అలనాటి ప్రముఖ నటి నిమ్మీ ఇకలేరు

ప్రముఖ బాలీవుడ్ సీనియర్ నటి నిమ్మీ కన్నుమూశారు..

గత కాలానికి చెందిన ప్రముఖ నటి నిమ్మీ ముంబైలో కన్నుమూశారు. ఆమె కొన్ని నెలలుగా అనారోగ్యంతో బాధపడుతున్నారు. ఆమె వయసు 88 సంవత్సరాలు. ముంబైలోని సర్లా నర్సింగ్ హోమ్‌లో ఆమె తుది శ్వాస విడిచారు. నిమ్మీ సినిమాల్లో నటించారు. 1949 నుండి 1965 వరకు 16 సంవత్సరాల పాటు ఆమె సినిమాల్లో కనిపించారు.

ఆమె అప్పట్లో ఉత్తమ నటిగా గుర్తింపు పొందారు. నిమ్మీ అసలు పేరు ‘నవాబ్ బానో’. నిమ్మీని ప్రముఖ నటుడు దివంగత రాజ్ కపూర్ తెరకు పరిచయం చేశారు. ఆయనే నవాబ్ బానో పేరును నిమ్మీగా మార్చారు. రాజ్ కపూర్ తన ‘బర్సాత్’ చిత్రంలో ఆమెకు అవకాశం ఇచ్చి ప్రోత్సహించారు. ఈ చిత్రం హిట్ అయిన తరువాత, నిమ్మీ చాలా సినిమాల్లో నటించారు.

ఆమె ‘ఆన్’, ‘ఉడాన్ ఖటోలా’, ‘భాయ్ భాయ్’, ‘కుందన్’, ‘మేరే మెహబూబ్’ తదితర చిత్రాల్లో నటించి ప్రజాదరణ పొందారు. సీనియర్‌ నటులు మ‌హేష్ భ‌ట్‌, రిషి క‌పూర్ నిమ్మి మృతిపై దిగ్భ్రాంతి వ్యక్తం చేశారు. అంత్యక్రియలు గురువారం రే రోడ్డులోని స్మశాన వాటికలో జరగనున్నాయని కుటుంబ సభ్యులు తెలిపారు.