AP ZPTC MPTC Results: పరిషత్ పోరులో ఆసక్తికర పరిణామాలు.. వెంట్రుకలు అమ్ముకునే మహిళకు పట్టం.. కొత్తతరం నాయకత్వంతో గ్రామీణ రాజకీయాలు!
ఆంధ్రప్రదేశ్ పరిషత్ ఎన్నికల ఫలితాల్లో చిక్కు వెంట్రుకలు అమ్ముకునే సామాన్య మహిళ జడ్పీటీసీగా(AP ZPTC MPTC Results) గెలవడం, ఒక్క ఓటుతో అభ్యర్థుల విజయం, జైలు నుంచే పోటీ చేసి నెగ్గడం వంటి అనేక ఆసక్తికర విషయాలు చోటుచేసుకున్నాయి.
- Published By: V Santhosh Kumar , Published On : November 8, 2026 / 07:23 AM IST
Interesting victories in ap zptc mptc elections
AP ZPTC MPTC Results: ఆంధ్రప్రదేశ్ వ్యాప్తంగా ఇటీవల ముగిసిన పరిషత్ ఎన్నికల ఫలితాలలో ఎన్నో ఊహించని, ఆసక్తికర పరిణామాలు చోటుచేసుకున్నాయి. గ్రామ స్థాయి ప్రజాస్వామ్య పోరులో పాత రాజకీయ సమీకరణాలను పక్కన పెట్టి ఓటర్లు అందించిన తీర్పుతో పలువురు సామాన్యులు సంచలన విజయాలు సాధించారు. రాజకీయ నేపథ్యమున్న కుటుంబాలతో పాటు అతి సామాన్యులు, చిరుద్యోగులు, ఆటోవాలాలు, రిక్షా కార్మికులు, ఉన్నత విద్యనభ్యసించిన ఇంజినీర్లు, వైద్యులు, న్యాయవాదులు ఎందరో ప్రజాక్షేత్రంలో జయకేతనం ఎగురవేసి గ్రామీణ రాజకీయ యవనికపై కొత్త అధ్యాయాన్ని లిఖించారు.
చిక్కు వెంట్రుకలు అమ్ముకునే మహిళ విజయం.. ఒక్క ఓటుతో గెలిచిన అభ్యర్థులు:
కృష్ణా జిల్లా పామర్రు జడ్పీటీసీ(AP ZPTC MPTC Results) స్థానంలో తెదేపా తరఫున పోటీ చేసిన శీలం వెంకటేశ్వరమ్మ 8,469 ఓట్ల భారీ మెజార్టీతో విజయం సాధించి చరిత్ర సృష్టించారు. నిన్నటి దాకా భుజానికి జోలి తగిలించుకుని చిక్కు వెంట్రుకలు సేకరించి అమ్ముకునే ఈ సామాన్య మహిళకు కూటమి అవకాశం ఇవ్వగా ఓటర్లు బ్రహ్మరథం పట్టారు. మరోవైపు నెల్లూరు జిల్లా చిల్లకూరు ఎంపీటీసీగా కొండూరు అరుణ రీకౌంటింగ్‌లో కేవలం 1 ఓటుతో, పైనాపురంలో దాసరి కుమారమ్మ 1 ఓటుతో, పశ్చిమగోదావరి మల్లిపూడిలో కొల్లి అరుణకుమారి, అల్లూరి జిల్లా శరభన్నపాలెంలో వైకాపా అభ్యర్థి రాజేశ్వరి ఒక్క ఓటు తేడాతో విజయం సాధించి ఉత్కంఠ రేకెత్తించారు.
పోరులో అత్తాకోడళ్లు, తోటికోడళ్లు.. విజయం సాధించిన గూడుపుఠాణీ అభ్యర్థులు:
ఈ ఎన్నికల్లో పలు కుటుంబాల్లో ఆత్మీయ బంధాలు రాజకీయ ప్రత్యర్థులుగా మారాయి. ఏలూరు జిల్లా వట్టిగుడిపాడు ఎంపీటీసీ స్థానంలో అత్తాకోడళ్లు జ్యోతి నాగమణి (తెదేపా), తూము సుప్రియ (వైసీపీ) పోటీ పడగా అత్త నాగమణి గెలుపొందారు. జంగారెడ్డిగూడెం శ్రీనివాసపురంలో కోడలు పోలనాటి భువనేశ్వరి (వైసీపీ) విజయం సాధించారు. పశ్చిమగోదావరి జిల్లా పెదమల్లంలో తోటికోడళ్లు బోడపాటి మంగాదేవి (జనసేన), సుప్రియ (వైసీపీ) తలపడగా జనసేన అభ్యర్థి 18 ఓట్ల తేడాతో విజయాన్ని కైవసం చేసుకున్నారు.
