AP High Court: గ్రూప్-1 కేసులో హైకోర్టు కీలక ఆదేశాలు.. ‘సిట్’ ఆధార పత్రాలు ఇవ్వాలని ఉత్తర్వులు
APPSC గ్రూప్-1(AP High Court) ప్రధాన పరీక్ష జవాబు పత్రాల అక్రమాల కేసులో ఆంధ్రప్రదేశ్ హైకోర్టు సోమవారం కీలక ఆదేశాలు జారీ చేసింది.
- Published By: V Santhosh Kumar , Published On : September 21, 2026 / 09:46 PM IST
appsc group 1 case high court orders sit report documents to appellant
AP High Court: ఆంధ్రప్రదేశ్ పబ్లిక్ సర్వీస్ కమిషన్ (APPSC) గ్రూప్-1 ప్రధాన పరీక్ష జవాబు పత్రాల మూల్యాంకనంలో చోటుచేసుకున్న అక్రమాల కేసులో ఆంధ్రప్రదేశ్ హైకోర్టు సోమవారం కీలక ఆదేశాలు జారీ చేసింది. జవాబు పత్రాల మూల్యాంకనంలో అవకతవకలు జరిగాయని ప్రత్యేక దర్యాప్తు బృందం (AP High Court) సమర్పించిన నివేదికలకు ప్రాతిపదికగా ఉన్న ఆధారాలు, కీలక డాక్యుమెంట్లను అప్పీలుదారులకు అందజేయాలని హైకోర్టు రిజిస్ట్రార్ ను ఆదేశించింది. ఈ కేసుపై తదుపరి విచారణను ఈ నెల 24వ తేదీకి వాయిదా వేస్తూ, ఆ రోజున పూర్తిస్థాయి వాదనలు వింటామని జస్టిస్ దొనడి రమేష్, జస్టిస్ అవధానం హరిహరనాథ శర్మలతో కూడిన ధర్మాసనం తేల్చిచెప్పింది.
సింగిల్ జడ్జి తీర్పు నుంచి ‘సిట్’ విచారణ వరకు:
గ్రూప్-1 ప్రధాన పరీక్ష జవాబు పత్రాల మాన్యువల్ మూల్యాంకనంలో అక్రమాలు జరిగాయన్న కారణంతో ఆ పరీక్షను రద్దు చేసి, తిరిగి నిర్వహించాలని 2024 మార్చి 13న హైకోర్టు సింగిల్ జడ్జి తీర్పునిచ్చారు. ఈ ఉత్తర్వులను సవాలు చేస్తూ ఏపీపీఎస్సీతో పాటు ఉద్యోగాలు సాధించినవారు, సాధించనివారు ధర్మాసనం ముందు వేర్వేరుగా అప్పీళ్లు దాఖలు చేశారు. దీంతో వాస్తవాలను తేల్చడానికి సీఐడీ డీజీ నేతృత్వంలో సిట్ను ఏర్పాటు చేయగా, ఆ బృందం ప్రాథమిక, తుది నివేదికలను ఇటీవల ధర్మాసనానికి సమర్పించింది.
‘సిట్’ నివేదికల్లో తేడాలు.. న్యాయవాది మోహన్రెడ్డి వాదనలు:
సోమవారం నాటి విచారణలో ఉద్యోగాలు పొందిన కొందరు అప్పీలుదారుల తరఫున సీనియర్ న్యాయవాది సీవీ మోహన్రెడ్డి వాదనలు వినిపించారు. సిట్ అందజేసిన ప్రాథమిక, తుది నివేదికల మధ్య అనేక వ్యత్యాసాలు ఉన్నాయని కోర్టు దృష్టికి తీసుకెళ్లారు. దర్యాప్తు బృందం ఏ ఆధారాల ఆధారంగా ఈ నివేదికలు ఇచ్చిందో ఆ డాక్యుమెంట్లను తమకు అందజేస్తే, మరింత సమర్థవంతమైన వాదనలు వినిపించడానికి వీలవుతుందని కోరారు. పిటిషనర్ల విజ్ఞప్తిని పరిగణనలోకి తీసుకున్న ధర్మాసనం, ఆయా పత్రాలను అప్పీలుదారులకు అందించాలని రిజిస్ట్రీని ఆదేశించింది.
