IPL 2023 DC Vs SRH : చతికిలపడిన సన్ రైజర్స్.. ఢిల్లీ కేపిటల్స్ గెలుపు
IPL2023 DC Vs SRH : 145 పరుగుల టార్గెట్ తో బరిలోకి దిగిన హైదరాబాద్.. 20 ఓవర్లలో 6 వికెట్ల నష్టానికి 137 పరుగులే చేసింది.
- Published By: 10TV Digital Team ,Published On : April 24, 2023 / 11:24 PM IST
IPL2023 DC Vs SRH
IPL2023 DC Vs SRH : ఐపీఎల్ 2023లో భాగంగా సన్ రైజర్స్ హైదరాబాద్, ఢిల్లీ కేపిటల్స్ జట్లు తలపడ్డాయి. ఈ మ్యాచ్ లో హైదరాబాద్ ఓటమి పాలైంది. ఢిల్లీ కేపిటల్స్ జట్టు 7 పరుగుల తేడాతో గెలుపొందింది. 145 పరుగుల టార్గెట్ తో బరిలోకి దిగిన హైదరాబాద్.. 20 ఓవర్లలో 6 వికెట్ల నష్టానికి 137 పరుగులే చేసింది. అత్యల్ప టార్గెట్ ను కూడా చేధించలేక హైదరాబాద్ జట్టు చతికిలపడింది.
హైదరాబాద్ జట్టులో మయాంక్ అగర్వాల్ ఒక్కడే రాణించాడు. 39 బంతుల్లో 49 పరుగులు చేశాడు. హెన్రిచ్ క్లాసెన్(19 బంతుల్లో 31 పరుగులు), వాషింగ్టన్ సుందర్(15 బంతుల్లో 24 పరుగులు) పోరాడినా.. జట్టుకి విజయాన్ని అందించలేకపోయారు. ఢిల్లీ బౌలర్లలో అన్రిచ్ నోర్జే, అక్షర్ పటేల్ తలో రెండు వికెట్లు తీశారు. ఇశాంత్ శర్మ, కుల్దీప్ యాదవ్ చెరో వికెట్ పడగొట్టారు.
ఈ మ్యాచ్ లో తొలుత బ్యాటింగ్ చేసిన ఢిల్లీ జట్టు 20 ఓవర్లలో 9 వికెట్ల నష్టానికి 144 పరుగులు చేసింది. మనీశ్ పాండే(27 బంతుల్లో 34 పరుగులు), అక్షర్ పటేల్(34 బంతుల్లో 34 పరుగులు) రాణించారు. డేవిడ్ వార్నర్(21), మిచెల్ మార్ష్(25) పరుగులు చేశారు. హైదరాబాద్ బౌలర్లలో వాషింగ్టన్ సుందర్ 3 వికెట్లు తీశాడు. భువనేశ్వర్ కుమార్ 2 వికెట్లు పడగొట్టాడు. నటరాజన్ ఒక వికెట్ తీశాడు.
ఇండియన్ ప్రీమియర్ లీగ్ (IPL 2023)లో భాగంగా 34వ మ్యాచ్ హైదరాబాద్, ఉప్పల్ లోని రాజీవ్ గాంధీ అంతర్జాతీయ మైదానం (Rajiv Gandhi International Stadium, Hyderabad)లో జరిగింది. సన్‌రైజర్స్ హైదరాబాద్ (Sunrisers Hyderabad), ఢిల్లీ క్యాపిటల్స్ తలపడ్డాయి. మొదట బ్యాటింగ్ చేసిన ఢిల్లీ క్యాపిటల్స్… సన్‌రైజర్స్ హైదరాబాద్ ముందు 145 పరుగుల లక్ష్యాన్ని ఉంచింది.
ఈ సీజన్ లో ఉప్పల్ వేదికగా జరిగిన 4వ మ్యాచ్ ఇది. ఉప్పల్ లో ఆడిన 4 మ్యాచుల్లో కేవలం ఒక మ్యాచ్ లోనే సన్‌రైజర్స్ హైదరాబాద్ విజయం సాధించింది. అలాగే, ఈ సీజన్ లో ఇప్పటివరకు హైదరాబాద్ 7 మ్యాచులు ఆడగా రెండింట్లో గెలుపొందింది. ఢిల్లీ 7 మ్యాచులు ఆడగా రెండింటిలో విజయం సాధించింది. పాయింట్ల టేబుల్ లో చివరి స్థానాల్లో (9, 10వ స్థానాల్లో) హైదరాబాద్, ఢిల్లీ ఉన్నాయి.
స్కోర్లు..
ఢిల్లీ కేపిటల్స్- 20 ఓవర్లలో 144/9
సన్ రైజర్స్ హైదరాబాద్- 20 ఓవర్లలో 137/6
