KTR Jobs : గుడ్ న్యూస్, 95శాతం ప్రభుత్వ ఉద్యోగాలు స్థానికులకే

KTR Jobs : నూతన జోనల్ వ్యవస్థ ఆమోదంతో ఇక స్థానికులకే ఉద్యోగాలు వస్తాయని, ఎలాంటి వివక్ష లేకుండా సమాన అవకాశాలు దక్కుతాయని రాష్ట్ర ఐటీ, పరిశ్రమల శాఖ మంత్రి కేటీఆర్ స్పష్టం చేశారు. తెలంగాణ ప్రభుత్వం ఆమోదించిన నూతన జోనల్ వ్యవస్థతో రాష్ట్రంలోని అన్ని ప్రాంతాల వారికి ఉద్యోగ, విద్య అవకాశాల్లో సమాన వాటా దక్కుతుందని తెలిపారు. ప్రభుత్వ ఉద్యోగాల్లో 95శాతం స్థానికులకే లభిస్తాయని తెలిపారు. ఇక స్థానికులకు ఉద్యోగాలు ఇచ్చే ప్రైవేట్ సంస్థలకు ప్రత్యేక రాయితీలు ఇస్తామని కేటీఆర్ హామీ ఇచ్చారు. దీనిపై ఇప్పటికే ప్రభుత్వం నిర్ణయం తీసుకుందన్నారు.

నూత‌న జోన‌ల్ వ్య‌వ‌స్థ ఆమోదించిన సీఎం కేసీఆర్‌కు మంత్రి కేటీఆర్ ధ‌న్య‌వాదాలు తెలిపారు. ఉమ్మ‌డి ఏపీలో ఉన్న జోన‌ల్ వ్య‌వ‌స్థ‌ను పూర్తిగా ర‌ద్దు చేసిన అనంత‌రం.. నూతన జోనల్ వ్యవస్థ రూపుదిద్దుకుందని కేటీఆర్ తెలిపారు. ఈ మేరకు రాష్ట్రంలో 7 జోన్లు, 2 మల్టీ జోన్లను ప్రభుత్వం ఏర్పాటు చేసిందన్నారు. దీంతో దేశంలో ఎక్కడా లేని విధంగా అత్యధికంగా ప్రభుత్వ ఉద్యోగాలు స్థానికులకే దక్కుతాయన్నారు.

కేవలం ప్రభుత్వ ఉద్యోగాల కల్పనే కాకుండా గత ఏడేళ్లలో టీఎస్ ఐపాస్ విధానం ద్వారా లక్షల కోట్ల రూపాయల పెట్టుబడులు, వేల పరిశ్రమలు రాష్ట్రం ఆక‌ర్షించింద‌ని కేటీఆర్ తెలపారు. తద్వారా సుమారు 15 లక్షల ఉద్యోగాలు ప్రైవేటు రంగంలో వచ్చాయన్నారు. ఒకవైపు ప్రభుత్వం ఇచ్చే ఉద్యోగాల్లో 95 శాతం స్థానికులకే అవకాశాలు దక్కేలా నిర్ణయం తీసుకున్న ప్రభుత్వం, ప్రైవేట్ కంపెనీలలో ఇక్కడి యువతకు మరిన్ని ఉద్యోగాలు ఇస్తే వారికి ప్రత్యేక ప్రోత్సాహకాలు ఇచ్చేలా మరో విధానపరమైన నిర్ణయం తీసుకున్నామ‌ని కేటీఆర్ వివరించారు. ప్రభుత్వ, ప్రైవేటు రంగాల్లో స్థానిక యువతకు అత్యధిక ఉపాధి అవకాశాలు దొరికేలా చర్యలు తీసుకుంటున్న సీఎం కేసీఆర్‌కు రాష్ట్ర ప్రజలు, యువత పక్షాన కేటీఆర్ కృత‌జ్ఞ‌త‌లు తెలిపారు. ఇప్పటికే తమ ప్రభుత్వం ఇచ్చిన హామీని మించి వివిధ శాఖల ద్వారా 1,33,000 చిలుకు ప్రభుత్వ ఉద్యోగాలను రాష్ట్ర యువతకి అందించామ‌ని కేటీఆర్ తెలిపారు.