసింది. అతిపెద్ద యుద్ధ వాహక నౌక ఐఎన్‌ఎస్‌ విక్రమాదిత్యపై తేజస్‌ లైట్‌ కంబాట్‌ యుద్ధవిమానం విజయవంతంగా లాండ్ చేసింది. ఇది భారత్ దేశీయంగా తయారు చేసిన తొలి ఎల్సీఏ తేజాస్ విమానం.   

ఈ సందర్భంగా నెవీ అధికారులు మాట్లాడుతూ… తీరం వెంబడి యుద్ధ కార్యకలాపాలకు దేశీయంగా తయారు చేసిన సాంకేతికత ఉపయోగపడే విషయం నిరూపితమైందన్నారు. భారత నెవీ కోసం ట్విన్‌ ఇంజిన్‌ యుద్ధ విమానాలు తయారు చేసేందుకు మార్గం సుగమం అయిందని వెల్లడించారు. 

ఇప్పటి వరకు యూఎస్‌, రష్యా, ప్రాన్స్‌, యూకే, చైనా దేశాల్లో తయారైన జెట్లతో ప్రయోగాలు నిర్వహించాం. ఈ రోజు భారత్‌ దేశీయంగా రూపొందించిన ఎల్‌సీఏ తేజస్‌ విమానంతో విజయవంతంగా ప్రయోగం పూర్తి చేశామన్నారు. ఎల్‌ఏసీ తేజస్‌ యుద్ధ విమానం ఇటీవలే వైమానిక దళంలో చేరింది.

 

Categories
National Weather

అతి తీవ్ర తుపానుగా “మహా”

అరేబియా సముద్రంలో కొనసాగుతున్న మహా తీవ్ర తుపాను పశ్చిమ వాయువ్య దిశగా పయనించి తూర్పు మధ్య అరేబియా సముద్ర తీర ప్రాంతంలో గుజరాత్ లోని వీరవల్ కి దక్షిణ నైరుతి దిశగా 540 కిలోమీటర్ల దూరంలో కేంద్రీకృతమై ఉంది. ఆదివారం (నవంబర్ 3, 2019) నాటికి తీవ్ర తుపానుగా మారే అవకాశం ఉందని హైదరాబాద్ వాతావరణ కేంద్రం అధికారులు తెలిపారు. 

మరో వైపు గల్ఫ్ ఆఫ్ ధాయిలాండ్ దాని పరిసర ప్రాంతాల్లో ఉపరితల ఆవర్తనం కొనసాగుతోందని దీని ప్రభావం వల్ల సోమవారం (నవంబర్, 4) ఉత్తర అండమాన్ సముద్ర ప్రాంతంలో అల్పపీడనం ఏర్పడే అవకాశం ఉందని వాతావరణ శాఖ హెచ్చరించింది. 

ఇది పశ్చిమ వాయువ్య దిశగా ప్రయాణించి.. రెండు మూడు రోజుల్లో  తూర్పు మధ్య బంగాళాఖాతంలో వాయుగుండగా మారే అవకాశం ఉంది. దీని ప్రభావం వల్ల రాష్ట్రంలో ఆది, సోమ వారాల్లో కొన్ని చోట్ల ఉరుములు మెరుపులతో కూడిన తేలికపాటి నుంచి ఓ మోస్తరు వర్షాలు కురిసే అవకాశం ఉందని వాతావరణ శాఖ అధికారులు వివరించారు.

Categories
National Weather

మరి కొద్ది గంటల్లో ముంచుకురానున్న క్యార్ తుఫాన్

తిత్లీ తుఫాన్ ధాటికి నష్టం నుంచి కోలుకో లేదు. సహాయక చర్యలు పూర్తికానే లేదు. బీభత్సం సృష్టించేందుకు మరో తుఫాన్ సిద్ధమైంది. తూర్పు మధ్య అరేబియా సముద్రంలో ఏర్పడిన అల్పపీడనం త్వరగా బలపడుతూ.. శనివారం సాయంత్రం నాటికి ప్రభంజనం సృష్టిస్తుందని వాతావరణ శాఖ వెల్లడించింది. 

మహారాష్ట్ర తీరంవైపు కదులుతోన్న అల్పపీడనం కారణంగా కర్నాటక, మహారాష్ట్రలకు తుఫాను తీసుకురానుంది. గురువారం నుంచే సూచనలు కనిపిస్తుండటంతో జాగ్రత్తగా ఉండాలని వాతావరణ శాఖ హెచ్చరిస్తూ ఉంది. 

