Gyanvapi : ఉత్తర ప్రదేశ్‌, వారణాసిలోని జ్ఞానవాపి మసీదులో జరుగుతున్న సర్వే అంశం కొత్త మలుపు తిరిగింది. తాజా సర్వేలో శివలింగం కనిపించినట్లు సర్వేను పర్యవేక్షిస్తున్న లాయర్ ప్రకటించారు. అయితే, సర్వేను వీడియో తీసిన కెమెరామెన్ మాత్రం తాను అలాంటిదేమీ చూడలేదన్నారు. ఈ నేపథ్యంలో మసీదు ప్రాంతాన్ని సీజ్ చేయాలని వారణాసి కోర్టు ఆదేశించింది. కోర్టు ఆదేశాలతో జ్ఞానవాపి మసీదులో మూడు రోజులుగా జరుగుతున్న సర్వే సోమవారం ముగిసింది. ఈ సర్వే మొత్తాన్ని కోర్టు ఏర్పాటు చేసిన కమిటీ ఆధ్వర్యంలో వీడియో తీసిన సంగతి తెలిసిందే.
గట్టి భద్రత మధ్య సర్వే నిర్వహించారు. సర్వేను పర్యవేక్షించిన లాయర్ విష్ణు జైన్.. మసీదులోపల పన్నెండు అడుగుల శివలింగం ఉన్నట్లు చెప్పాడు. శివలింగం ఉన్నట్లు లాయర్ చెప్పడంతో, ఈ ప్రాంతాన్ని సీజ్ చేయాలని స్థానిక సివిల్ కోర్టు ఆదేశించింది. ఈ ప్రాంతం మొత్తాన్ని అదుపులోకి తీసుకోవాలని, లోపలికి ఎవరూ ప్రవేశించకుండా చూడాలని సూచించింది. కాగా, మసీదు లోపల శివలింగం కనిపిచండంపై యూపీ డిప్యూటీ సీఎం కేశవ ప్రసాద్ సంతోషం వ్యక్తం చేశారు.
