రాష్ట్రంలో కరోనా కేసుల సంఖ్య తగ్గే అవకాశం ఉంది…ఈటల
తెలంగాణ రాష్ట్రంలో గురువారం కొత్తగా 27 కరోనా పాజిటివ్ కేసులు నమోదయ్యాయని వైద్య ఆరోగ్య శాఖ మంత్రి ఈటల రాజేందర్ చెప్పారు. గడిచిన 24 గంటల్లో హైదరాబాద్లో 13, జోగులాంబ గద్వాల్లో 10 కరోనా పాజిటివ్ కేసులు నమోదయ్యాయని ఆయన తెలిపారు. దీంతో రాష్ట్రంలో మొత్తం కరోనా కేసుల సంఖ్య 970కి చేరింది.
కరోనా వైరస్ కారణంగా గురువారం ఒకరు మృతి చెందగా.. ఇప్పటి వరకు వ్యాధిబారిన పడి మరణించిన వారి సంఖ్య 25కి చేరింది. ఇక కోవిడ్-19 నుంచి కోలుకుని 262 మంది డిశ్చార్జ్ అయ్యారు. ప్రస్తుతం రాష్ట్రంలో 693 యాక్టివ్ కేసులు ఉన్నట్లు ఈటల వెల్లడించారు.
డాక్టర్లందరికీ అన్ని సౌకర్యాలతో రక్షణ పరమైన చర్యలు తీసుకుంటున్నామని ఆయన చెప్పారు. ఇప్పటి వరకు పీపీఈ కిట్లు, ఎన్-95 మాస్క్లతో కలిపి మొత్తం నాలుగున్నర లక్షలు అందుబాటులో ఉన్నాయన్నారు. గచ్చిబౌలి హాస్పిటల్ పూర్తిస్థాయిలో అందుబాటులోకి వచ్చిందని ఈటల తెలిపారు.
ఇక రాష్ట్రంలో కంటైన్మెంట్ జోన్లలో తప్పా ఇతర ప్రాంతాల్లో కేసులు రావడం లేదని, మరో 5,6 రోజుల్లో కేసుల సంఖ్య మరింత తగ్గే అవకాశం ఉందని పేర్కొన్నారు. 108 అంబులెన్స్లు ఎక్కడైనా అందుబాటులో లేకపోతే ప్రైవేటు వాహనాలను వాడుకోవాలని సూచించారు. 104,108 సేవలు 24 గంటలు ప్రజలకు అందుబాటులో ఉంటాయని ఈటల తెలిపారు.