విద్యావంతులు, వృత్తినిపుణుల హవా.. కోడికత్తి కేసు లాయర్ గెలుపు:
ఉన్నత చదువులు చదివిన యువత, నిపుణులు పరిషత్ పోరులో తమ సత్తా చాటారు. మార్కాపురం జిల్లా పామూరు జడ్పీటీసీగా వైద్యాధికారిణి డాక్టర్ బైరెడ్డి జాహ్నవి 18,992 ఓట్ల భారీ మెజార్టీతో విజయం సాధించగా, ప్రకాశం జిల్లా సోమరాజుపల్లె ఎంపీటీసీగా బీటెక్ ఫైనలియర్ విద్యార్థిని బొడ్డు నాగసౌమ్య గెలుపొందారు. ఏలూరు జిల్లా గనిజర్ల ఎంపీటీసీగా గెలిచిన హైకోర్టు న్యాయవాది చీకటి గగనసింధు, సంచలనం సృష్టించిన కోడికత్తి కేసులో బాధితుడి తరఫున వాదనలు వినిపించిన లాయర్ బృందంలో ఒకరు కావడం విశేషం.
బంధాలు-పోటీలు.. బాబాయ్ వర్సెస్ అబ్బాయి పోరు:
కుటుంబ రాజకీయ పోరాటాల్లో తిరుపతి జిల్లా కలువాయి ఎంపీటీసీ స్థానానికి బాబాయ్, అబ్బాయి వేర్వేరు పార్టీల తరఫున పోటీపడ్డారు. వైసీపీ అభ్యర్థి సురేష్‌ (అబ్బాయి)పై తెదేపా అభ్యర్థి బాబూరావు (బాబాయ్) 67 ఓట్ల మెజారిటీతో విజయం సాధించారు. గుంటూరు జిల్లా కొర్రపాడులో సుదీర్ఘకాలం తెదేపాలో ఉండి చివరి నిమిషంలో జనసేనలోకి మారిన బొజ్జా అంకమ్మరావు విజయం సాధించగా, తిరుపతి జిల్లా పెళ్లకూరు జడ్పీటీసీగా జైలు రిమాండ్ ఖైదీగా ఉన్న వైసీపీ అభ్యర్థి కామిరెడ్డి సత్యనారాయణరెడ్డి ప్రచారానికి దూరంగా ఉండి కూడా 1,719 ఓట్ల ఆధిక్యంతో గెలిచారు.
సర్పంచ్ స్థానాల్లో జోడీల హవా.. ఒకే ఇంట్లో రెండు పదవులు:
ఉమ్మడి జిల్లాల వ్యాప్తంగా పలు దంపతులు కలిసి ప్రజాప్రతినిధులుగా ఎన్నికై వార్తల్లో నిలిచారు. కాకినాడ జిల్లా సీతారామపురానికి చెందిన టేకుమూడి లక్ష్మణరావు, అనంతలక్ష్మి దంపతులు వేర్వేరు ఎంపీటీసీ స్థానాల నుంచి తెదేపా తరఫున విజయం సాధించారు. అలాగే ప్రత్తిపాడులో యాళ్ల జగదీష్-మంగాదేవి, తూర్పుగోదావరి జిల్లా కడియంలో బోడపాటి గోపాలకృష్ణ-వీరపుణ్యవతి, ఎన్టీఆర్ జిల్లా పెనుగంచిప్రోలులో గజ్జి కృష్ణమూర్తి-విజయలక్ష్మి దంపతులు ఎంపీటీసీ సభ్యులుగా గెలుపొందారు. కోనసీమ జిల్లా కొత్తపేటలో తండ్రి పొనుగుపాటి సత్యనారాయణ (వైసీపీ), కుమార్తె చాందిని (తెదేపా) వేర్వేరు స్థానాల నుంచి విజయం సాధించడం మరో విశేషం.
