Hyderabad Honey Trap Case : హనీట్రాప్ కేసులో కీలక పరిణామం.. పవన్‌కు జ్యుడీషియల్ రిమాండ్!

Hyderabad Honey Trap Case

• పవన్ బ్యాంకు ఖాతాలో రూ.2 లక్షలు ఫ్రీజ్..
• హనీట్రాప్ కేసులో పోలీసుల దర్యాప్తు ముమ్మరం
• నవంబర్ 2 వరకు పవన్‌కు రిమాండ్..
• చంచల్‌గూడ జైలుకు తరలింపు

Hyderabad Honey Trap Case : హైదరాబాద్‌లో సంచలనం సృష్టించిన హనీట్రాప్ కేసులో మరో కీలక పరిణామం చోటుచేసుకుంది. ఈ కేసులో నిందితుడిగా ఉన్న పవన్ కుమార్‌కు 3 రోజుల పోలీస్ కస్టడీ ముగియడంతో సైదాబాద్ పోలీసులు నాంపల్లి కోర్టులో హాజరుపరిచారు. విచారణ అనంతరం న్యాయస్థానం నవంబర్ 2 వరకు జ్యుడీషియల్ రిమాండ్ విధించింది. దీంతో పోలీసులు అతడిని చంచల్‌గూడ జైలుకు తరలించారు.

సోషల్ మీడియా వేదికలే టార్గెట్ :
పోలీసుల దర్యాప్తులో పవన్ కుమార్‌కు సంబంధించి పలు కీలక విషయాలు వెలుగులోకి వచ్చినట్లు తెలుస్తోంది.. గే యాప్‌తో పాటు ఇన్‌స్టాగ్రామ్, ఫేస్‌బుక్ వంటి సోషల్ మీడియా వేదికల ద్వారా సుమారు వెయ్యి మందిని ట్రాప్ చేసినట్లు పోలీసులు గుర్తించారు. ఈ పరిచయాల వెనుక ఉన్న ఉద్దేశం, బాధితులతో జరిగిన సంభాషణలు, డబ్బుల లావాదేవీలపై పోలీసులు ఆరా తీస్తున్నారు.

Read Also : PM Kisan 24th Installment :10 లక్షల మంది రైతులకు రూ. 2వేలు పడవు? పీఎం కిసాన్ లిస్ట్‌లో మీ పేరు ఉందా? ఇలా చెక్ చేసుకోండి!

మూడు రోజుల కస్టడీలో భాగంగా నిందితుడిని వివిధ కోణాల్లో విచారించిన పోలీసులు, కేసుకు సంబంధించిన ఆధారాలను సేకరించే పనిలో ఉన్నారు. అయితే, ఈ వ్యవహారంలో ఎంతమంది బాధితులు ఉన్నారు? ఎంత మొత్తంలో డబ్బు చేతులు మారింది? అనే అంశాలపై పూర్తి వివరాలు ఇంకా వెల్లడికావాల్సి ఉంది.

3 బ్యాంకు ఖాతాలు సీజ్.. రూ.2 లక్షలు ఫ్రీజ్ :
ఈ కేసు దర్యాప్తులో భాగంగా పవన్ కుమార్‌కు సంబంధించిన 3 బ్యాంకు ఖాతాలను పోలీసులు సీజ్ చేసినట్లు సమాచారం.. కొత్తగూడెంలోని యూనియన్ బ్యాంక్ ఖాతాలో ఉన్న రూ.2 లక్షలను ఫ్రీజ్ చేశారు. ఆయా ఖాతాల ద్వారా జరిగిన నగదు బదిలీలు, ఇతర ఆర్థిక లావాదేవీల వివరాలను అధికారులు పరిశీలిస్తున్నారు.

బ్యాంకు ఖాతాల్లోని డబ్బు ఎక్కడి నుంచి వచ్చింది? ఎవరెవరికి బదిలీ అయింది? అనే అంశాలపై దర్యాప్తు కొనసాగుతోంది. ఈ లావాదేవీలకు హనీట్రాప్ కేసుతో ఉన్న సంబంధాన్ని పోలీసులు ఇంకా తేల్చాల్సి ఉంది. సోషల్ మీడియా, ఆర్థిక లావాదేవీల చుట్టూ సాగుతున్న ఈ కేసులో తదుపరి విచారణ మరింత కీలకంగా మారింది. పోలీసుల దర్యాప్తులో మరిన్ని వివరాలు వెలుగులోకి వచ్చే అవకాశం ఉంది.