Bro Movie : ఈ వారం టాలీవుడ్ ఆడియన్స్ ముందకు వచ్చేందుకు సిద్దమవుతున్న మెగా మల్టీస్టారర్ చిత్రం ‘బ్రో’. పవర్ స్టార్ పవన్ కళ్యాణ్ (Pawan Kalyan), సుప్రీమ్ హీరో సాయి ధరమ్ తేజ్ (Sai Dharam Tej) ప్రధాన పాత్రల్లో తెరకెక్కిన ఈ సినిమా సోషియో ఫాంటసీ డ్రామాతో అలరించబోతుంది. ఈ సినిమాలో పవన్ దేవుడిగా కనిపించబోతున్నాడు. ఇటీవల రిలీజ్ అయిన ట్రైలర్ లో వింటేజ్ మార్క్ పవన్ కళ్యాణ్ కనిపించడంతో మూవీని ఎప్పుడెప్పుడు చూస్తామా? అని ఎదురు చూస్తున్నారు అభిమానులంతా.
ఇక ఈ మూవీ ప్రమోషన్స్ భాగంగా పలు ఇంటర్వ్యూలు ఇస్తూ సందడి చేస్తున్న చిత్ర యూనిట్.. ఈ నెల 25న హైదరాబాద్ లోని శిల్ప కళా వేదికలో మూవీ ప్రీ రిలీజ్ ఈవెంట్ ని గ్రాండ్ గా నిర్వహించబోతున్నారు. అయితే ప్రస్తుతం పొలిటికల్ కాంపెయిన్ లో పవన్ ఈ ప్రీ రిలీజ్ ఈవెంట్ కి వస్తాడా? లేదా? అని ఒక సందేహం నెలకుంది. తాజాగా దీని పై సాయి ధరమ్ తేజ్ క్లారిటీ ఇచ్చేశాడు. సోషల్ మీడియా మీమర్స్ తో ఇంటరాక్ట్ అయిన తేజ్.. ప్రీ రిలీజ్ ఈవెంట్ కి పవన్ వస్తున్నాడు అంటూ కన్ఫార్మ్ చేశాడు.
కాగా ఈ సినిమా తమిళ్ మూవీ ‘వినోదయ సిత్తం’కి రీమేక్ గా వస్తుంది. తమిళంలో డైరెక్ట్ చేసిన సముద్రఖని ఈ రీమేక్ ని కూడా డైరెక్ట్ చేస్తున్నాడు. సాయి ధరమ్ తేజ్ కి జోడిగా కేతిక శర్మ నటిస్తుంటే ప్రియా ప్రకాష్ వారియర్ తేజ్ కి చెల్లి పాత్రలో కనిపించబోతుంది. పీపుల్ మీడియా ఫ్యాక్టరీ నిర్మిస్తున్న ఈ మూవీకి థమన్ సంగీతం అందిస్తున్నాడు. ఈ నెల 28న గ్రాండ్ గా ఈ మూవీ రిలీజ్ కాబోతుంది. సినిమాని లిమిటెడ్ బడ్జెట్ లోనే పూర్తి చేయడంతో టికెట్ రేట్లు ఏమి పెంచడం లేదని నిర్మాత తెలియజేశాడు.