Births and Deaths (Amendment) Act 2023: జనన మరణాల నమోదు (సవరణ) చట్టం-2023.. వచ్చే నెల (అక్టోబర్) 1 నుంచి దేశవ్యాప్తంగా అమలులోకి రాబోతోంది. అంటే ఇక నుంచి బర్త్ సర్టిఫికేట్ ప్రాముఖ్యత చాలా పెరగనుంది. ఈ సర్టిఫికేట్ పాఠశాల, కళాశాల అడ్మిషన్, డ్రైవింగ్ లైసెన్స్ కోసం దరఖాస్తు, ఓటరు జాబితాలో పేరు చేర్చడం, ఆధార్ నమోదు, వివాహ నమోదు, ప్రభుత్వ ఉద్యోగ దరఖాస్తు కోసం ఇలా అన్నింటికీ తప్పనిసరి కానుంది. ఈ మేరకు కేంద్ర హోంశాఖ బుధవారం ఓ ప్రకటన విడుదల చేసింది. పార్లమెంటు ఉభయ సభలు గత నెలలో ముగిసిన వర్షాకాల సమావేశాల్లో జనన మరణాల నమోదు (సవరణ) బిల్లు-2023ని ఆమోదించాయి.
ఈ నిబంధన అక్టోబర్ 1, 2023 నుంచి అమలులోకి వస్తుంది
జనన మరణ నమోదు (సవరణ) చట్టం అమలులోకి వచ్చిన తర్వాత, ఆధార్ నుంచి అవసరమైన అన్ని ప్రభుత్వ పత్రాలను తయారు చేయడంలో జనన ధృవీకరణ ప్రాముఖ్యత పెరుగుతుంది. ఈ బిల్లు లోక్‌సభలో ఆగస్టు 1న, రాజ్యసభలో ఆగస్టు 7న ఆమోదం పొందింది. అనంతరం, తాజాగా కేంద్ర ప్రభుత్వం దీనిపై నోటిఫికేషన్ విడుదల చేసింది. అక్టోబర్ 1 నుంచి కొత్త నిబంధనలను అమలు చేయనున్నట్లు ప్రకటించింది.
చీఫ్ రిజిస్ట్రార్‌ను నియమిస్తారు
ఈ చట్టం రిజిస్టర్డ్ జనన మరణాల జాతీయ డేటాబేస్‌ను నిర్వహించడానికి రిజిస్ట్రార్ జనరల్ ఆఫ్ ఇండియాకు అధికారం ఇస్తుంది. ఇందుకోసం అన్ని రాష్ట్రాలు చీఫ్ రిజిస్ట్రార్, రిజిస్ట్రార్‌లను నియమిస్తాయి. ఈ అధికారులు జాతీయ డేటాబేస్‌లో నమోదైన జననాలు, మరణాల డేటాను భాగస్వామ్యం చేయడానికి బాధ్యత వహిస్తారు. చీఫ్ రిజిస్ట్రార్ రాష్ట్ర స్థాయిలో ఏకరూప డేటాబేస్‌ను సిద్ధం చేస్తారు.
నమోదిత జననాలు, మరణాల కోసం జాతీయ, రాష్ట్ర స్థాయి డేటాబేస్‌లను ఏర్పాటు చేయడం బిల్లు ప్రధాన లక్ష్యం. ఈ చొరవ ఇతర డేటాబేస్‌ల కోసం అప్‌డేట్ ప్రాసెస్‌లను మెరుగుపరుస్తుందని, సమర్థవంతమైన, పారదర్శకమైన పబ్లిక్ సర్వీసులు, సోషల్ బెనిఫిట్ డెలివరీని ప్రోత్సహిస్తుంది. కేంద్ర హోం మంత్రి అమిత్ షా తరపున కేంద్ర హోం శాఖ సహాయ మంత్రి నిత్యానంద రాయ్ లోక్‌సభలో ఈ బిల్లును ప్రవేశపెట్టారు. ఈ బిల్లు అమలులోకి వచ్చిన తర్వాత, జనన నమోదు సమయంలో తల్లిదండ్రులు లేదా సంరక్షకుల ఆధార్ నంబర్ అవసరం అవుతుంది.