శుక్రవారం ఉదయానికి మహారాష్ట్రలోని రత్నగిరి ప్రాంతం నుంచి ముంబైకు 240కి.మీ నుంచి 380ల వేగంతో ప్రయాణించనుంది. దీని కారణంగా ఓ ఐదు రోజుల పాటు వర్షాలు పడే సూచనలు ఉన్నట్లు వెల్లడించారు. దీంతో గంటకు 60 నుంచి 70కిలీమీటర్ల వేగంతో గాలులు వీచే అవకాశాలు ఉన్నట్లు అధికారులు తెలిపారు. 

అక్టోబర్ 28 నుంచి 31 వరకు ప్రజలు క్యార్ తుఫాను నుంచి అప్రమత్తతతో ఉండాలని వాతావరణశాఖ హెచ్చరించింది. ఇప్పటికే రెడ్ అలర్ట్ జారీ చేశారు. ఈ ప్రభావంతో కర్నాటక, గోవా తీరప్రాంతాల్లో సాధారణ నుంచి భారీ వర్షాలు కురిసే అవకాశం ఉన్నట్లు వాతావరణ శాఖ హెచ్చరించింది. 24 గంటల్లో సింధుదుర్గ్ జిల్లాకు 204.5 మిల్లీమీటర్ల వర్షపాతం నమోదయ్యే అవకాశాలు ఉన్నాయని వాతావరణశాఖ పేర్కొంది. 

Categories
Hyderabad

తెలంగాణకు భారీ వర్ష సూచన : అరేబియా సముద్రంలో అల్పపీడనం

తెలంగాణ రాష్ట్రంలో వానాకాలం ముగిసినా..వర్షాలు దంచికొడుతున్నాయి. భారీ వర్షాలు కురుస్తుండడంతో రైతులు తీవ్ర ఆవేదన వ్యక్తం చేస్తున్నారు. తాజాగా మరో భారీ వర్ష సూచన చేసింది వాతావరణ శాఖ. తూర్పు మధ్య అరేబియా సముద్రంలో అల్పపీడనం, దీనికి అనుబంధంగా ఉపరితల ఆవర్తనం కొనసాగుతోందని వాతావరణ శాఖ అధికారులు వెల్లడించారు. తూర్పు మధ్య అరేబియా సముద్రం నుంచి విదర్భ వరకు ఉత్తర ఇంటీరియర్ కర్ణాటక, తెలంగాణ మీదుగా ఉపరితల ద్రోణి ఏర్పడిందన్నారు.

కోమోరిన్ ప్రాంతం నుంచి ఉత్తర కోస్తాంధ్ర వరకు అల్పపీడన ద్రోణి ఏర్పడిందన్నారు. ఈ ప్రభావంతో వచ్చే నాలుగు రోజులు తెలంగాణలో అక్కడక్కడా భారీ వర్షాలు కురుస్తాయని హైదరాబాద్ వాతావరణ కేంద్రం తెలిపింది. చాలా చోట్ల ఉరుములు, మెరుపులతో పాటు తేలికపాటి నుంచి మోస్తరు వర్షాలు కురిసే అవకాశం ఉందని వెల్లడించింది. ఇదిలా ఉంటే..హైదరాబాద్‌తో పాటు ఇతర జిల్లాల్లో భారీ వర్షాలు కురిశాయి. వరంగల్ అర్బన్ జిల్లా ఎలకతుర్దిలో 6.4 సెంటీమీటర్ల వర్షం కురిసింది. గోవిందారావు పేటలో 5.5, మంకాల్‌లో 5.2, కోహెడలో 4.4, బండ్లగూడలో 4.2, కమలాపూర్‌లో 4.1 సెంటీమీటర్ల వర్షపాతం నమోదైంది. 

నగరాన్ని వరుణుడు వీడడం లేదు. భారీ వర్షాలు కురుస్తున్నాయి. 2019 అక్టోబర్ 20వ తేదీ ఆదివారం సాయంత్రం పలు ప్రాంతాల్లో వర్షం పడింది. వర్షాకాలం ముగిసే సమయంలో వానలు పడుతుండడంతో జనజీవనం స్తంభిస్తోంది. చిన్నపాటి వర్షానికే చిత్తడి చిత్తడిగా మారే హైదరాబాద్‌లో భారీ వర్షాలు పడుతుండడంతో ప్రజలు తీవ్ర ఇబ్బందులు పడ్డారు. 
Read More : వెదర్ అప్ డేట్ : తెలంగాణలో 4 రోజులూ భారీ వర్షాలు