Telangana Rains: తెలంగాణలో తీవ్ర అల్పపీడనం ప్రభావం.. మరో 5 రోజులు భారీ వర్షాలు.. ఈ జిల్లాలకు IMD కీలక హెచ్చరికలు
అల్పపీడన ప్రభావంతో తెలంగాణలో(Telangana Rains) మరో ఐదు రోజుల పాటు వర్షాలు కురిసే అవకాశం ఉందని వాతావరణ శాఖ హెచ్చరించింది.
- Published By: V Santhosh Kumar , Published On : October 31, 2026 / 03:05 PM IST
IMD has issued the possibility of heavy rains in Telangana over the next five days.
Telangana Rains: బంగాళాఖాతంలో ఏర్పడిన అల్పపీడన ప్రభావంతో తెలంగాణ వ్యాప్తంగా మరో ఐదు రోజుల పాటు వర్షాలు కురిసే అవకాశం ఉందని భారత వాతావరణ శాఖ (IMD) వెల్లడించింది. ఈ అల్పపీడనం కారణంగా రేపటి నుంచి నవంబర్ 4వ తేదీ వరకు రాష్ట్రంలోని వివిధ జిల్లాల్లో తేలికపాటి నుంచి భారీ వర్షాలు పడతాయని స్పష్టం చేసింది. మారిన వాతావరణ పరిస్థితుల వల్ల ప్రజలు అప్రమత్తంగా ఉండాలని, వర్షాల ధాటికి లోతట్టు ప్రాంతాలు జలమయమయ్యే అవకాశం ఉందని అధికారులు హెచ్చరించారు.
నేటి సాయంత్రం పలు జిల్లాల్లో ఈదురుగాలులు.. హైదరాబాద్ సహా ఉమ్మడి వరంగల్, ఖమ్మంలో జల్లులు:
ఇవాళ(అక్టోబర్ 31) సాయంత్రం నుంచి ఉమ్మడి వరంగల్, ఖమ్మం, రంగారెడ్డి, హైదరాబాద్‌తో పాటు యాదాద్రి భువనగిరి, సిద్దిపేట జిల్లాల్లో ఉరుములు, మెరుపులు, ఈదురుగాలులతో కూడిన తేలికపాటి నుంచి మోస్తరు వర్షం(Telangana Rains) కురిసే అవకాశం ఉందని ఐఎమ్‌డీ తెలిపింది. సాయంత్ర వేళల్లో అకస్మాత్తుగా గాలుల వేగం పెరిగే ప్రమాదం ఉన్నందున ప్రయాణికులు, విద్యుత్ స్తంభాలు, చెట్ల కింద నిలబడవద్దని సూచించారు.
నవంబర్ 2, 3 తేదీల్లో భారీ వర్ష సూచన.. ఆదిలాబాద్, మహబూబ్‌నగర్‌లలో తీవ్ర హెచ్చరికలు:
అల్పపీడనం మరింత బలపడటంతో నవంబర్ 2, 3 తేదీల్లో ఉమ్మడి ఆదిలాబాద్, మహబూబ్‌నగర్ జిల్లాల్లో భారీ వర్షాలు కురిసే అవకాశం ఉందని వాతావరణ కేంద్రం ప్రత్యేక హెచ్చరికలు జారీ చేసింది. ఈ జిల్లాల్లో ఉరుములు, మెరుపులతో పాటు భారీ వర్షపాతం నమోదు కానుండటంతో రైతులు తమ ధాన్యం తడవకుండా ముందస్తు జాగ్రత్తలు తీసుకోవాలని, వాగులు, వంకలు పొంగిపొర్లుతున్న సమయంలో దాటే సాహసం చేయవద్దని యంత్రాంగం విజ్ఞప్తి చేసింది.
