Kothapatnam Boat Incident: కొత్తపట్నం తీరానికి కొట్టుకొచ్చిన బోటు.. ఏడుగురు మత్స్యకారులు దుర్మరణం.. తమిళనాడువాసులుగా గుర్తింపు!
ప్రకాశం జిల్లా కొత్తపట్నం(Kothapatnam Boat Incident) తీరంలో తమిళనాడుకు చెందిన మత్స్యకారుల బోటులో ఏడు మృతదేహాలు లభ్యం అయ్యాయి.
- Published By: V Santhosh Kumar , Updated On : November 5, 2026 / 12:17 PM IST
Boat capsizes in prakasam kothapatnam sea 7 tamil nadu fishermen dead
Kothapatnam Boat Incident: ప్రకాశం జిల్లా కొత్తపట్నం సముద్ర తీరానికి బోటు కొట్టుకువచ్చింది. ఈ బోటులో ఏడుగురి మృతదేహాలు లభ్యమయ్యాయి. మృతదేహాలు నీటిలో బాగా ఉబ్బిపోయి, ఎలాంటి ఆధారాలు లభించకపోవడంతో ఆరంభంలో గుర్తింపు కష్టంగా మారింది. ప్రమాద తీవ్రతను తెలుసుకున్న జిల్లా కలెక్టర్ రాజాబాబు, జేసీ, ఒంగోలు ఆర్డీఓ తక్షణమే సంఘటనా స్థలానికి చేరుకుని పరిస్థితులను నిశితంగా పరిశీలించారు.
తమిళనాడు కాశీమేడు మత్స్యకారులుగా గుర్తింపు.. 9 మందితో వేటకు వెళ్లిన బోటు:
ప్రాథమిక సమాచారం ప్రకారం.. ఈ బోటు తమిళనాడులోని కాశీమేడు ప్రాంతానికి చెందినదిగా(Kothapatnam Boat Incident) గుర్తించారు. కాశీమేడు నుంచి 9 మంది మత్స్యకారులు సముద్రంలోనికి వేటకు వెళ్లినట్లు అధికారులు నిర్ధారించారు. వీరి అదృశ్యంపై ఇప్పటికే స్థానిక కాశీమేడు పోలీస్ స్టేషన్‌లో మిస్సింగ్ కేసు కూడా నమోదైంది. బోటు కింద భాగంలో పెద్ద రంధ్రం (హోల్) పడటంతో లోపలికి నీరు చేరి ఈ విషాదకర ప్రమాదం జరిగి ఉండవచ్చని మెరైన్ పోలీస్ అధికారులు ప్రాథమికంగా అనుమానిస్తున్నారు.
ఒడ్డున చెల్లాచెదురుగా లభ్యమైన మృతదేహాలు.. మిగతా వారి కోసం తీవ్ర గాలింపు:
బోటు ప్రస్తుతం కొత్తపట్నం తీరంలో ఇసుకలో కూరుకుపోయి ఉంది. కొత్తపట్నం తీరం నుంచి ఉత్తరం వైపు 3 కిలోమీటర్ల దూరంలో ఒకటి, దక్షిణం వైపు 1.5 కిలోమీటర్ల దూరంలో మరొకటి.. ఇలా వేర్వేరు ప్రాంతాల్లో చెల్లాచెదురుగా మొత్తం 7 మృతదేహాలను మెరైన్ అధికారులు వెలికితీశారు. బోటు నంబర్ ఆధారాలు కూడా స్పష్టంగా కనిపించని స్థితిలో ఉన్నందున, మిగిలిన వారి ఆచూకీ కోసం మెరైన్ పోలీసులు, స్థానిక యంత్రాంగం తీరప్రాంతాల్లో ముమ్మరంగా గాలింపు చర్యలు కొనసాగిస్తున్నారు.
