Cyclone Threat : బంగాళాఖాతంలో అల్పపీడనం.. తుపానుగా మారే ఛాన్స్.. ఏపీ తీరానికి ముప్పు ఉందా?

Cyclone Threat : బంగాళాఖాతంలో అల్పపీడనం ఏర్పడింది. వాయుగుండంగా బలపడి సోమవారం నాటికి తుపానుగా మారే అవకాశం ఉంది. ఏపీ, తమిళనాడు తీరాలకు తుపాను ముప్పు ఉందా? మత్స్యకారులకు అధికారులు కీలక హెచ్చరికలు జారీ చేశారు..

Low Pressure in Bay of Bengal

• బంగాళాఖాతంలో అల్పపీడనం..
• తుపానుగా మారితే ఏపీకి ముప్పేనా?
• మత్స్యకారులకు కీలక హెచ్చరిక
• అల్పపీడనం నుంచి తుపాను వరకు..

Cyclone Threat : బంగాళాఖాతంలో వాతావరణం ఒక్కసారిగా మారుతోంది. ఆగ్నేయ బంగాళాఖాతంలో ఏర్పడిన అల్పపీడనం ఇప్పుడు అందరి దృష్టిని ఆకర్షిస్తోంది. ఇప్పటికే సముద్రంలో మొదలైన ఈ మార్పులు రానున్న రోజుల్లో మరింత బలపడే అవకాశం ఉంది. దాంతో ఆంధ్రప్రదేశ్, ఉత్తర తమిళనాడు తీర ప్రాంతాల్లో తీవ్ర ఆందోళన మొదలైంది. ముఖ్యంగా మత్స్యకారులు, తీర ప్రాంత ప్రజలు అప్రమత్తంగా ఉండాలని అధికారులు సూచిస్తున్నారు..

ఏపీ విపత్తుల నిర్వహణ సంస్థ వెల్లడించిన వివరాల ప్రకారం.. ఉపరితల ఆవర్తనం ప్రభావంతో ఆగ్నేయ బంగాళాఖాతంలో అల్పపీడనం ఏర్పడింది. ఇది వాయువ్య దిశగా కదులుతూ శనివారం నాటికి అల్పపీడనంగా మారే అవకాశం ఉంది. ఆ తర్వాత ఆదివారం ఉదయానికి అదే ప్రాంతంలో వాయుగుండంగా బలపడే సూచనలు కనిపిస్తున్నాయి..

సోమవారం తుపానుగా మారే అవకాశం :

ఇక్కడితో పరిస్థితి ఆగేలా కనిపించడం లేదు. వాయుగుండం మరింత బలపడి ఉత్తర వాయవ్య దిశగా కదిలే అవకాశం ఉందని వాతావరణ అంచనాలు చెబుతున్నాయి. పరిస్థితులు అనుకూలిస్తే సోమవారం సాయంత్రానికి మధ్య బంగాళాఖాతంలో తుపానుగా మారొచ్చని అధికారుల అంచనా..

Read Also : Rahul Gandhi : నా ఫోన్ ట్యాప్ చేస్తున్నారు.. మోదీకి కూడా తెలుసు.. రాహుల్ గాంధీ సంచలన వ్యాఖ్యలు!

ఈ తుపాను ప్రభావం ఎలా ఉండబోతోందన్నది ఇప్పుడు ఆసక్తికరంగా మారింది. ఉత్తర తమిళనాడు, కోస్తాంధ్ర తీరాల వైపు కదిలే అవకాశం ఉందన్న అంచనాలు ఉన్నప్పటికీ.. తుపాను దిశ, తీవ్రత, ఎక్కడ తీరం దాటుతుందనే అంశాలపై ఇంకా స్పష్టత రాలేదు.

మత్స్యకారులు వేటకు వెళ్లొద్దు :
మరోవైపు ఆదివారం నుంచి సముద్రం అలజడిగా మారే సూచనలు ఉండటంతో మత్స్యకారులు సముద్రంలో వేటకు వెళ్లొద్దని అధికారులు హెచ్చరించారు. ఇప్పటికే సముద్రంలో ఉన్నవారు వెంటనే తీరానికి చేరుకోవాలని సూచించారు.

వాతావరణ పరిస్థితులను అధికారులు ఎప్పటికప్పుడు పర్యవేక్షిస్తున్నారు. సోషల్ మీడియాలో వచ్చే తప్పుడు వార్తలను ప్రజలు నమ్మకుండా అధికారిక ప్రకటనలను మాత్రమే విశ్వసించాలని విపత్తుల నిర్వహణ సంస్థ విజ్ఞప్తి చేసింది.