AP: నెల్లూరులో మంత్రి కాకాణి ఫ్లెక్సీల కాక.. అనిల్ కుమార్ యాదవ్ పై ఆగ్రహం

నెల్లూరులో మంత్రి కాకాణి ఫ్లెక్సీల తొలగింపు కాకరేపుతోంది..మాజీ మంత్రి అనిల్ కుమార్ యాదవ్ పై కాకాణి అనుచరులు ఆగ్రహం వ్యక్తంచేస్తున్నారు.

Andhra Pradesh : సీఎం జగన్ కేబినెట్ పునర్ వ్యవస్థీకరణ వైసీపీ నేతల మధ్య సెగలు పుట్టిస్తోంది. మంత్రి పదవి దక్కించుకున్నవారు ఫుల్ ఖుషీలో ఉంటే పదవి కోల్పోయినవారు కొంతమంది పైకే అసంతృప్తి వెళ్లగ్రక్కుతున్నారు. మరికొందరు మాత్రం పైకి లేదని చెబుతునే లోపల మాత్రం అసంతృప్తులు, అసహనంతో ఉంటున్నారు. ఈ క్రమంలో తాజాగా మంత్రి పదవి దక్కించుకున్న కాకాణికి మాజీ మంత్రి అనిల్ కుమార్ యాదవ్ కు మధ్య కోల్డ్ వార్ నడుస్తోంది. దీంట్లో భాగంగానే నెల్లూరులో ఫ్లెక్సీల వివాదం చెలరేగింది ఇద్దరి మధ్యా.

నెల్లూరు సిటీలో మంత్రి కాకాణి గోవర్ధర్ రెడ్డి ఫ్లెక్సీలను కొంతమంది గుర్తు తెలియని వ్యక్తులు చించివేశారు. ఇదికాస్తా వివాదంగా మారింది. తమ నాకయకుడి ఫ్లెక్సీలు చించేస్తారా? అంటూ కాకాణి వర్గీయులు ఆగ్రహం వ్యక్తం చేస్తున్నారు. అనిల్ కుమార్ యాదవ్ అనుచరులే ఫ్లెక్సీలు చించేశారు అని ఆరోపిస్తున్నారు. కానీ కాకాణి ఫ్లెక్సీలు తొలగింపుపై తమకు ఎటువంటి సంబంధం లేదంటున్నారు అనిల్ వర్గీయులు.

కాగా నెల్లూరు వైసీపీ ఫైర్ బ్రాండ్..మాజీ మంత్రి అనిల్ యాదవ్ కాకాణి గురించి చేసిన వ్యాఖ్యలు చర్చకు కారణమయ్యాయి. కొత్త మంత్రివర్గ విస్తరణ కార్యక్రమానికి అనిల్ హాజరు కాలేదు సరికదా..తనకు కాకాణి గోవర్ధన్ రెడ్డి నుంచి తనకు ఎలాంటి ఆహ్వానం అందలేదని..అందుకే ప్రమాణ స్వీకారానికి రాలేకపోయానని అన్నారు. పైకి అలాగే అన్నా మంత్రి పదవి దక్కనందుకు ఇదోరకం అక్కసుతోనే రాలేదనే వార్తలు వచ్చాయి. కానీ తను ఆరోగ్య పరీక్షల కోసం చెన్నైకు వెళ్లానని పైగా కాకాణి నుంచి తనకు ఆహ్వానం రాలేదని చెప్పుకొచ్చారు అనిల్ కుమార్ యాదవ్.

అదే సమయంలో ఆయన చేసిన కొన్ని వ్యాఖ్యలు నెల్లూరు వైసీపీలో హాట్ టాపిక్ గా మారాయి. తాను మంత్రిగా ఉన్న మూడేళ్ల కాలంలో కాకాణి తన పైన చూపిన ప్రేమ .. అభిమానం.. వాల్సల్యం సహకారానికి రెండింతలు ఇస్తానంటూ వ్యాఖ్యానించారు. ఇచ్చింది ఉంచుకునే అలవాటు తనకు లేదని చెప్పటం ద్వారా అనిల్ వ్యాఖ్యల వెనుక ఉద్దేశం జిల్లా రాజకీయాలు తెలిసిన వారందరికీ స్పష్టత వచ్చింది.

నెల్లూరు వైసీపీలో ఏం జరుగుతోంది… తాను ఇప్పుడు మంత్రిగా లేకున్నా..తిరిగి అధికారంలోకి రావటం ఖాయమని..మంత్రి అవుతామని జగన్ చెప్పారని అనిల్ వెల్లడించారు. వైసీపీ ఒక కుటుంబం వంటిదని… ఏవైనా గొడవలుంటే కూర్చొని మాట్లాడుకుంటామని అన్నారు. అనిల్ తాజా వ్యాఖ్యలతో నెల్లూరు అధికార పార్టీలో రానున్న రోజుల్లో ఎటువంటి రాజకీయాలు చోటు చేసుకుంటాయో అనే ఉత్కంఠ మొదలైంది.