ఊరినే కబ్జా చేసేశాడు.. 19 ఏళ్ల తర్వాత వెలుగులోకి..

ఎక్కడైనా జాగా కబ్జా చెయ్యడం చూసి ఉంటాం.. పొలం అక్రమంగా రిజిస్ట్రేషన్ చేయించుకోవడం చూసి ఉంటాం.. తెలంగాణలోని నిర్మల్ జిల్లాలో మాత్రం ఓ వ్యక్తి ఏకంగా ఆదివాసీల గ్రామాన్ని తన భార్య పేరిట రిజిస్ట్రేషన్ చేయించేసుకున్నాడు.

వివరాల్లోకి వెళ్తే.. నిర్మల్ జిల్లా పెంబి మండలంలో వేణునగర్‌ ఆదివాసీలు గతంలో అటవీ ప్రాంతంలోని కొత్తచెరువుగూడలో నివసించేవారు. 2000 సంవత్సరంలో ఆ ఊరి నుంచి పెంబి వెళ్లే మార్గంలో రహదారి పక్కనే మందపల్లికి చెందిన దేవ నడ్పి పెద్దులు, చిన్న పెద్దులు, దేవ బక్కన్నల వద్ద సర్వే నం.55/2లో 4.32 ఎకరాల అసైన్డ్‌ (వ్యవసాయ) భూమిని రూ.60 వేలకు కొనుగోలు చేశారు.

అనంతరం గుడిసెలు వేసుకుని నివాసాలను ఏర్పాటు చేసుకున్నారు. ఈ భూమినే పెంబికి చెందిన ఓ వ్యాపారి 2002లో తన భార్య పేరిట నిర్మల్‌లో రిజిస్ట్రేషన్ చేయించేసుకున్నాడు. భూమిని అమ్మినవారికి కానీ, కొన్నవారికి కానీ ఈ విషయం తెలియకపోవడం విచిత్రం.

ఆదివాసీలకు భూమి అమ్మిన విషయమై సాక్షి సంతకాలు కావాలని చెప్పి.. దేవ నడ్పి పెద్దులు, చిన్న పెద్దులు, దేవ బక్కన్నల సంతకాలు తీసుకుని సదరు వ్యాపారి ఈ చర్యకు పాల్పడినట్లు తెలుస్తుంది. సుమారు రూ. కోటి పలుకుతున్న ఈ భూమి ‘ధరణి’లో వ్యాపారి భార్య పేరుపై అసైన్డ్‌ భూమిగా నమోదై ఉండగా.. భూమిపై మూడేళ్ల నుంచి రైతుబంధు సాయం సైతం సదరు వ్యాపారి పొందుతున్నారు.

గ్రామపంచాయతీగా మారిన వేణునగర్‌లో ప్రస్తుతం 50కి పైగా కుటుంబాలు నివాసం ఉండగా.. వ్యాపారి వచ్చి.. ఆ భూమి తనదని చెప్పడంతో అసలు విషయం 19ఏళ్ల తర్వాత వెలుగులోకి వచ్చింది.