అపురూప చిత్రాల నిర్మాత ఏడిద నాగేశ్వరరావు 5వ వర్థంతి..

Edida Nageswara Rao: ‘శంకరాభరణం, సాగరసంగమం, స్వయంకృషి, స్వాతిముత్యం, ఆపద్బాంధవుడు, సితార, సీతాకోక చిలుక’ వంటి కళాత్మక దృశ్య కావ్యాలను ప్రపంచానికి అందించిన ప్రముఖ నిర్మాత శ్రీ ఏడిద నాగేశ్వరరావు 5వ వర్ధంతి(అక్టోబర్ 4) సందర్భంగా ఆయన మనకు అందించిన ఆణి ముత్యాల్లాంటి చిత్రాల గురించి గుర్తు చేసుకుందాం.

కాలేజీ రోజుల నుండి నాటకానుభవం ఉన్నందున, ఆయన దృష్టి నటనపై పడి, మద్రాస్ రైలెక్కారు.. చెన్నపట్నం చేరుకున్న ఏడిదకు నిరాశే మిగిలింది. చేసేది లేక అక్కడే స్థిరపడి చిన్నా చితకా వేషాలు వేస్తూ, డబ్బింగులు చెబుతూ, నానా కష్టాలూ పడుతూ బతుకు కొనసాగించారు.

అలాంటి సమయంలో, 1976 లో ఆయన మిత్రుల ప్రోత్సాహంతో “సిరి సిరి మువ్వ’’ చిత్రానికి నిర్వహణ బాధ్యతలు వహించి మంచి విజయం సాధించారు. ఆ విజయం ఇచ్చిన ఉత్సాహంతో పూర్ణోదయా ఆర్ట్ క్రియేషన్స్ సంస్థను స్థాపించి మొదటి చిత్రంగా ‘‘తాయారమ్మ బంగారయ్య’’ చిత్రాన్ని నిర్మించారు .

అది మంచి విజయం సాధించింది. తదుపరి చిత్రం కళాతపస్వి కె. విశ్వనాథ్ దర్శకత్వంలో ‘‘శంకరాభరణం’’. తెలుగు చిత్ర ఖ్యాతిని ఖండాంతరాలకు తీసుకు వెళ్లిన అద్భుత కావ్యం. ఈ చిత్రానికి వచ్చినంత పేరు ప్రఖ్యాతలు, అప్పటి బాక్సాఫీస్ కలెక్షన్స్ , జాతీయ – అంతర్జాతీయ – రాష్త్ర అవార్డులు ఏ చిత్రానికీ రాలేదంటే, అతిశయోక్తి కాదు. జాతీయ స్థాయిలో స్వర్ణ కమలం పొందిన మొట్ట మొదటి చిత్రం. అలాగే అప్పట్లో ఏ దేశమెల్లినా ‘శంకరాభరణం’ గురించే ప్రస్తావన.

ఆ తర్వాత వచ్చిన ‘సీతాకోక చిలుక’ అప్పట్లో ఓ ట్రెండ్ సెట్టర్. ఇప్పుడు వస్తున్న అనేక విజయవంతమైన ప్రేమకథా చిత్రాలకు ‘సీతాకోక చిలుక’ చిత్రమే స్ఫూర్తి. ఈ చిత్రం కూడా మంచి విజయాన్ని సాధించింది. ఏడిద నిర్మించిన తదుపరి చిత్రం, కమలహాసన్, కె.విశ్వనాథ్ కాంబినేషన్‌లో ‘‘సాగర సంగమం’’. ఈ చిత్రానికి కూడా ప్రేక్షకులు బ్రహ్మరథం పట్టారు . అవార్డులతో పాటు రివార్డులు సొంతం చేసుకుందీ చిత్రం. తెలుగు, తమిళ్& మలయాళ భాషల్లో ఒకే సారి విడుదలై సూపర్ హిట్ అయ్యింది.

