Categories
Crime Hyderabad

టీవీ సౌండ్ ఎక్కువ పెట్టాడని కొట్టి చంపాడు

చిన్న విషయం  చిలికి చిలికి గాలివానలా మారి ఒక వ్యక్తినిండు ప్రాణం తీసింది.  టీవీ సౌండ్‌ విషయంలో ఓ వ్యక్తి చేసిన దాడిలో సాత్‌పుతే గిర్మాజీ రాజేందర్‌(40) మృతి చెందాడు. పోలీసులు తెలిపిన వివరాలు.. ఆర్మూర్‌ పట్టణంలోని గోల్‌బంగ్లా ప్రాంతంలోని  రాజేందర్‌ బుధవారం రాత్రి కుటుంబ సభ్యులతో ఇంట్లో టీవి చూస్తున్నాడు

అతని ఇంట్లో అద్దెకు ఉంటున్న బాలనర్సయ్య అనే వ్యక్తి అదే సమయంలో భార్యతో గొడవ పడుతున్నాడు. ఈ క్రమంలో కోపంతో ఉన్న బాలనర్సయ్య తన ఇంటి యజమాని రాజేందర్‌ను టీవీ సౌండ్‌ ఎందుకు ఎక్కువ పెట్టావని తలపై బలంగా కొట్టాడు. దీంతో రాజేందర్‌ అక్కడికక్కడే కుప్పకూలి పోయాడు.

దీంతో అతన్ని ఆసుపత్రికి తీసుకెళ్లగా రాజేందర్‌ను పరీక్షించిన వైద్యులు మృతి చెందాడని నిర్ధారించారు.  పోలీసులు  సంఘటన స్థలాన్ని పరిశీలించారు. అనంతరం మృతదేహాన్ని ప్రభు త్వ ఆస్పత్రికి తరలించారు. కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు. మృతుడికి భార్య, ఒక కొడుకు ఉన్నారు.   

Categories
Nizamabad

నిజామాబాద్‌లో హై టెన్షన్ : రైతన్నల అరెస్టు

నిజామాబాద్‌ జిల్లాలో పసుపు, ఎర్రజొన్న రైతులు చేపట్టిన ఆందోళన  కొనసాగుతోంది. పసుపు, ఎర్రజొన్న పంటలకు మద్దతు ధర  ప్రకటించాలని రైతులు డిమాండ్‌ చేస్తున్నారు. కలెక్టర్‌ వచ్చి సమాధానం చెప్పేవరకు ఆందోళన విరమించేది లేదని తేల్చి చెబుతున్నారు. రైతులు ఆందోళన విరమించేందుకు పోలీసులు జాతీయ రహదారులపై లైట్లు బంద్ చేసినా….  చీకట్లోనే ఆందోళన కొనసాగించారు. అర్ధరాత్రి పోలీసులు అక్కడకు చేరుకుని రైతులను బలవంతంగా అరెస్టు చేసి వ్యాన్‌లలో తరలించారు. దీనితో అక్కడ ఉద్రిక్తత పరిస్థతులు తలెత్తాయి. 

రైతుల ఆందోళనతో నిజామాబాద్‌ జిల్లా అట్టుడికింది. పలు ప్రాంతాల్లో మహాధర్నాకు దిగడం ఉద్రిక్తతలకు  దారి తీసింది. అవసరమైతే ఆమరణ నిరాహార దీక్షకు కూడా  దిగుతామని హెచ్చరించారు. ఫిబ్రవరి 16వ తేదీ శనివారం జక్రాన్‌పల్లి – ఆర్మూర్‌  దగ్గరి 44వ జాతీయ రహదారిపై బైఠాయించి నిరసన తెలిపారు. ఇక్కడే వంటావార్పు చేశారు. అర్ధరాత్రి వరకు రోడ్డుపైనే బైఠాయించారు. పసుపు క్వింటాలుకు 15వేలు, ఎన్నజొన్నకు 3500  రూపాయల చొప్పున చెల్లించాలని డిమాండ్‌ చేస్తున్నారు.