Vakeel Saab Collections: ఒకప్పుడు సినిమా హిట్టంటే యాభై రోజులు.. వందరోజులు.. సిల్వర్ జాబ్లీ అని కొన్ని కొలతలు ఉండేవి. కానీ ఇప్పుడు సినిమా రిలీజైన వారానికే ఓటీటీలో రావాల్సిన పరిస్థితి. దీంతో సినిమా హిట్ లెక్కలు మారిపోయాయి. తొలి రోజు ఎంత తెచ్చింది.. తొలి వారం ఎంత తెచ్చింది అనే దానిమీదనే సినిమా హిట్ ఫట్ తేల్చాల్సిన రోజులివి. అందుకే సినిమా టాక్ ఎలా ఉంది.. కలెక్షన్స్ ఎంత వస్తాయన్నదే ఇప్పుడు ప్రామాణికంగా మారిపోయింది. కాగా కరోనా తర్వాత క్రాక్ సినిమా హిట్ అనిపించుకోగా జాతిరత్నాలు చిన్న సినిమా మొదలై మంచి ఫలితాలను రాబట్టుకుంది.
ఇక ఇప్పుడు బాక్స్ ఆఫీస్ పనిబట్టేలా వకీల్ సాబ్ దూసుకొచ్చాడు. చిన్న చిన్న మైనస్లు తప్ప సినిమాకు పాజిటివ్ రావడం.. మూడేళ్ళ నుండి పవర్ స్టార్ కోసం ఎదురు చూస్తున్న అభిమానులకు పండగగా మారింది. ఇదే సమయంలో ప్రస్తుతం ఈ సినిమాకు పోటీ ఇచ్చేలా మరే స్టార్ హీరో సినిమా కూడా లేకపోవడంతో వకీల్ సాబ్ కు ఎదురే లేకుండా పోతుంది. ఇప్పటి వరకు ఉన్న లెక్కల ప్రకారం కరోనా తర్వాత ఇండియన్ సినిమా ఇండస్ట్రీలో అత్యుత్తమ ఓపెనింగ్ డేగా వకీల్ సాబ్ విడుదల రోజును పేర్కొంటున్నారు.
బాహుబలి తర్వాత సినిమా కలెక్షన్ లెక్కలలో బాహుబలి పేరిట లెక్కిస్తున్న సంగతి తెలిసిందే. కాగా, ఈ లెక్క ప్రకారం ఓపెనింగ్స్ లో బాహుబలి రెండు పార్టుల తర్వాత వకీల్ సాబ్ పేరు వినిపిస్తుంది. ఇదే సమయంలో వసూళ్లలో సైరా నరసింహారెడ్డి, సాహో సినిమాల తర్వాత వకీల్ సాబ్ మూడవ స్థానాన్ని సొంతం చేసుకున్నట్లు తెలుస్తుంది. ఒకవైపు కరోనా సెకండ్ వేవ్ భయం నెలకొన్నా.. ఏపీలో టికెట్ల పెంపుకు అడ్డంకి, ఉత్తరాంధ్రలో కరోనా కేసులు వంటి ప్రతికూల పరిస్థితులలో కూడా వకీల్ సాబ్ సత్తా చాటుతుండడడం విశేషం కాగా మరో వారం రోజులు ఈ సినిమాకు ఎదురే లేకపోవడం మరో కలిసి వచ్చే అంశం.
ప్రస్తుతం థియేటర్లలో నాగ్ వైల్డ్ డాగ్, నితిన్ రంగ్ దే ఉన్నా.. అవి తక్కువ థియేటర్లతో పాటు ఈ రేంజ్ క్రేజ్ దక్కించుకోలేదు. ఇక ఈ వారంలో వరస సెలవులు, వచ్చే వారం విడుదల అనుకున్న లవ్ స్టోరీ వాయిదాతో ఇక మరో పదిరోజులు వకీల్ సాబ్ కు అడ్డేలేదు. మరి దీనిబట్టి చూస్తే వకీల్ సాబ్ బాక్సాఫీస్ లెక్క తెలుస్తాడా? అంటూ విశ్లేషకులు, ఎనలిస్టులు చర్చలు మొదలుపెడుతున్నారు. బాక్స్ ఆఫీస్ బద్దలవ్వడం ఏమోకానీ రికార్డు స్థాయి వసూళ్లను రాబట్టే ఛాన్స్ అయితే కావాల్సినంత వకీల్ సాబ్ కు ఉండడంలో ఏ మాత్రం డౌట్స్ అక్కర్లేదు.
Read: Vakeel Saab: ఫ్లాష్ బ్యాక్ ఎపిసోడ్ తీసేయాలని ఫ్యాన్స్ డిమాండ్!
