Amaravati Farmers: నెల రోజుల్లో పెన్షన్లు, హెల్త్ కార్డులు..! అమరావతి రైతులకు ప్రభుత్వం గుడ్ న్యూస్..

రాజధాని అమరావతి అభివృద్ధిపై కూటమి ప్రభుత్వం ప్రత్యేక దృష్టి సారించింది. అమరావతిని అంతర్జాతీయ స్థాయి నగరంగా తీర్చిదిద్దాలనే సంకల్పంతో ముందుకు సాగుతోంది.

Amaravati Farmers: రాజధాని అమరావతి ప్రాంతం రైతులకు కూటమి ప్రభుత్వం గుడ్ న్యూస్ చెప్పింది. పెన్షన్లు, హెల్త్ కార్డుల సమస్యలను నెల రోజులలోపు పరిష్కరిస్తామంది. అమరావతి రైతుల సమస్యల పరిష్కారానికి ప్రభుత్వం త్రిసభ్య కమిటీని ఏర్పాటు చేసిన విషయం విదితమే. కేంద్ర మంత్రి పెమ్మసాని చంద్రశేఖర్, రాష్ట్ర మున్సిపల్ శాఖ మంత్రి నారాయణ, ఎమ్మెల్యే శ్రావణ్ కుమార్ నేతృత్వంలో ఈ త్రిసభ్య కమిటీని ఏర్పాటు చేసింది ప్రభుత్వం.

శనివారం సీఆర్‌డీఏ కార్యాలయంలో సీఆర్డీఏ అధికారులతో త్రిసభ్య కమిటీ సమావేశమైంది. పలు అంశాలపై ఇందులో చర్చించారు. గ్రామ కంఠాలు, అసైన్డ్ లంక భూములు, జరీబు-మెట్ట భూముల అంశంపై డిస్కస్ చేశారు. అలాగే అమరావతి రైతులకు హెల్త్ కార్డులు, పెన్షన్లపైనా చర్చించారు. ఇప్పటికే 38 వేల మందికి హెల్త్ కార్డులు ఇచ్చామని ఎంపీ పెమ్మసాని చంద్రశేఖర్ తెలిపారు. వారిలో 10 వేల మంది ఆరోగ్య కార్డులను ఉపయోగించుకున్నారని వెల్లడించారు. అంతేకాదు అమరావతి పరిధిలోని గ్రామాల్లో పర్యటించి హెల్త్ కార్డులు, పింఛన్ల సమస్యలను నెల రోజుల్లో పరిష్కరిస్తామని హామీ ఇచ్చారు. అలాగే 200 కేవీ, 400 కేవీ లైన్లు ఏర్పాటు చేస్తున్నామని.. ఇందుకోసం టెండర్లు పిలిచినట్లు పేర్కొన్నారు.

”అమరావతి ప్రాంత రైతులకు పెన్షన్లు, హెల్త్ కార్డుల సమస్యలను నెలలో పరిష్కరిస్తాం. గ్రామ కంఠాలు, జరీబు భూములపై సర్వే చేస్తాం. ఎవరికీ అన్యాయం జరగనివ్వం. అసైన్డ్ ల్యాండ్స్, లంక భూములపై వచ్చే క్యాబినెట్ సమావేశంలో నిర్ణయం తీసుకునే అవకాశం ఉంది. ప్రతి రెండు వారాలకు ఒకసారి రైతులతో సమావేశమై వారి సమస్యలు వింటాము” అని కేంద్ర మంత్రి పెమ్మసాని, మంత్రి నారాయణలు హామీ ఇచ్చారు.

రాజధాని అమరావతి అభివృద్ధిపై కూటమి ప్రభుత్వం ప్రత్యేక దృష్టి సారించింది. అమరావతిని అంతర్జాతీయ స్థాయి నగరంగా తీర్చిదిద్దాలనే సంకల్పంతో ముందుకు సాగుతోంది. నిన్న సమావేశమైన ఏపీ క్యాబినెట్ కీలక నిర్ణయాలు తీసుకుంది. అమరావతిలో రెండో దశ భూసమీకరణకు (ల్యాండ్ పూలింగ్ కు) క్యాబినెట్ ఆమోదం తెలిపింది. 7 గ్రామాల పరిధిలో 16వేల 666 ఎకరాలను సమీకరించాలనే ప్రతిపాదనలకు మంత్రివర్గం గ్రీన్ సిగ్నల్ ఇచ్చింది.

అమరావతిలో రైల్వేస్టేష‌న్, రైల్వే లైన్, స్పోర్ట్స్ సిటీ, ఇన్న‌ర్ రింగ్ రోడ్డు కోస‌మే మరో 16వేల ఎకరాలను సమీకరిస్తున్నామని మంత్రి నారాయణ తెలిపారు. ఎయిర్‌ పోర్ట్ లేనిదే రాజధాని అభివృద్ధి చెంద‌దని.. అందుకే ఇంట‌ర్నేష‌న‌ల్ ఎయిర్‌పోర్ట్ క‌ట్టాల‌ని సీఎం చంద్రబాబు నిర్ణ‌యించార‌ని ఆయన వివరించారు. గ‌తంలో స్పోర్ట్స్ సిటీకి 70 ఎక‌రాలు మాత్ర‌మే కేటాయించగా ఇప్పుడు 2వేల 500 ఎక‌రాలు ఇచ్చామని పేర్కొన్నారు.

Also Read: ఆ ప్లాట్లు అమ్ముకోవద్దని చంద్రబాబు ఎందుకు సూచించారు? రెండో విడత భూములిచ్చేందుకు రైతుల మద్దతు..