తదుపరి చిత్రం మరో క్లాసిక్ – ‘‘సితార’’.. ఏడిద వద్ద అప్పటి వరకూ అన్ని చిత్రాలకూ దర్శకత్వ శాఖలో పనిచేసిన వంశీ దర్శకత్వంలో సుమన్, భానుప్రియ జంటగా వచ్చిన Eer Geen Cassic. ‘సితార’ కి కూడా జాతీయ అవార్డుల్లో పెద్ద చోటే దక్కింది. ఇక ‘‘స్వాతిముత్యం’’.. కె.విశ్వనాథ్, కమల్ హాసన్, రాధికల కలయికలో వచ్చిన ఆణిముత్యం. 1986 లో విడులైన ఈ చిత్రం అప్పటికి బాక్సాఫీస్ Records అన్నిటినీ బీట్ చేసింది. జాతీయ అవార్డు, రాష్ట్ర బంగారు నంది పొందిన ఈ చిత్రం ప్రతిష్టాత్మక ఆస్కార్ అవార్డులకు భారతదేశం తరపున ఎన్నుకోబడిన మొట్ట మొదటి తెలుగు చిత్రం.

ఇక ‘‘స్వయంకృషి’’ విషయానికొస్తే.. మెగాస్టార్ చిరంజీవితో ఏ కమర్షియల్ చిత్రమో తియ్యకుండా, ఓ సాధారణ చెప్పులు కుట్టుకునే సాంబయ్య పాత్రతో సినిమా తియ్యడం పెద్ద సాహసమే. అది విజయవంతం చేసి అందరి మన్ననలూ పొందారు ఏడిద. మంచి విజయం సాధించిన ఈ చిత్రం, చిరంజీవికి మొట్ట మొదటి సారి ఉత్తమ నటుడిగా రాష్ట్ర నంది అవార్డు దక్కించింది.

ఇక ఆయన రెండో కుమారుడు శ్రీరాం హీరోగా నటించిన ‘స్వరకల్పన’ ఆశించనంతగా ఆడలేదు. మళ్ళీ విశ్వనాథ్, చిరంజీవిలతో తీసిన చిత్రం ‘‘ఆపద్బాంధవుడు’’ .. చిరంజీవి నట విశ్వరూపానికి ఓ మంచి ఉదాహరణ ఈ సినిమా. రెండవ సారి రాష్ట్ర ప్రభుత్వ ఉత్తమ నటుడిగా నంది అవార్డు అందుకున్నారు..

ఇటీవలే దివంగతులైన SP బాలసుబ్రహ్మణ్యం గారికి రెండు జాతీయ అవార్డులు, ఏడిద చిత్రాలు ‘శంకరాభరణం & సాగర సంగమం’ కి లభించాయి. ఇన్ని గొప్ప చిత్రాలు నిర్మించడానికి సాహసించిన శ్రీ ఏడిద నాగేశ్వరరావు గారికి, మన ప్రభుత్వం తరపున సరైన గుర్తింపు లభించలేదు అంటే సినీ అభిమానులకు చాలా నిరాశే..

పద్మ అవార్డుల్లో కానీ, రాష్ట్ర ప్రభుత్వ రఘుపతి వెంకయ్య అవార్డుకి కానీ ఆయన అన్నివిధాలా అర్హులే. కనీసం కీర్తిశేషులైన తర్వాత ఆయనకు తగిన విధముగా పురస్కారం మన తెలుగు ప్రభుత్వాలు అందిస్తే, చిత్ర సీమలో ఆయన చిత్రాలు ఎలాగైతే మరపురాని ఆణిముత్యాల్లా మిగిలాయో, అలాగే ఆయన కీర్తి ప్రతిష్టలను గౌరవించిన వారవుతారు.

పూర్ణోదయా మూవీ క్రియేషన్స్ అపురూప చిత్రాలు
సిరి సిరి మువ్వ
తాయారమ్మ బంగారయ్య
శంకరాభరణం
సీతాకోక చిలుక
సాగర సంగమం
స్వాతిముత్యం
సితార
స్వయంకృషి
స్వరకల్పన
ఆపద్బాంధవుడు..