Saudi Aid To Pak అప్పుల్లో కూరుకుపోయి ఆర్థిక సంక్షోభంలో కొట్టుమిట్టాడుతున్న పాకిస్తాన్ కు భారీ సాయం ప్రకటించింది సౌదీ అరేబియా. పాకిస్తాన్కు 4.2 బిలయన్ డాలర్ల సాయం అందించనున్నట్లు సౌదీ అరేబియా ప్రకటించింది. సాయంలో భాగంగా పాకిస్తాన్ కేంద్ర బ్యాంకులో 3 బిలియన్ డాలర్లు డిపాజిట్ చేయనుంది సౌదీ. మరో 1.2 బిలియన్ డాలర్లను ఈ ఏడాది పాకిస్తాన్ యొక్క ఆయిల్ ఉత్పత్తుల వాణిజ్యంపై ఫైనాన్స్ చేయనున్నట్లు సౌదీ ఫండ్ ఫర్ డెవలప్ మెంట్ మంగళవారం ప్రకటించింది.
కాగా,సౌదీ ప్రిన్స్ ఆహ్వానం మేరకు సౌదీ రాజధాని రియాద్ లో జరిగిన మిడిల్ ఈస్ట్ గ్రీన్ ఇనిషియేటివ్(MGI)సదస్సులో పాల్గొనేందుకు ఆ దేశం వెళ్లిన పాక్ ప్రధాని ఇమ్రాన్ ఖాన్ సోమవారం ప్రిన్స్ సల్మాన్తో సమావేశమై చర్చలు జరిపిన మరుసటి రోజే ఈ ప్రకటన వచ్చింది.
పాకిస్తాన్కు 2018లో 3 బిలియన్ డాలర్ల ఆర్థిక సాయం అందించింది సౌదీ. విదేశీ మారక నిల్వల కోసం మరో 3 బిలియన్ డాలర్ల చమురు సాయం అందిస్తామని ప్రకటించింది. అయితే ఆ తర్వాత ఇరు దేశాల మధ్య సంబంధాలు దెబ్బతినడం వల్ల 3 బిలియన్ డాలర్లలో 2 బిలియన్ డాలర్లను తిరిగి వెనక్కి ఇచ్చేసింది పాక్. ఇప్పుడు మళ్లీ ఇమ్రాన్ ఖాన్ మూడు రోజుల సౌదీ పర్యటన అనంతరం సంబంధాలు మెరుగుపడ్డాయి.
తాజా సాయానికి గానూ సౌదీ యువరాజు మహ్మద్ బిన్ సల్మాన్కు పాక్ ప్రధాని ఇమ్రాన్ ఖాన్ ధన్యవాదాలు తెలిపారు. తమ దేశానికి ఆర్థిక ఇబ్బందులున్న కష్టకాలంలో ఆదుకుంటున్నందుకు కృతజ్ఞతలని ట్వీట్ చేశారు. సౌదీ ఆర్థిక సాయంతో పాకిస్తాన్ రూపాయి కోలుకుంటుందని ఇమ్రాన్ ఖాన్ ఆర్థిక సలహాదారు శౌకత్ తరిణ్ ఆశాభావం వ్యక్తం చేశారు. కాగా, పొరుగు దేశం అఫ్గానిస్తాన్కు డాలర్లు అక్రమంగా తరలిస్తుందనే కారణంతో పాకిస్తాన్ కరెన్సీ ఈ ఏడాది మే నుంచి 13.6శాతం పడిపోయింది.
ALSO READ CAATSA Sanctions : భారత్ పై “కాట్సా” ప్రయోగించవద్దు..బైడెన్ కు సెనెటర్లు లేఖ