‘ఎఫ్‌2’, ‘వెంకీమామ’ వంటి వరుస బ్లాక్‌బస్టర్‌ హిట్స్‌తో దూసుకెళ్తోన్న విక్టరీ వెంకటేష్ 74వ చిత్రం ‘నారప్ప’ షూటింగ్ అనంత‌పురం జిల్లా ఉర‌వ‌కొండలోని పాల్తూరు గ్రామంలో జనవరి22న ప్రారంభమైంది. తమిళ్‌లో బ్లాక్‌బస్టర్‌ హిట్‌గా సంచలనం సృష్టించిన ‘అసురన్’ చిత్రానికి ఇది రీమేక్. దళిత నేపధ్యంలో తెరకెక్కి తమిళనాడులో వందకోట్లకుపైగా వసూలు చేసింది అసురన్. హీరో ధనుష్ ప్రధాన పాత్రలో వెట్రిమారన్ ఈ చిత్రాన్ని తమిళంలో తెరకెక్కించగా తెలుగులో విక్టరీ వెంకటేష్ ప్రధాన పాత్రలో నటిస్తున్నారు. ఆయనకు జోడిగా ప్రియమణి నటిస్తోంది.
తమిళ్‌లో ఈ సినిమా హత్తుకునే భావోద్వేగాలతో గ్రామీణ నేపథ్యంలో సాగుతూ హృదయాలను దోచుకుంది. దీంతో అదే విధంగా ఈ చిత్రాన్ని రూపొందించాలని భావించిన దర్శక నిర్మాతలు సహజ లొకేషన్స్‌లో చిత్రీకరిస్తున్నారు. ప్రస్తుతం ఈ చిత్రానికి సంబంధించిన యాక్షన్ సీన్స్ తమిళనాడులోని కురుమ‌లైలో జ‌రుగుతున్నాయ‌ని సురేష్ ప్రొడ‌క్ష‌న్ సంస్థ త‌మ ట్విట్ట‌ర్ ద్వారా తెలిపింది.
శ్రీకాంత్ అడ్డాల దర్శకత్వంలో సురేష్ ప్రొడక్షన్స్ ప్రై.లి, వి క్రియేషన్స్ పతాకాలపై డి.సురేష్‌బాబు, కలైపులి ఎస్. థాను సంయుక్తంగా ఈ చిత్రాన్ని నిర్మిస్తున్నారు. ఈ చిత్రం ఫస్ట్ లుక్ పోస్టర్స్‌కి ట్రెమండస్‌ రెస్పాన్స్‌ వచ్చింది.
ప్రస్తుతం తమిళ నాడు లోని కురుమలై లో ప్రముఖ ఫైట్ మాస్టర్ పీటర్ హెయిన్స్ నేతృత్వంలో ‘నారప్ప’ కి సంబంధించి కీలక యాక్షన్ సన్నివేశాలు షూట్ చేస్తున్నారు. ఈ సన్నివేశాల చిత్రీకరణ పూర్తయ్యాక విక్టరీ వెంకటేష్, చిత్ర బృందం అనంతపురంలో షెడ్యూల్ కంటిన్యూ చేస్తారు. సమ్మర్ కి రిలీజ్ ప్లాన్ చేశారు.
విక్టరీ వెంకటేష్ హీరోగా నటిస్తున్న ఈ చిత్రానికి సినిమాటోగ్రఫీ: సామ్‌.కె నాయుడు, ఎడిటర్‌: మార్తాండ్ కె. వెంకటేష్, ఆర్ట్‌: గాంధీ నడికుడికర్‌, కథ: వెట్రిమారన్, ఫైట్స్‌: పీటర్ హెయిన్స్, విజయ్‌, పాటలు : సిరివెన్నెల సీతారామశాస్త్రి, సుద్దాల అశోక్‌ తేజ, అనంతశ్రీరామ్‌, కృష్ణకాంత్‌, కాసర్ల శ్యాం. రాస్తుండగా..సంగీతం: మణిశర్మ అందిస్తున్నారు.
