Categories
Political Telangana

ప్రభుత్వానికి కృతజ్ఞతలు – ఆర్టీసీ జేఏసీ

ఆర్టీసీ కార్మికులను తిరిగి విధుల్లోకి చేర్చుకొనేందుకు ప్రభుత్వం అంగీకరించడం పట్ల జేఏసీ కృతజ్ఞతలు తెలియచేసింది. 2019, నవంబర్ 28వ తేదీ గురువారం తెలంగాణ కేబినెట్ సమావేశమై..ఆర్టీసీ సమ్మెపై ప్రధానంగా చర్చించింది. కార్మికులను విధుల్లోకి చేర్చుకోవాలని, చనిపోయిన కుటుంసభ్యుల్లో ఒకరికి ఉద్యోగం కల్పిస్తామని, తక్షణం రూ. 100 కోట్లు ఆర్టీసీ సంస్థకు ఇస్తున్నట్లు సీఎం కేసీఆర్ వెల్లడించారు. ఈ సందర్భంగా ఆర్టీసీ జేఏసీ నాయకులు 2019, నవంబర్ 29వ తేదీ శుక్రవారం సమావేశమయ్యారు. అనంతరం వారు మీడియాతో మాట్లాడారు. 

31 మంది చనిపోవడం దురదృష్టకరమని, వీరందరికీ ఉద్యోగాలు ఇస్తామని ప్రభుత్వం చెప్పినందుకు ధన్యవాదాలు తెలియచేస్తున్నట్లు ఆర్టీసీ జేఏసీ కన్వీనర్ అశ్వత్థామ రెడ్డి తెలిపారు. తమ పోరాటానికి సహకరించిన సంఘాలకు, రాజకీయ పార్టీలకు అందరికీ ప్రత్యేక కృతజ్ఞతలు తెలియచేస్తున్నామన్నారు. అన్ని రాజకీయ పార్టీలతో నవంబర్ 30వ తేదీ శనివారం సమావేశం ఏర్పాటు చేయడం జరిగిందన్నారు. దేశ చరిత్రలో అపూర్వమైన సమ్మెగా అభివర్ణించారు. మిగతా సమస్యలన్నీ సీఎం కేసీఆర్ పరిష్కరించే దిశగా చర్యలు తీసుకోవావలని కోరారు. 

సమ్మెకాలంలో అకాలమరణం చెందిన వారి కుటుంబసభ్యులకు ప్రగాడ సానుభూతి తెలియచేస్తున్నట్లు ఆర్టీసీ జేఏసీ కో కన్వీనర్ రాజిరెడ్డి తెలిపారు. కేబినెట్ నిర్ణయాన్ని స్వాగతిస్తున్నట్లు, సెప్టెంబర్ మాసానికి చెందిన జీతాలను చెల్లించాలని కోరారు. అయితే..యూనియన్లు రద్దు చేసే అవకాశం ఎవరికీ లేదన్నారు. ట్రేడ్ యూనియన్లు ఉద్యమం చేస్తే..తెలంగాణ రాష్ట్రం ఏర్పడిందన్న విషయాన్ని గుర్తు చేస్తున్నట్లు తెలిపారు. ఆర్టీసీ కార్మికులు, యూనియన్లతో చర్చించి..సమస్యల పరిష్కారానికై కృషి చేయాలన్నారు. ఉద్యమంలో సహకరించిన వారందరికీ కృతజ్ఞతలు తెలియచేస్తున్నట్లు తెలిపారు. 
Read More : ఆర్టీసీలో యూనియన్లకు చెక్ : టీఎంయూ ఆఫీసుకు తాళం

