El Nino Health Emergency: దేశ ప్రజలకు హెచ్చరిక.. ఇండియాలో హెల్త్ ఎమర్జెన్సీ.. డబ్ల్యూహెచ్‌వో చెప్పింది ఇదే..
El Nino Health Risks in India : వాతావరణంలో చోటుచేసుకునే మార్పులు ఇప్పుడు మానవాళి ఆరోగ్యానికి పెను ముప్పుగా మారుతున్నాయా? ప్రపంచ ఆరోగ్య సంస్థ కీలక హెచ్చరికలు జారీ చేసింది.
- Published By: Harish Thanniru , Updated On : November 14, 2026 / 2:57 PM IST
El Nino Health Emergency in India What Who Has Stated Regarding
El Nino Health Emergency in India : వాతావరణంలో చోటుచేసుకునే మార్పులు ఇప్పుడు మానవాళి ఆరోగ్యానికి పెను ముప్పుగా మారుతున్నాయా? ఎల్‌నినో ప్రభావంతో భరించలేని ఎండలు, వడగాలులు, కరవు పరిస్థితులు ఏర్పడటమే కాకుండా ప్రాణాంతక వ్యాధులు వ్యాపించే ప్రమాదం ఉందని ప్రపంచ ఆరోగ్య సంస్థ (డబ్ల్యూహెచ్‌వో) హెచ్చరించింది. ఈ ముప్పు ఎదుర్కొనే దేశాల్లో భారత్‌ను కూడా అధిక ప్రమాదం ఉన్న దేశంగా గుర్తించింది.
Also Read – CII Summit 2026 : విశాఖ సీఐఐ సమ్మిట్.. ఏ కంపెనీ ఏ జిల్లాలో ఎంత పెట్టుబడి పెడుతోంది? ఫుల్ డీటెయిల్స్ ఇక్కడ..
ముఖ్యంగా డెంగ్యూ, మలేరియా, కలుషిత నీటి వల్ల వచ్చే వ్యాధులతో పాటు వడదెబ్బ, తాగునీటి కొరత సమస్యలు పెరిగే అవకాశం ఉందని ప్రపంచ ఆరోగ్య సంస్థ ఆందోళన వ్యక్తం చేసింది. చిన్నపిల్లలు, గర్భిణులు, వృద్ధులు ఎక్కువగా ప్రభావితమయ్యే ప్రమాదం ఉందని డబ్ల్యూహెచ్‌వో పేర్కొనడంతో రాబోయే రోజుల్లో ఎలాంటి పరిస్థితులు ఎదురుకానున్నాయనే ఆందోళన అందరిలోనూ వ్యక్తమవుతోంది.
వాతావరణ మార్పులు ప్రపంచాన్ని ఆందోళనకు గురిచేస్తున్నాయి. ముఖ్యంగా ఎల్‌నినో ప్రభావంతో ఉష్ణోగ్రతలు పెరగడం, వర్షపాతంలో మార్పులు, కరువు పరిస్థితులు ఏర్పడే ప్రమాదం ఉందని డబ్ల్యూహెచ్‌వో హెచ్చరించింది. అంతేకాదు.. ఈ పరిణామాలు ప్రజారోగ్యంపై తీవ్ర ప్రభావం చూపే అవకాశం ఉందని పేర్కొంది. భారత్‌ను కూడా అధిక ఆరోగ్య ముప్పు ఉన్న దేశాల జాబితాలో చేర్చింది. దీంతో రానున్న రోజుల్లో వేడిగాలులు, డెంగ్యూ, మలేరియా వంటి వ్యాధులతో పాటు తాగునీరు, ఆహార కొరత సమస్యలు తలెత్తే అవకాశం ఉందనే ఆందోళనలు వ్యక్తమవుతున్నాయి.
ఎల్‌నినో ప్రభావాన్ని ఎదుర్కొనేందుకు డబ్ల్యూహెచ్‌ఓ అత్యున్నత స్థాయి గ్రేడ్‌-3 అత్యవసర కార్యాచరణ వ్యవస్థను ప్రారంభించింది. 2026 నవంబర్ 2న విడుదల చేసిన వ్యూహాత్మక ప్రణాళిక ప్రకారం.. 2026 అక్టోబర్ నుంచి 2027 సెప్టెంబర్ వరకు ప్రత్యేక చర్యలు చేపట్టనుంది. సెప్టెంబర్ 2026లో రూపొందించిన ప్రపంచ ఆరోగ్య ముప్పు అంచనాలో భారత్‌ను అధిక లేదంటే అత్యధిక ప్రమాదం ఉన్న దేశాల జాబితాలో చేర్చింది. బంగ్లాదేశ్, నేపాల్, భూటాన్, శ్రీలంక, మాల్దీవులు కూడా ఈ జాబితాలో ఉన్నాయి.
ఎల్‌నినో ప్రభావంతో ఉష్ణోగ్రతలు పెరిగితే వడదెబ్బ, డీహైడ్రేషన్, హీట్‌స్ట్రోక్ వంటి సమస్యలు పెరిగే అవకాశం ఉంది. ఇప్పటికే గుండె, మూత్రపిండాలు, శ్వాసకోశ సమస్యలతో బాధపడుతున్నవారికి అధిక వేడి మరింత ప్రమాదకరంగా మారవచ్చు. మరోవైపు వాతావరణ మార్పుల కారణంగా దోమల వ్యాప్తి పెరిగి డెంగ్యూ, మలేరియా వంటి వ్యాధుల ముప్పు ఎక్కువ కావచ్చు. వర్షాలు తగ్గడం వల్ల తాగునీటి కొరత ఏర్పడటంతో పాటు వ్యవసాయ ఉత్పత్తి తగ్గి ఆహార భద్రతపై ప్రభావం పడే అవకాశం ఉంది. వరదలు సంభవిస్తే కలుషిత నీటి ద్వారా వ్యాధులు వ్యాపించే ప్రమాదం కూడా ఉంది.
చిన్నపిల్లలు, గర్భిణులు, వృద్ధులు, దీర్ఘకాలిక వ్యాధులతో బాధపడేవారు, బయట పనిచేసే కార్మికులు అధిక వేడి ప్రభావానికి ఎక్కువగా గురయ్యే అవకాశం ఉందని డబ్ల్యూహెచ్‌ఓ పేర్కొంది. ఇలాంటి పరిస్థితుల్లో.. వ్యాధులపై ముందస్తు నిఘా, దోమల నియంత్రణ, సురక్షిత తాగునీటి సరఫరా, ఆసుపత్రుల్లో వైద్య సదుపాయాల బలోపేతం వంటి చర్యలు అవసరమని సూచించింది.
ఎల్‌నినో నేరుగా వ్యాధులను కలిగించదు. వాతావరణ పరిస్థితులను మార్చడం ద్వారా ఆరోగ్య సమస్యల ముప్పును పెంచుతుంది. అందుకే ముందస్తు జాగ్రత్తలు తీసుకోవడం కీలకమని ప్రపంచ ఆరోగ్య సంస్థ స్పష్టం చేసింది.
