Sushil Modi: ‘‘చూస్తూ ఉండండి.. జేడీయూ-ఆర్జేడీ కూటమిని విచ్ఛిన్నం చేస్తాం’’ అంటూ బిహార్ మాజీ ఉపముఖ్యమంత్రి, బీజేపీ సీనియర్ నేత సుశీల్ కుమార్ మోదీ చేసిన వ్యాఖ్యలు రాజకీయంగా ప్రకంపనలు సృష్టిస్తున్నాయి. మణిపూర్లో జనతాదళ్ యూనియన్ పార్టీ నేతలు భారతీయ జనతా పార్టీలో చేరడంపై ఆయన స్పందిస్తూ ఈ వ్యాఖ్యలు చేశారు. ఇప్పటికే పలు రాష్ట్రాలో బీజేపీయేతర ప్రభుత్వాలు కూలిపోతుండడం.. అక్కడ బీజేపీ ఆధ్వర్యంలో ప్రభుత్వాలు ఏర్పడుతున్న తరుణంలో బిహార్లో ఆపరేషన్ కమలం ఊపందుకుందా అనే ఊహగాణాలకు సుశీల్ మాటలు దోహదపడుతున్నాయి.
కొద్ది రోజుల క్రితమే బిహార్ ముఖ్యమంత్రి నితీశ్ కుమార్.. బీజేపీతో పొత్తు తెంచుకుని ఆర్జేడీతో జతకట్టారు. వాస్తవానికి 2020 అసెంబ్లీ ఎన్నికల్లో బీజేపీ-జేడీయూ కలిసే పోటీ చేశాయి. అనంతరం ప్రభుత్వాన్ని ఏర్పాటు చేశాయి. అయితే ఈ ఎన్నికల్లో జేడీయూ కంటే బీజేపీకి ఎక్కువ సీట్లు వచ్చినప్పటికీ.. ఎన్నికల ముందు ఇచ్చిన వాగ్దానం మేరకు నితీశ్ను ముఖ్యమంత్రి చేశారు. అయితే సీఎం నితీశే అయినా.. పాలన మాత్రం బీజేపీ హైకమాండ్ చేస్తుందనే విమర్శలు అప్పట్లో బాగానే వినిపించాయి. అంతే కాకుండా పొత్తులో ఉన్నామని చూడకుండా బీజేపీ నేతలు తరుచూ నితీశ్ ప్రభుత్వంపై విమర్శలు చేస్తుండడం నితీశ్కు బాగా ఆగ్రహాన్ని కలిగించిందట.
ఇదిలా ఉంటే.. బిహార్లో బీజేపీ దోస్దీని విడిచిన అనంతరం.. మణిపూర్లో కూడా ఉన్న పొత్తును తెంచుకుంటున్నట్లు జేడీయూ ప్రకటించింది. ఈ ప్రకటన వెలువడిన ఒక రోజుకే జేడీయూకి షాక్ తగిలింది. మణిపూర్లో జేడీయూకి ఆరుగురు ఎమ్మెల్యేలు ఉండగా.. ఐదుగురు బీజేపీలో చేరారు. దీంతో మణిపూర్ జేడీయూ విభాగం అధికారికంగా బీజేపీలో విలీనం అయిపోయింది.
ఈ సందర్భాన్ని సుశీల్ గుర్తు చేస్తూ.. ‘‘ఐదుగురు జేడీయూ ఎమ్మెల్యేలు బీజేపీలో చేరారు. దీంతో జేడీయూ విముక్త రాష్ట్రంగా మణిపూర్ అవతరించింది. ఆ ఎమ్మెల్యేలు ఎన్డీయేతోనే ఉంటామని అంటున్నారు. చూస్తూ ఉండండి.. బిహార్లో జేడీయూ-ఆర్జేడీ పొత్తును విచ్ఛిన్నం చేస్తాం. అనంతరం ఈ రాష్ట్రాన్ని కూడా జేడీయూ విముక్తంగా మారుస్తాం. పోస్టర్లు వేసుకుని, హోర్డింగులు పెట్టుకున్నంత మాత్రాన ప్రధాని కాలేరు. ఇది వాళ్లు ముందుగా తెలుసుకోవాలి’’ అని అన్నారు.
BJP MPs: బీజేపీ ఎంపీలు నిషికాంత్ దూబే, మనోజ్ తివారీలపై కేసు నమోదు.. ఎందుకంటే..