Categories
Political Telangana

బస్ డిపోల వద్ద ఉద్రిక్తత : కార్మికుల అరెస్టు

ఆర్టీసీ కార్మికులు చేపట్టిన సమ్మె 43వ రోజుకు చేరుకుంది. 2019, నవంబర్ 16వ తేదీ శనివారం బస్ రోకోకు పిలుపునిచ్చిన సంగతి తెలిసిందే. దీనికి పోలీసులు ఫర్మిషన్ ఇవ్వలేదు. డిపోల వద్ద 144 సెక్షన్ విధించారు. అయినా..కూడా కార్మికులు పెద్ద సంఖ్యలో డిపోల వద్దకు చేరుకుని ఆందోళన నిర్వహించారు. దీంతో ఉద్రిక్తత నెలకొంది. కార్మికులను అరెస్టు చేసేందుకు ప్రయత్నించడంతో పోలీసులకు వ్యతిరేకంగా నినాదాలు చేశారు. 
ఖమ్మంలో…
ఆర్టీసీ కార్మికులు, వామపక్ష నాయకులు ఖమ్మం డిపో ముందు బైఠాయించి ఆందోళనకు దిగారు. బస్సులను బయటకు రానివ్వకుండా అడ్డుకున్నారు. దీంతో కార్మికులు, పోలీసులకు మధ్య వాగ్వాదం చోటు చేసుకుంది. పలువురు కార్మికులను పోలీసులు అరెస్ట్ చేసి స్టేషన్‌కు తరలించారు. 
మహబూబాబాద్‌లో…
బస్‌రోకోలో భాగంగా మహబూబాబాద్‌లోని ఆర్టీసీ బస్టాండ్ ఎదుట కార్మికులు, అఖిలపక్ష నాయకులు తెల్లవారుజాము నుంచే బైఠాయించారు. ప్రభుత్వానికి, ఆర్టీసీ యాజమాన్యానికి వ్యతిరేకంగా నినాదాలు చేశారు. ప్రభుత్వం చర్చలకు పిలిచి తమ న్యాయమైన డిమాండ్లను నెరవేర్చాలని డిమాండ్ చేశారు. అయితే.. వెంటనే రంగంలోకి దిగిన పోలీసులు.. 60మందిని అరెస్ట్ చేసి పోలీస్ స్టేషన్‌కు తరలించారు. 
జగిత్యాలలో…
జగిత్యాల జిల్లాలో జేఏసీ ఇచ్చిన బస్‌రోకో పిలుపుతో డిపోల వద్ద కార్మికులు ఆందోళన చేశారు. బస్సులను బయటకు రాకుండా అడ్డుకున్నారు. దీంతో ఆందోళనకారులను పోలీసులు అదుపులోకి తీసుకుని స్టేషన్‌కు తరలించారు. డిపోల వద్ద 144 సెక్షన్‌ విధించి ధర్నాలు చేస్తున్న వారిని అదుపులోకి తీసుకున్నారు పోలీసులు. 
రాజన్న సిరిసిల్లలో…
రాజన్న సిరిసిల్ల జిల్లాలో ఆర్టీసీ సమ్మె 43వ రోజు కొనసాగుతోంది.. తమ డిమాండ్లను పరిష్కరించాలంటూ ఆర్టీసీ కార్మికులు ఉదయమే బస్‌ డిపోల ముందు ఆందోళనకు దిగారు. కార్మికులకు మద్దతుగా అఖిలపక్ష నాయకులు పెద్ద ఎత్తున వచ్చి ధర్నా చేశారు.. ప్రభుత్వానికి వ్యతిరేకంగా నినాదాలు చేస్తూ రోడ్డుపై బైఠాయించారు. డిపోల నుంచి బస్సులు బయటకు రాకుండా అడ్డుకునేందుకు ప్రయత్నించారు.. దీంతో ఆందోళన కారులను పోలీసులు అదుపులోకి తీసుకుని స్టేషన్‌కు తరలించారు. 
జోగులాంబ గద్వాల జిల్లాలో…
జోగులాంబ గద్వాల జిల్లా గద్వాల బస్‌స్టాండ్‌లో ఉద్రిక్త వాతావరణం నెలకొంది. కార్మికులను అడ్డుకోవడానికి పోలీసులు ప్రయత్నించడంతో కాస్త ఉద్రిక్తత చోటు చేసుకుంది. అనంతరం కార్మికులను అరెస్టు చేసి పోలీస్ స్టేషన్‌కు తరలించారు. ఉదయం నుండే వివిధ పార్టీలకు చెందిన నేతలను కూడా పోలీసులు అదుపులోకి తీసుకున్నారు. 
హైదరాబాద్‌లో…
హైదరాబాద్‌లో పలు డిపోల ఎదుట ఆర్టీసీ కార్మికులు ఆందోళన చేపట్టారు. ఆర్టీసీ జేఏసీ ఇచ్చిన బస్‌రోకో పిలుపులో భాగంగా డిపోల ఎదుట బైఠాయించారు. ఓల్డ్‌సిటీలోని ఫరూఖ్‌నగర్‌లో బస్టాండ్‌ ఎదుట పలువురు కార్మికులు బైఠాయించడంతో పోలీసులు వారిని అరెస్ట్ చేశారు.
Read More : తెలంగాణలో పెరిగిన చలి గాలులు