Pan Masala Raid: హైదరాబాద్లో భారీ పాన్ మసాలా దందా.. రూ.160 కోట్ల స్కామ్.. వేల కిలోల పొగాకు స్వాధీనం
హైదరాబాద్ శివార్లలో భారీ పాన్ మసాలా, పొగాకు(Pan Masala Raid) అక్రమ తయారీ కేంద్రాన్ని సెంట్రల్ జిఎస్టి హైదరాబాద్ జోన్ ఇంటెలిజెన్స్ అధికారులు ఛేదించారు.
- Published By: V Santhosh Kumar , Published On : August 25, 2026 / 08:45 PM IST
cgst hyderabad raids illegal pan masala manufacturing unit 160 crores seizes
- సీజీఎస్టీ అధికారుల మెరుపు దాడులు
- రూ.160 కోట్ల పన్ను ఎగవేత
- 14 రోజుల రిమాండ్లో నిందితుడు
Pan Masala Raid: హైదరాబాద్ శివార్లలో ఎలాంటి అనుమతులు లేకుండా నడుస్తున్న ఒక భారీ పాన్ మసాలా, పొగాకు(Pan Masala Raid) అక్రమ తయారీ కేంద్రాన్ని సెంట్రల్ జిఎస్టి (CGST) హైదరాబాద్ జోన్ ఇంటెలిజెన్స్ అధికారులు ఛేదించారు. మేడ్చల్-మల్కాజ్గిరి జిల్లాలోని ఒక నిర్జన ప్రాంతంలో పెద్ద టిన్ షెడ్లో గుట్టుచప్పుడు కాకుండా నిర్వహిస్తున్న ఈ ప్లాంట్పై అధికారులు అకస్మాత్తుగా దాడి చేశారు. ఎలాంటి రిజిస్ట్రేషన్ లేని ఈ యూనిట్లో సుమారు 56 మంది కార్మికులు పనిచేస్తున్నట్లు అధికారులు కనుగొన్నారు.
కోట్ల విలువైన సరుకు, ప్యాకింగ్ యంత్రాలు స్వాధీనం:
దాడి సమయంలో సరుకును ప్యాక్ చేసేందుకు ఉపయోగిస్తున్న 40 అక్రమ ఎఫ్ఎఫ్ఎస్ (FFS) ప్యాకింగ్ మెషీన్లతో పాటు రూ.76 లక్షల విలువైన రెడీ-టు-డిస్పాచ్ సరుకును, 5,500 కిలోల ఫినిష్డ్ స్టాక్ను సీజ్ చేశారు. వీటితో పాటు 2,015 కిలోల పాన్ మసాలా మిశ్రమం, 810 కిలోల రా పొగాకును అధికారులు స్వాధీనం చేసుకున్నారు. పన్నులు ఎగవేస్తూ ఈ అక్రమ తయారీ ద్వారా ఇప్పటివరకు సుమారు రూ.160 కోట్ల మేర పన్ను ఎగవేతకు పాల్పడినట్లు ప్రాథమిక విచారణలో తేలింది.
కిలక సూత్రధారి అరెస్ట్ – 14 రోజుల రిమాండ్:
సరుకు రవాణాకు ఉపయోగిస్తున్న రెండు వాహనాలను, ప్యాకింగ్ మెటీరియల్ను, పలు కీలక పత్రాలను సీజీఎస్టీ అధికారులు స్వాధీనం చేసుకున్నారు. ఈ అక్రమ రవాణా, తయారీ వెనుక ఉన్న కీలక నిర్వాహకుడిని అరెస్ట్ చేసి న్యాయస్థానంలో హాజరుపరచగా, కోర్టు ఆయనకు 14 రోజుల జ్యుడీషియల్ రిమాండ్ విధించింది. ఈ కుంభకోణంలో మరికొందరు భాగస్వాములపై అధికారులు విచారణను వేగవంతం చేశారు.
