Cyclone Asani : అసని తుపాను రేపు బలహీనపడే అవకాశం ఉంది | Cyclone Asani

Cyclone Asani : అసని తుపాను రేపు బలహీనపడే అవకాశం ఉంది

బంగాళాఖాతంలో ఏర్పడిన అసని తుపాను గడిచిన 6 గంటల్లో గంటకు 25 కిలో మీటర్ల వేగంతో పశ్చిమ వాయువ్య దిశగా కదులుతోందని అమరావతిలోని బీఆర్.అంబేద్కర్ విపత్తుల నిర్వహణ సంస్ధ అధికారులు తెలిపారు.

Cyclone Asani : అసని తుపాను రేపు బలహీనపడే అవకాశం ఉంది

Cyclone Asani :  బంగాళాఖాతంలో ఏర్పడిన అసని తుపాను గడిచిన 6 గంటల్లో గంటకు 25 కిలో మీటర్ల వేగంతో పశ్చిమ వాయువ్య దిశగా కదులుతోందని అమరావతిలోని బీఆర్.అంబేద్కర్ విపత్తుల నిర్వహణ సంస్ధ అధికారులు తెలిపారు. ప్రస్తుతం అసనీ తుపాను కాకినాడకు 210 కి.మీ., విశాఖపట్నంకు 310 కి.మీ., గోపాలపూర్ కు 530 కి.మీ., పూరీకి 630 కి.మీ దూరంలో కేంద్రీకృతమై ఉంది.

ఇది వాయువ్య దిశగా పయనించి రేపు ఉదయానికి కాకినాడ -విశాఖపట్నం తీరాలకు దగ్గరగా చేరుకునే అవకాశం ఉంది. అనంతరం దిశ మార్చుకుని ఉత్తర-ఈశాన్య దిశగా కదులుతూ ఉత్తరాంధ్ర మరియు ఒడిశా తీరాలకు దూరంగా వాయువ్య బంగాళాఖాతంలోకి వెళ్ళే అవకాశం  ఉందని….తదుపరి 12గంటల్లో క్రమంగా తీవ్ర తుపాను నుంచి తుపానుగా బలహీనపడే అవకాశం ఉందని విపత్తుల నిర్వహణ సంస్ధ తెలిపింది.

అసని తుపాను ప్రభావంతో ఈరోజు రాత్రి నుంచి ఉమ్మడి కోస్తాంధ్రలో తేలికపాటి నుంచి ఓ మోస్తరు వర్షాలు, అక్కడక్కడా భారీ నుంచి అతి భారీ వర్షాలు కురుస్తాయి. ఉత్తరాంధ్రలో రేపు తేలికపాటి నుంచి మోస్తరు వర్షాలు, అక్కడక్కడ భారీ నుంచి అతి భారీ వర్షాలు, ఒకటి రెండు చోట్ల అతి భారీ వర్షాలు పడే అవకాశం ఉంది. తుపాను సమయంలో కోస్తాంధ్ర తీరం వెంబడి గంటకు 75 నుంచి 95 కిలోమీటర్ల వేగంగా ఈదురు గాలులు వీస్తాయని  విపత్తుల నిర్వహణ సంస్ధ  తెలిపింది.

ప్రజలు అప్రమత్తంగా ఉండాలని…సహాయక చర్యలకోసం SDRF, NDRF బృందాలు సిద్ధంగా ఉండాలని విపత్తుల నిర్వహణ సంస్ధ కోరింది. తుపాను నేపధ్యంలో కోస్తాంధ్ర జిల్లా యంత్రాంగాలను విపత్తుల నిర్వహణ సంస్ధ అప్రమత్తం చేసింది. సముద్రం అలజడిగా ఉండటంతో గురువారం వరకు మత్స్యకారులు చేపల వేటకు వెళ్లవద్దని హెచ్చిరించింది.

Also Read : Cyclone Asani: అసనికి తోడుగా బంగాళఖాతంలో ద్రోణి: తెలంగాణకు వర్ష సూచన

 

×