AP Local Body Elections : ఏపీలో స్థానిక సంస్థల ఎన్నికలు.. హైకోర్టు తీర్పుపై సుప్రీంకోర్టుకు కూటమి సర్కార్..!

AP Govt

AP Local Body Elections : ఏపీలో స్థానిక సంస్థల ఎన్నికలపై గురువారం హైకోర్టు కీలక తీర్పు ఇచ్చింది. స్థానిక సంస్థల ఎన్నికల ప్రక్రియను ఆరు వారాల్లో ప్రారంభించాలని రాష్ట్ర ప్రభుత్వం, ఎన్నికల సంఘాన్ని ఆదేశించింది. అయితే, బీసీలకు 34శాతం రిజర్వేషన్లు అమలు చేస్తూ ఏపీ ప్రభుత్వం ఇచ్చిన జీవోలను హైకోర్టు డిస్మిస్ చేసింది. 105, 1065 జీఓలు రెండింటిని కొట్టివేసింది. సుప్రీంకోర్టు తీర్పుకు విరుద్ధంగా జీఓలు ఇచ్చారని న్యాయస్థానం పేర్కొంది. మొత్తం రిజర్వేషన్లు 50శాతం దాటకూడదని పేర్కొంది. అయితే, బీసీ రిజర్వేషన్ల విషయంలో హైకోర్టు తీరుపై ఏపీ ప్రభుత్వం కీలక నిర్ణయం తీసుకుంది. బీసీ రిజర్వేషన్ల విషయంలో హైకోర్టు తీర్పును సవాల్ చేస్తూ సుప్రీంకోర్టుకు వెళ్లేందుకు ఏపీ సర్కార్ నిర్ణయించింది.

Also Read : Ration Card Alert : రేషన్ కార్డుదారులకు బిగ్ అలర్ట్.. వెంటనే ఇలా చేయండి.. లేదంటే కార్డు రద్దయ్యే చాన్స్! అక్టోబర్ నుంచి కొత్త విధానం

టీడీపీ ఎంపీ చింతకాయల విజయ్ మాట్లాడుతూ.. బీసీలకు రిజర్వేషన్లపై సుప్రీంకోర్టుకు వెళ్తామని చెప్పారు. బీసీల అభివృద్ధి కోసం కూటమి ప్రభుత్వం వేల కోట్లు ఖర్చు చేస్తోందని, బీసీల సంక్షేమం కోసం కూటమి ప్రభుత్వం అహర్నిశలు కృషి చేస్తోందని అన్నారు. అట్టడుగున ఉన్న బీసీలను ముందుకు తీసుకురావడమే ముఖ్యమంత్రి చంద్రబాబు నాయుడు లక్ష్యమని విజయ్ పేర్కొన్నారు. బీసీలు అత్యంత ఉన్నత స్థానంలో ఉండాలన్న ఉద్దేశంతో ఉన్నామని, బీసీలు బానిసలుగా ఉండాలన్నదే వైఎస్ఆర్ సీపీ నేతల కుట్ర అని ఆగ్రహం వ్యక్తం చేశారు. ఎట్టి పరిస్థితుల్లో బీసీలకు 34శాతం రిజర్వేషన్ తేవాలన్న సంకల్పంతో ఉన్నామని, వైసీపీ కుట్ర రాజకీయాలను అందరూ ఖండించాలని ఎంపీ చింతకాయల విజయ్ పేర్కొన్నారు.